« E toru rāve’a nō te fa’aiti i te mārōra’a i roto i tō ’outou ’utuāfare », Nō te Pūai o te Feiā ‘Āpī, Māti 2022.
Tauturu i te orara’a
E toru rāve’a nō te fa’aiti i te mārōra’a i roto i tō ’outou ’utuāfare
Tē tātama’i ra ānei tō ’outou ’utuāfare i te tahi taime ? ’Aita ’outou i vai ’ōtahi noa.
Fa’ahōho’ara’a nā Alyssa M. Gonzalez
-
« ’Aita i tano ! ’O vau i teienei ! »
-
« Hei, ’aita ’oe i ani i te parau fa’ati’a ’ia rave i te reira ! »
-
« Pāpā ! ’Ua fa’atoro Anita i tōna arero i ni’a iā’u ! »
Mai te mea ’ua mātau ’outou i teie mau parau, e riro noa ’outou ’ei tuha’a nō te hō’ē ’utuāfare. ’Aita e ’utuāfare e pāruruhia i teie mau pe’ape’a ri’i. I te hō’ē taime ’ua fa’a’ite mai ’o Elder David A. Bednar nō te Pupu nō te Tino ’Ahuru Ma Piti ’āpōsetolo ē, ’ua amuamu tāna mau tamari’i ē, « māmā, tē huti ra ’ōna i tō’u mata’i ! »1
E mea mātarohia ’ia tupu mai te mārōra’a i roto i te hō’ē ’utuāfare. ’Oia mau, tē rohi pūai nei te hō’ē ta’ata nō te fa’atupu i te reira. ’Ua ha’api’i pāpū mai te Fa’aora ē, « O tei roto iāna te vārua mārō ra, e ’ere ’oia i tā’u, nō te diabolo rā, ’o te metua ’oia nō te mārō, ’e ’ua fa’aitoito ’oia i te ’ā’au nō te ta’ata e mārō ai te tahi i te tahi ma te riri » (3 Nephi 11:29).
’Eiaha rā e mata’u ! Tē ha’api’i mai nei te ’evanelia ia tātou ē, e rave rahi te mau mea e nehenehe ia tātou ’ia rave nō te fa’aiti i te mārōra’a i roto i tō tātou ’utuāfare—e ’ia fāri’i i te ’oa’oa rahi !
Rāve’a 1 : Tāmarū i ’ā’au
E tītauhia te mori ’ārahu nō te fa’aura i te auahi. Hō’ē ā te mārōra’a. ’E ’aita e mea e fa’ananea i te hō’ē ’aimārōra’a maori rā te tātama’ira’a. Nō reira, e aha tā ’outou e nehenehe e rave mai te mea e ha’amata te hō’ē ta’ata i te tātama’i ’e ’outou ?
’Oia mau, e nehenehe ’outou e pāto’i ’ia tātama’i. ’O te Fa’aora tō tātou hi’ora’a pāpū mau nō te reira. I te roara’a o Tāna tau tāvinira’a, ’ua ririhia ’Oia, ’ua rave-’ino-hia, ’ua ho’ohia, ’e ’ua fa’atātaurohia i te pae hope’a. Terā rā, noa atu e mea pūai ’e te ’āfaro tāna mau pāhonora’a, ’aita roa atu te vārua mārō i vai i roto iāna. ’E i te pae hope’a ’aita ’Oia i ’aro atu, noa atu ē, ’ua ti’a iāna ’ia pi’i « e nāna (te Metua) e hōro’a mai i te melahi ’e ’ia ’ahuru noa atu te legeona ’e ’ia piti ti’ahapa ’e ’ia rahi atu ā » nō te tauturu Iāna (Mataio 26:53). ’Are’a ’ua pure ’Oia nō Tōna mau ’enemi, noa atu ’ua fa’atārerehia ’Oia i ni’a i te tātauro (hi’o Luka 23:34).
Te pāto’ira’a ’ia mārō, e fa’ariro te reira ia ’outou ’ei ta’ata fa’aro’o maita’i a’e. ’E ’ia fa’aro’o maita’i ana’e tātou, e nehenehe tātou e parauparau maita’i a’e ’e e riro mai ’ei ta’ata fa’atupu i te hau. Te pāto’ira’a ’ia mārō, o te pāhonora’a ïa ma te reo hau ’e te ’imira’a i te mau rāve’a ato’a nō te arai i tō tātou mau mana’o.
’Aita ana’e e tu’uhia te mori ’ārahu, e ’ore te rahira’a o te mau tātama’ira’a ’e te mārōra’a. Mai tā te mau pāpa’ira’a mo’a e ha’api’i nei, « o te parau marū ra tei fa’a’ore i te riri » (Maseli 15:1).
