« Nāhea i te fa’aruru e toru huru tāmatara’a », Nō te Pūai o te Feiā ’Āpī, Māti 2022.

Mai, pe’e mai

Nāhea i te fa’aruru e toru huru tāmatara’a

Nā David Dickson

Mau ve’a a te ’Ēkālesia

’Ua rau te mau tāmatara’a o te orara’a, terā rā, ’ua riro te fāriura’a i te Atua ra, ’ei pāhonora’a i te mau taime ato’a.

Nō tō rātou ’ino’ino, ’ua ho’o te mau taea’e o Iosepha iāna ’ei tītī ’e ’ua parau iho ra i tō rātou metua tāne ē, ’ua ’amu-pohe-hia ’oia e te mau ’ānimala taehae.

’Ua uiui paha ’o Iosepha nō ’Aiphiti e rave rahi uira’a nō ni’a i te huru o te tupura’a o tōna orara’a. E tuatāpapa ’oe i tōna orara’a i teie ’āva’e, teie rā te tahi ha’apotora’a o te ’ohipa i tupu i ni’a iāna :

’Ua ho’o tōna mau taea’e iāna ’ei tītī.
’Ei tītī, ’ua fa’ahapa-hape-hia ’oia i te fa’ahina’arora’a i te vahine a tōna Fatu.
’Ua riro mai ïa ’oia ’ei mau ’āuri nō te roara’a e piti matahiti i te maoro.

’Āhani o ’oe o Iosepha, e aha ïa tō ’oe mana’o. E ō mai paha te mana’o ē : « Nō te aha vau ? » « E aha tā’u i rave nō te fāri’i i te reira ? »

Noa atu ’aita ’oia i rave i te ’ohipa hape, ’ua hōpoihia ’oia i roto i te fare ’āuri nō te roara’a e piti matahiti i te maoro.

E toru huru tāmatara’a

I te hō’ē taime ’ua ha’api’i ’o Elder Neal A. Maxwell (1926–2004) nō te Pupu nō te Tino ’Ahuru Ma Piti ’āpōsetolo nō ni’a i nā huru tāmatara’a ta’a ’ē e toru tā tātou e fārerei i roto i teie orara’a :

Huru 1 : Te mau tāmatara’a e tae mai nā roto i tā tātou iho mau hara ’e ’aore rā mau hape.
Huru 2 : Te mau tāmatara’a e tupu nō te mea e ao hi’a teie, tei ’ī i te paruparu ’e te ma’i, ’e te mau ta’ata e hi’a nei.
Huru 3 : Te mau tāmatara’a tā te Atua e hina’aro ’ia ’ite tātou nō te mea ïa tē hina’aro nei ’oia ’ia tupu tātou i te rahi.

I rōto i te hō’ē tāmatara’a, e ui paha tātou ē, « Nō te aha vau ? » E ’ere paha te reira uira’a i te mea faufa’a roa mai tā tātou e ti’aturi nei. ’Ua pāpa’i o Elder Maxwell ē, noa atu ā te tumu tātou e fāri’i ai i te tāmatara’a, « hō’ē ā huru te hope’ara’a ; ’Ua hina’aro te Atua ’ia fa’aruru tātou i taua tāmatara’a ra. Terā rā, ’ua fafau mai ’oia ia tātou ē, ’ua nava’i tōna maita’i nō tātou ».¹ Tōna aura’a, e’ita te Metua i te ao ra e fa’ati’a ia tātou ’ia haere nā roto i te mau tāmatara’a ma te ’ore e hōro’a mai ia tātou i te tauturu e hina’arohia e tātou nā roto i te tāra’ehara a Iesu Mesia.

Te hi’ora’a maita’i o Iosepha

E rave na tātou i te tahi atu hi’ora’a ’ōhie i te tāmatara’a rahi mātāmua a Iosepha : ’Ua ho’o tōna mau taea’e iāna ’ei tītī.

