“Auala e Taulima ai Ituaiga Tofotofoga e Tolu,” Mo le Malosi o le Autalavou, Mat. 2022.

Sau, Mulimuli Mai ia te A’u

Auala e Taulima ai Ituaiga o Tofotofoga e Tolu

Saunia e David Dickson

Mekasini a le Ekalesia

E tele luitau eseese o le olaga, ae o le liliu atu i le Atua o le tali lava lea i taimi uma.

Ona o le matau’a, na faatau atu ai e uso o Iosefa o ia e fai ma pologa ona ta’u atu lea i lo latou tama na aina o ia e manufeai.

Na ono mafai e Iosefa o Aikupito ona fesili atu le tele o ni fesili e uiga i le auala na tutupu ai mea i lona olaga. O le a e suesue e uiga i lona olaga i lenei masina, ae o se aotelega vave lenei o le mea na tupu ia te ia:

Sa faatau atu o ia e ona uso e fai ma pologa.
I le avea ai ma se pologa, sa tuuaia sese o ia i le taumafai e faatosina le avā a lona matai.
Ona avea ai lea o ia ma pagota mo le lua tausaga le umi.

Vaai faalemafaufau i ou lagona pe ana faapea o oe o Iosefa. E le itiiti lava, atonu e faaosoosoina oe e fesili: “Aisea ua tupu ai ia te au?” “O le a se mea na ou faia ua oo ai lenei mea ia te au?”

E ui lava na te lei faia se solitulafono, ae na auina atu Iosefa i le falepuipui mo le lua tausaga le umi.

O Ituaiga Tofotofoga e Tolu

Sa aoao mai e Elder Neal A. Maxwell (1926–2004) o le Korama a Aposetolo e Toasefululua i se tasi taimi e uiga i ituaiga eseese o tofotofoga e tolu atonu tatou te feagai i lenei olaga:

Ituaiga 1: O tofotofoga e oo mai mai a tatou lava agasala po o mea sese.
Ituaiga 2: O tofotofoga e tutupu ona o se lalolagi pa’ū lenei, e tumu i ma‘i, faama’i, ma tagata pau’ū.
Ituaiga 3: O tofotofoga e finagalo le Atua tatou te oo i ai ona e finagalo o Ia ia tatou tuputupu ae.

I le lotolotoi o se tofotofoga, atonu e faaosoosoina i tatou e fesili, “Aisea ua tupu ai ia te au?” Ae o lena fesili atonu e le aoga e pei ona tatou faamoemoe i ai. Na tusia e Elder Maxwell e faapea e tusa lava po o le a le mafuaaga tatou te maua ai le tofotofoga, “o le taunuuga e mautinoa lava o le ala lava lea e tasi; e finagalo le Atua ia tatou oo i lena luitau. Ae ua Ia folafola mai ia i tatou ua lava Lona alofa tunoa mo i tatou.”¹ I se isi faaupuga, e le faatagaina i tatou e le Tama Faalelagi e feagai ma tofotofoga e aunoa ma le tuuina mai ia i tatou o le fesoasoani tatou te manaomia e ala i le Togiola a Iesu Keriso.

Faataitaiga a Iosefa

Sei o tatou vaavaai vave atu i le uluai tofotofoga tele o Iosefa: Na faatau atu o ia e ona uso e fai ma pologa.

Pe o se tofotofoga lenei o le “Ituaiga 1”? Pe na aumaia e Iosefa lenei mea ia te ia lava? Ia, e leai. Sa ia faasoa atu ma le mama ni ana miti faaperofeta se lua e faatatau i ona uso matutua. O na miti na faaalia ai o le a avea o ia ma o latou taitai i se aso. Ioe, sa le fiafia ona uso matutua e faalogo i lena mea. O le mea moni, “ua atili ai ona latou inoino ia te ia ona o ana miti” (Kenese 37:8).

Pe ana e i ai i le tulaga o Iosefa, atonu e te mafaufau ia te oe lava, “Ana iloa a ou te le tauina atu ia i latou au miti!”

Pe o se tofotofoga “Ituaiga 2”? Pe na oo mai tofotofoga o Iosefa mai le ola ai i se lalolagi pa‘ū, lea e aofia ai isi tagata e le lelei le faaaogaina o lo latou faitalia? Atonu. Ou te toe fai atu, semanu e faigofie ia Iosefa ona lulu lona ulu ma mafaufau o faafitauli uma na oo ia te ia e mafua i ona uso. Pe ona o le pepelo o le avā a Potifara. E oo lava i le tautu uaina na galo mo le lua tausaga ona ia ta’u atu ia Farao e uiga ia Iosefa, e ui sa ia folafola atu o le a ia faia (tagai Kenese 40:23).