Rāve’a 2 : Fa’a’ite i te here
Te fa’a’itera’a i te here i te mau melo o tō ’outou ’utuāfare ’o te hō’ē ïa o te mau rāve’a maita’i roa a’e nō te fa’aātea i te tātama’i i rāpae’au i te fare. E nehenehe te reira e tāpe’a i te mārōra’a ’ia tupu mai nā mua roa !
Terā rā, noa atu e tomo mai te mārōra’a maoti tā tātou tāmatara’a ’ia pāruru, e nehenehe ā te here ’e te maita’i e taui i te mau mea ato’a.
’A ha’amana’o na i te ’ā’amu o te Bibilia nō te vahine tei ro’ahia i te fa’aturi. ’Ia au i te ture a Mose, tītauhia ’ia pēhihia ’oia i te ’ōfa’i. ’Ua fa’aue te mau ta’ata i riri ’ia fa’ahapa Iesu iāna.
E aha rā te pāhonora’a a te Fa’aora ? ’A tahi roa, ’aita ’oia i pāhono ’oi’oi i tā rātou mau tītaura’a. ’Ua tūturi ’oia i raro ’e ’ua pāpa’i ihora i ni’a i te repo mā’a taime iti hou ’a parau atu ai. (Mana’o tauturu : i te tahi taime e mea maita’i a’e ’eiaha e pāhono i terā iho taime ’a pūai noa ai te mau mana’o riri.)
I muri iho, ’ua fa’a’ite ’Oia i te here ’e te aroha i te vahine ’a parau ai ’Oia i te naho’a ta’ata ē, « Nā te ta’ata hara ’ore i roto ia ’outou na e tāora atu na i te ’ōfa’i mātamua iāna » (Ioane 8:7).
’Ua rave Iesu i te vahine ma te here, ’eiaha rā ma te fa’autu’a. ’Ua fa’a’ite ’oia i tōna hina’aro ’ia fa’a’ore i tāna hapa ’a ani ai ’oia iāna ’ia « haere ’eiaha rā ’ia hara fa’ahou » (Ioane 8:11).
’A parau i te mau melo o tō ’outou ’utuāfare ē, ’ua here ’outou ia rātou. ’A fa’a’ite i taua here ra nā roto i te fa’a’orera’a i tā rātou hapa ’e te fa’ati’ara’a ia rātou ’ia taui—noa atu ā tē riri ra rātou ia ’outou. Nā te here e fa’atupu i te tauira’a.
Rāve’a 3 : Pure
E fa’atae mai te pure i te mau ha’amaita’ira’a a te Atua i roto i tō tātou orara’a. I roto i te Buka a Moromona, ’ua ha’api’i Amuleka ē, « ’Ia nīni’i atu ’outou i tō ’outou vārua i roto i tō ’outou piha, ’e i roto i tō ’outou vāhi mo’emo’e, ’e i roto i tō ’outou medebara e ti’a ai.
« ’oia ïa, […] ’ia ’ī tō ’outou ’ā’au i te pure tu’utu’u ’ore iāna ’ia maita’i ’outou, ’e ’ia maita’i ato’a rātou tei pīha’i iho ia ’outou » (Alama 34:26–27).
E mea pāpū roa ē, « rātou tei pīha’i iho ia ’outou » tō ’outou ato’a ïa ’utuāfare—tae noa atu i te feiā ’aita e ora nei i pīha’i iho ia ’outou i teienei. Nō reira, ’a pure ’e tō ’outou ’utuāfare. E pure nō tō ’outou ’utuāfare. ’A pure ’ia vai noa tō ’outou hau mai te peu e fa’a’ino’ino te hō’ē ta’ata ia ’outou. ’A pure ’ia ’ite ’outou nāhea ’ia pāhono i te mau tupura’a fifi e tupu mai i roto i tō ’outou ’utuāfare. ’A pure ’ia roa’a te tauturu o te ra’i. ’A pure ’ia rahi atu ā te ’ata’ata ’e te here ’ia tomo mai i roto i tō ’outou ’utuāfare. I muri iho, ’a ’imi i te mau rāve’a ato’a nō te fa’atupu i te reira.
’A tūtava ai ’outou i te ora hope roa i te ’evanelia a Iesu Mesia, e ’ite ’outou ē, e ha’amaita’i-ato’a-hia tō ’outou ’utuāfare. E iti mai te mārōra’a, ’e e rahi atu ā tō ’outou ’oa’oa.