O le Autu ma A’u

Ua faasoa mai e le autalavou auala o loo latou ola ai i upu o Autu a Tamaitai Talavou ma le Korama a le Perisitua Arona

O Le Mana o le Perisitua i le Faama‘i Pipisi

“O le a ou alofa i le Atua … ma faaaoga Lana perisitua e auauna atu ai i isi, e amata i lo‘u lava aiga.”

Saunia e Cole Collins

Atapue mai le Getty Images

Ina ua amata ona tatou faia lotu i le fale ona o le faama‘i pipisi o le KOVITI-19, sa ou fesoasoani e tuuina atu le faamanatuga i lo’u aiga. Sa manaia le mafai ona faia o lenei mea i lo‘u lava fale, ma na ou iloa ai lo’u lotofaafetai tele mo le faamanatuga. Ou te faafetai ona sa mafai ona ou ola i lenei taimi o le i ai o se lotu i le fale.

Sa manaomia e se tasi o o matou tuaoi se tasi e avatua le faamanatuga ia te ia. Sa leai se tasi i lona fale e mafai ona saunia pe faamanuia le faamanatuga ona na maliu lona toalua i ni nai tausaga ua mavae. Sa faaeteete foi o ia i tagata asiasi ona o le faama‘i pipisi. O ma’ua ma lo’u tama o ona tuagane o auaunaga, o lea na ma ofo ai e tuuina atu ia te ia le faamanatuga a o faia ufi fofoga ma faia isi puipuiga mo lona saogalemu.

Sa matuai faafetai lava o ia ona sa mafai ona ma o atu. Sa ou lagona ai sina faanoanoa ona sa tuuatoatasi o ia, ona sa na o ia lava i lona fale i le taimi o le faama‘i pipisi. Ae sa ou faafetai foi ona sa mafai ona ou ofoina atu ia te ia se mea e sili ona taua e faafiafia ai o ia. Sa manaia le mafai ona auauna atu ia te ia. Sa ou maua ai le fiafia ona sa mafai ona ma o ma lo‘u tama ma auauna atu i lo ma tuaoi.

Ou te faafetai i le i ai o le perisitua aua e manuia ai e le gata o au ae faapea foi isi tagata. E fesoasoani ou te avea ai ma se tagata e sili atu ona lelei ma fesoasoani ou te vaai ai pe mafai faapefea ona ou auauna atu i isi. O le tufaina o le faamanatuga i lo‘u aiga ma lo’u tuaoi na pupula ai o‘u mata. E tatau ona ou faaaogaina le avanoa e tufa atu ai le faamanatuga ma auauna atu i tagata e le mafai ona faia mo i latou lava. Ou te faafetai na mafai ona ou faaaogaina le perisitua e faamanuia ai isi tagata ma lo’u aiga.

E alala le tusitala i Iuta, ISA.