E « huru 1 » ānei teie tāmatara’a ? Nā Iosepha ānei i fa’atae mai i te reira i ni’a iāna iho ? ’Aita ïa. Ma te mana’o ’ino ’ore ’ua fa’a’ite ’oia i te tahi o tāna mau moemoeā tohu i tōna mau tua’ana. ’Ua fa’a’ite mai taua mau moemoeā ra ē, e riro mai ’oia ’ei ti’a fa’atere nō rātou i te hō’ē mahana. ’Oia mau, ’aita tōna mau tua’ana i au i te fa’aro’ora’a i te reira. Te mea pāpū, « Rahi atu rā tō rātou riri iāna i te moemoeā nāna » (Genese 37:8).

’Āhiri ’outou o Iosepha, e feruri paha ’outou ē, « ’Āhiri iho ā pa’i ’aita vau i parau atu ia rātou i tā’u mau moemoeā ! »

’Aore rā, e ’ere ānei i te hō’ē tāmatara’a « huru 2 » ? ’Ua tae mai ānei te tāmatara’a a Iosepha nā roto i te orara’a i roto i te hō’ē ao hi’a, nō te fa’a’ohipa-ti’a-’ore-ra’a te ta’ata i tō rātou ti’amāra’a ? Penei a’e paha. Teie fa’ahou ā, e mea ’ōhie nō Iosepha ’ia tā’iri’iri i tōna upo’o ’e ’ia feruri ē o tōna mau taea’e te tumu o tōna mau fifi. ’E ’aore rā, i tō te vahine a Potiphara ha’avarera’a. ’E ’aore rā i tō te rave vine rahi a Phara’o ha’amo’era’a i nā matahiti e piti i te parau ia Phara’o nō Iosepha, noa atu tāna fafau ē, e nā reira ’oia (hi’o Genese 40:23).

’E ’aore rā i te pae hope’a e tāmatara’a « huru 3 » ānei teie ? Te aura’a, ’ua fa’ati’a ānei te Atua ia Iosepha ’ia fari’i i teie mau ’ite nō te tauturu iāna ’ia tupu i te rahi ? ’I ni’a i teie uira’a, ’ua mana’o Iosepha iho ē, ’o te reira ri’i te pāhonora’a. I te fārerei-fa’ahou-ra’a ’oia i tōna mau taea’e, ’ua nā ’ō ’oia : « e tenā na, ’eiaha e oto, ’eiaha ho’i e riri ia ’outou iho, ’o ’outou i ho’o mai iā’u i’ō nei : na te Atua ho’i i tono mai iā’u nā mua ’ia ora te ta’ata » (Genese 45:5, reta tei fa’ahuru-’ē-hia).

I teienei, ’a ha’amana’o na, ’ua ho’ohia Iosepha ’ei tītī i te 17ra’a o tōna matahiti. E 30 matahiti tōna ’a ti’a ai ’oia i mua ia Phara’o nō te tātara i te mau moemoeā ’o tē fa’ati’amā iāna i te pae hope’a. 13 ïa matahiti, fātata te ’āfara’a o tōna orara’a i terā taime, i tō Iosepha ’erera’a i tōna ti’amāra’a nā roto i te hapa a vetahi ’ē. Terā rā, e fa’aro’o tōna i te mea ho’i ē, « na te Atua ho’i i tono [iāna] » nō te fa’aherehere i te ora. ’Aita e faufa’a ’ia ’ite nō hea mai te tāmatara’a, tā Iosepha noa i ’ite, e ’ōpuara’a tā te Atua.

’Ua nava’i te reira nōna. E nava’i ato’a te reira nō tātou.

’Ua fa’a’ore Iosepha i te hapa a tōna mau taea’e ’e ’ua tae roa i te fa’aora ia rātou i roto i te tau o’e. ’Ua ’ite Iosepha ē, ’ua arata’i ’e ’ua pāruru te Atua i tōna ora.

