O le Autu ma A’u

Ua faasoa mai e le autalavou auala o loo latou ola ai i upu o Autu a Tamaitai Talavou ma le Korama a le Perisitua Arona

E Mafai e le Agaga ona Fesoasoani Ia Ou Iloa le Auala e Auauna Atu Ai

Saunia e Alicia Tjahyono

“I le avea ai ma se so’o o Iesu Keriso, ou te taumafai ina ia avea e faapei o Ia. Ou te saili atu ma faatino e tusa ma faaaliga faaletagata lava ia ma auauna atu i isi i Lona suafa paia.”

I le taimi o le faama‘i pipisi o le KOVITI-19, e toatele tagata na itiiti ni tupe maua pe na leai foi ni a latou galuega. Sa ou manao e faamāmā sina vaega itiiti o la latou avega. Faatasi ai ma le lagolago mai a lo‘u tina ma lo’u tama, ma le faaaogaina o a‘u lava tupe, sa amata ai ona ou tuuina atu meaai ia i latou sa manaomia le fesoasoani. Sa masani ona ou faia lenei mea e ala i le okaina o meaai mo isi e ala i se polokalama kiliva meaai i uila. O nisi taimi sa ou avatu ai meaai i nofoaga na atofaina mo i latou o loo tauivi.

I Initonesia e tele avetaavale taavale laupasese uila afi. Matou te faaaogaina se polokalama i luga o a matou telefoni e faatonu ai a latou auaunaga. I le taimi o le faama‘i pipisi, sa faigata i avetaavale ona maua ni oka.

I se tasi aso, sa ou mulimuli ai i se uunaiga mai le Agaga e fesoasoani i se avetaavale. Sa ou okaina ni meaai mai le polokalama taavale la‘u pasese uila. Ae ina ua ia taunuu atu i le faleaiga e piki meaai, sa ou auina atu ia te ia se feau tusitusia, ma tau atu ia te ia o le meaai e mo ia lava. Sa faateia o ia ma sa le talitonu sa mo ia. Ina ua ou fai atu sa mo ia, sa vave ona ia faafetai mai ia te au ma tatalo mo au. Sa ia fai mai o le a ia aveina le meaai i le fale ma tuuina atu mo lona atalii/afafine. Sa [ou] logonaina lona matuai fiafia lava. O lenei mea na ou lagona ai foi le fiafia tele!

E ui lava sa matou feagai foi ma lou aiga ma nisi o luitau, sa ou faalogo i le Agaga ma filifili e auauna atu. Sa mafai ona matou lagonaina le olioli ma le fiafia, lea na fesoasoani ia i matou e faatoilalo ai o matou luitau.

Ou te matua faafetai lava mo le Agaga Paia. O lenei aafiaga ua faamanatu mai ai ia te au se mau mai le Feagaiga Fou, Ioane 13:34:: “O le poloaiga fou ou te tuu atu ai ia te outou, ia outou fealofani; faapei ona ou alofa atu ia te outou, ia fealofani foi outou.” Ou te iloa a tatou mulimuli i le Agaga, o le a tatou maua faamanuiaga ofoofogia mai le Tama Faalelagi.

E alala le tusitala i Java Sisifo, Initonesia.