“Leo o Linahei,” Mo Le Malosi o le Autalavou, Mati 2022.
Leo o Linahei
Mai musika e oo i talafaasolopito o aiga, o loo faaaoga ai e Linahei lona leo mo le lelei.
Ata na pueina e Stephane Sayeb; ata na tusia e Claire Lock
Ua iloa e Linahei D. mai Tahiti le auala e faaaoga ai lona leo e faamanuia ai isi—i le tele o auala nai lo le tasi. Mo se faataitaiga, o loo ia suesue ina ia avea ma se fomai o le tautala i se aso. “Ou te manao e fesoasoani i tamaiti i a latou sipelaga po o le auala latou te tautatala ai,” o lana tala lea.
E ui i lea, ua na o le amataga lena. Na fanau mai i se aiga o tagata musika talenia, ua maua e Linahei e 14 tausaga le matua le tele o avanoa e faaaoga ai lona leo mo pesepesega. “Ma te fiafia ma lo’u tuagane e pepese faatasi. E masani ona ia usu i le leo maualuga, ae ou usuina le leo maualalo!”
Ma o loo i ai foi se au faili atoa a le aiga. “E ta e lo‘u tina le piano e fesoasoani e aoao ai i matou i pese, ma e ta e lo’u tama le kitara ma le ukulele.” Ma o le a se faaili a le aiga e aunoa ma ni nai mea faaili ta lima? “Ma te fiafia lava ma lo‘u tama e ta le to’ere, o se atigipalau [patē] masani a Polenisia.”
Faatasi ai ma se au atoa e fesoasoani ia te ia, e fesoasoani lona aiga ia te ia i le sili atu nai lo na o musika. “E faamalosiau mai pea ou matua ia te au i au suesuega, ma e tuuina mai e lou tama ia te au faamanuiaga faaleperisitua.” A oo mai taimi faigata, na te iloa e mafai foi ona ia liliu atu i lona Tama Faalelagi. “Ou te iloa le tele o le alofa o le Alii ia te au ma o loo i ai pea o Ia iina mo Ana fanau.”
E le gata ina faaaoga e Linahei lona leo mo musika ma tatalo, ae e talanoa foi o ia e uiga i le fesoasoani atu i tagata o le aiga i le isi itu o le veli.
O Se Leo o le Alofa mo le Aiga i tua atu o le Veli
“Sa fai sa‘u miti i se tasi po lea sa ou vaai ai i le faitau selau o tagata, ae e leai se tasi o i latou e mafai ona talanoa i le tasi ma le isi,” o lana tala lea. “Sa ou manatu ou te iloaina i latou, ae sa ou le mautinoa.”
Sa lei iloa e Linahei po o le a le mea e fai i le miti i le taimi muamua. Ona ia maua lea o se manatu fiafia: “A o lei amata vavao o le KOVITI-19, sa ou faatinoina le silia ma le 100 papatisoga mo o‘u tuaa—o nei tagata i la’u miti e mafai ona fai ma sui o na tagata o le aiga!”
O le lagonaina o le fiafia sili atu e uiga i talafaasolopito o aiga nai lo se isi lava taimi, na faia ai e Linahei mea uma na ia mafaia e fesoasoani ai ia oo atu na igoa i le malumalu ia maua o latou sauniga faaopoopo. E lei leva, ae valaauina Linahei ma lona tina o ni faufautua o talafaasolopito o aiga i le latou uarota.
“Sa ma fesoasoani i se tamaitai o le matou uarota ia maua lana faitotoa o le FamilySearch. Ina ua ia vaai i lona gafa o le aiga, sa matuai fiafia lava o ia—o le taimi muamua lea ua ia vaai ai i ona tuaa uma!”
“Sa masani ona ou lagona le popole i le talanoa atu i tagata o la‘u uarota,” o le tautino mai lea a Linahei. “Ae o lenei la ua i ai lo‘u tina faatasi ma a’u, ua ou lagonaina le faateleina o le to’a i le aoaoina o tagata e uiga i talafaasolopito o aiga.”
Siia’e Lou Leo
Ua tulimatai atu nei Linahei e fesoasoani i tagata e aoao e uiga i o latou tuaa. “Ou te fiafia e vaai i le fiafia o tagata pe a latou faia o latou talafaasolopito o aiga. Ma ou te manatu ua fiafia o tatou tuaa ua tatou fiafia ia i latou ma i le faatinoina o o latou sauniga.”
I lona valaauga o se faufautua o talafaasolopito o aiga, sa ia faatulagaina ai talu ai nei se gaoioiga mo tamaitai talavou o lana uarota. E le gata ina sa ia fesoasoani ia i latou e sue igoa o aiga e ave i le malumalu, ae sa ia fesoasoani foi i tamaiti o le Peraimeri e fatu ni faitotoa ina ia mafai ai ona latou auai.
“E le o toe mamao ona matou o lea i le malumalu,” o lana tala lea.
E te manao ia mataina e pei o Linahei? Aua le popole, e mautinoa lava e mafai. “E mafai e tagata talavou ona faalautele le feau a le Atua e ala i le faaaogaina o tekinolosi,” o le tala lea a Linahei. “Soo se mea e fesoasoani ia i tatou e mafaufau ai i o tatou tuaa e matagofie. Ou te iloa o le faia o talafaasolopito o aiga o le a aumaia ai i tagata uma le olioli sili atu i o latou olaga. O talafaasolopito o aiga ua ou latalata atili ai i o‘u tuaa ma Keriso i le taimi lava e tasi.”
Faatasi ai ma galuega uma o loo ia faia mo ona tuaa, e tasi lava le mea e mautinoa: o le aiga o Linahei e le na o se talafaasolopito!