Tō ’outou mau tāmatara’a

E ha’amau’a tātou i te rahira’a o tō tātou pūai i te pārahira’a i roto i te tau i ma’iri. ’E mana’o paha tātou ē, « Nō te aha vau i rave ai i te reira ? » ’e ’aore rā « ’Āhiri ’aita vau i rāmāhia ».

Terā rā, e’ita te fa’aea-noa-ra’a i ni’a i te mau ’āhani ’e te mau mea e riro e ha’amaita’i ri’i noa a’e i te māuiui ’ia vai noa i ni’a i te nō te aha ’e ’aore rā nāhea te tāmatara’a i tae mai ai i roto i tō ’outou orara’a. I te pae hope’a, e ’itehia te hau ’e te pūai nā roto i te haerera’a mai i te Mesia ra ’e te ti’aturira’a iāna, mai tā Iosepha nō ’Aiphiti i rave. ’Ia nā reira tātou, e nehenehe tō tātou mau tāmatara’a ato’a e riro ’ei mau tāmatara’a ’o te tauturu ia tātou ’ia ha’afātata atu ā i te Atua ’e ’ia riro hau atu mai iāna ra.

’Ua ha’api’i te peresideni Henry B. Eyring nō te Peresidenira’a Mātāmua ē : « E ui paha ’outou ē, nō te aha te hō’ē Atua here ’e te pūai hope e fa’ati’a ai i tō tātou tāmatara’a tāhuti ’ia riro ’ei mea pa’ari mau. Te tumu nō te mea ’ua ’ite ’oia ē, e ti’a ia tātou ’ia tupu i te rahi i roto i te mā pae vārua ’e te tura maita’i ’ia ti’a ia tātou ’ia ora i pīha’i iho iāna ’ei ’utuāfare e a muri noa atu ».²

Te mau utu’a mure ’ore

Mai te mea, ’ua hara tātou, mea ti’a ia tātou ’ia tātarahapa. Mai te mea e riro te hō’ē tāmatara’a ’ei rāve’a nō te ha’amaita’i ia tātou, e nehenehe ’e e mea ti’a roa ia tātou ’ia fāri’i i te reira. Terā rā, e au ē, te mau fifi e rave rahi tā tātou e fa’aruru nei i te tāhuti nei e riro i te fa’a’ati maoro noa ia tātou—i te tahi taime nō te tā’āto’ara’a o te orara’a. I’ō nei ato’a, te pāhonora’a ’o te fāriura’a ïa i te Atua ra.

’Ua fa’ata’ahia teie orara’a nō te fa’a’āfarofaro ’e nō te tāmata ia tātou. ’E e haere te Atua nā pīha’i iho ia tātou mai te peu e ’imi tātou iāna ! ’Ua ha’api’i mai o ’Elder Dale G. Renlund nō te pupu nō te Tino ’Ahuru Ma Piti ’āpōsetolo ē, « E fa’autu’a-maita’i-hia tō ’outou fa’aro’o i te Metua i te ao ra ’e ia Iesu Mesia hau atu i tā ’outou e nehenehe e feruri. Te mau mea tano ’ore ato’a—terā iho ā rā tei fa’atupu i te riri—e ha’amo’ahia ïa ’ei maita’i nō ’outou. »³

’Ua « tano » ānei tā Iosepha fa’a’oroma’ira’a mai tāna i rave a’e nei ? ’Aita. Nō te mea rā ē, ’ua nā roto ’oia i teie mau mea, ’ua ti’a iāna ’ia fa’aora i te mau nūna’a, tae noa atu i tōna iho ’utuāfare.

Tei rōtopū paha ’outou i tō ’outou iho mau tāmatara’a mai tō Iosepha. ’Aita paha ’outou e ’ite ra i te faufa’a. ’E ’aore rā i te hope’ara’a.

’A ha’amana’o noa ē, ’ua nava’i noa te maita’i o te Atua. ’A fāriu atu iāna ra, ’e e fa’atupu ’oia i te ’ohipa maere i roto i tō ’outou orara’a.