Pe o nei mea uma sa iu ina avea ma se tofotofoga o le “Ituaiga 3”? I se isi faaupuga, pe na faatagaina ea e le Atua ia Iosefa e oo i nei tofotofoga e fesoasoani ai ia te ia ia tuputupu ae? I lenei fesili, sa lagona e Iosefa lava ia o le tali o se vaega o le ioe. Ina ua ia toe feiloai ma ona uso, sa ia faapea atu, “O lenei, aua nei tiga outou, pe fai ma mea leaga i o outou manatu ina ua outou faatau mai ia te au i le mea nei: aua na auina mai au e le Atua e muamua ia te outou e fai ma faaola” (Kenese 45:5, ua faaopoopo le faamamafa).

Ia, manatua la, sa faatauina atu Iosefa e fai ma pologa i le 17 o ona tausaga. Sa 30 ona tausaga ina ua tu o ia i luma o Farao e faamatalatala ia miti lea o le a iu ina faasaolotoina ai o ia. O lena mea e 13 tausaga, pe toetoe lava o le afa o lona olaga e oo atu i lena taimi, lea na aveesea ai le saolotoga o Iosefa e ala i le leai o sona lava sese. Ae sa ia te ia le faatuatua “na auina mai [o ia] e le Atua” e fai ma faaola. Po o fea lava na oo mai ai le tofotofoga, na iloa lava e Iosefa na i ai se faamoemoega o le Atua.

Na lava lena mo ia. E mafai foi ona lava lena mea mo tatou.

Sa faamagalo e Iosefa ona uso ma faasaoina foi o latou ola i le oge. Sa iloa e Iosefa sa taialaina ma puipuia e le Atua lona ola.

O Ou Tofotofoga

E mafai ona tatou faaaluina le tele o le malosi e nonofo ai i le taimi ua tuanai. Atonu tatou te mafaufau, “Aisea na ou faia ai lena mea?” po o le “Pe ana le olegia a‘u e lena tagata.”

Ae o le tumau ai i le po o le a le mea e tupu pe ana faapea ma atonu ai ana e le toe faia se lelei atu nai lo le tiga i le pogai po o le auala e oo mai ai se tofotofoga i lou olaga. I le iuga, o le filemu ma le malosi e maua e ala i le o mai ia Keriso ma faalagolago ia te Ia, e pei ona sa faia e Iosefa o Aikupito. Afai tatou te faia lenei mea, o o tatou tofotofoga uma e mafai ona avea ma ituaiga o tofotofoga e fesoasoani ia i tatou e latalata atili atu ai i le Atua ma avea atili ai e faapei o Ia.

Na aoao mai Peresitene Henry B. Eyring o le Au Peresitene Sili, “Atonu tou te mafaufau pe aisea ua faataga ai e se Atua alofa ma mamana le faaosoosoina faaletino o i tatou ia matua faigata. Ona ua silafia e Ia e tatau ona tatou tuputupu ae i le mama ma le malosi faaleagaga ia mafai ai ona nonofo i Lona afioaga i ni aiga e faavavau.”²

Taui e Faavavau

Afai ua tatou agasala, e tatau ona tatou salamo. Afai e i ai se tofotofoga i totonu o a tatou taumafaiga e faaleleia ai, e mafai ma e tatau ona tatou faia. Ae o le tele o faigata tatou te feagai i le olaga nei e foliga mai e umi atu ona iai nai lo le mea tatou te mananao i ai—o nisi taimi e mo le olaga atoa. O i foi, o le tali o le liliu atu i le Atua.

O lenei olaga e tatau ona tofotofo ma faamaonia ai i tatou. Ma o le a savavali faatasi le Atua ma i tatou pe afai tatou te saili atu ia te Ia! Na aoao mai Elder Dale G. Renlund o le Korama a Aposetolo e Toasefululua, “O le a tauia lou faatuatua i le Tama Faalelagi ma Iesu Keriso e sili atu nai lo se mea e mafai ona e mafaufauina. O tulaga faapito’au uma—aemaise o le faapito’au faaosolilivau—o le a faapaiaina mo lou manuia.”³

Pe sa “talafeagai” ea le oo o Iosefa i le mea sa oo i ai o ia? Leai. Ae ona sa ia faia mea sa ia faia, sa mafai ai ona ia faasaoina ola o malo, e aofia ai lona lava aiga.

Atonu o loo e i ai i le ogatotonu o ou lava tofotofoga e pei o Iosefa. Atonu e te le o malamalama i le mafuaaga. Po o le iuga.

Tau lava o le manatua, ua lava le alofa tunoa o le Atua. Liliu atu ia te Ia, ma o le a Ia galueaiina mea ofoofogia i lou olaga.