Te tumu parau ’e ’o vau

Tē fa’ati’a nei te feiā ’āpī e mea nāhea rātou ’ia ora i te mau parau o te parau tai’o a te Feiā ’Āpī Tamāhine ’e a te Autahu’ara’a a Aarona

E nehenehe te Vārua e tauturu mai iā’u ’ia ’ite nāhea ’ia tāvini

Nā Alicia Tjahyono

« ’Ei pipi nā Iesu Mesia, tē tūtava nei au ’ia riro mai iāna ra te huru. Tē ’imi nei au ’e tē rave nei au mai te au i te heheura’a e tae mai iā’u nei ’e tē aupuru nei au ia vetahi ’ē i tōna i’oa mo’a. »

I roto i te pararera’a ma’i pe’e COVID-19, e rave rahi ta’ata ’ua iti mai tō rātou ’āpī, ’aore rā ’ua ’ere roa i tā rātou ’ohipa. ’Ua hina’aro vau e fa’a’ōhie ri’i i tā rātou hōpoi’a. Pāturuhia e tō’u māmā ’e tō’u pāpā, ’e i tā’u iho moni, ’ua ha’amata vau i te hōro’a i te mā’a nā te feiā nava’i ’ore. ’Ua rave au i te reira nā roto i te poro’ira’a i te mā’a nā vetahi ’ē maoti te hō’ē mauha’a putu parau uira (app) nō te pere’o’o uta ta’ata. I te tahi taime e vaiiho vau i te mā’a i te mau vāhi tei fa’ata’ahia nō te feiā e fifi ra.

I ’Īnitōnētia e rave rahi feiā fa’ahoro mōtō uta ta’ata. E fa’a’ohipa mātou i te hō’ē mauha’a putu parau uira i ni’a i tā mātou niuniu nō te poro’i ia rātou. I roto i te pararera’a ma’i pe’e, tē fifi ra te mau ta’ata fa’ahoro pere’o’o i poro’ihia.

I te hō’ē mahana, ’ua pe’e au i te muhumuhu a te Vārua nō te tauturu i te hō’ē ta’ata fa’ahoro. ’Ua poro’i au i te mā’a nā ni’a i te mauha’a putu parau uira nō te pere’o’o uta ta’ata. I tōna rā taera’a atu i te fare tāmā’ara’a nō te ’ohi i te mā’a, ’ua hāpono atu vau iāna i te hō’ē parau, ma te fa’a’ite atu iāna ē nāna iho ā terā mā’a. ’Ua māere roa ’oia ’e ’aita ’oia i ti’aturi ē nāna te reira mā’a. I tō’u paraura’a ē nāna te reira, ’ua ha’amāuruuru ’oi’oi mai ’oia iā’u ’e ’ua pure nō’u. ’Ua parau ’oia ē e ’āfa’i ’oia i te mā’a i te fare nō tāna tamari’i. Iā’u i fa’aro’o iāna, ’ua ’oa’oa roa ’oia. ’Ua ’oa’oa ato’a ra vau !

Noa atu ā tē fa’aruru ato’a ra tō’u ’utuāfare i te tahi mau tāmatara’a, ’ua fa’aro’o vau i te Vārua ’e ’ua mā’iti au e tāvini. ’Ua ti’a ia mātou ’ia ’ite i te ’oa’oa ’e te poupou, tei tauturu ia mātou ’ia upo’oti’a i ni’a i tō mātou mau tāmatara’a.

’Ua māuruuru rahi au nō te Vārua Maita’i. Tē fa’aha’amana’o nei teie ’ohipa iā’u i te hō’ē pāpa’ira’a mo’a i roto i te Faufa’a ’Āpī Ioane 13:34 : « E tu’u atu vau i te parau ’āpī nā ’outou, e aroha ’outou ia ’outou iho, mai iā’u e aroha atu ia ’outou na, e aroha ato’a ho’i ’outou ia ’outou iho ». ’Ua ’ite au ē ’ia pe’e ana’e tātou i te Vārua, e fāri’i tātou i te mau ha’amaita’ira’a fa’ahiahia nō ’ō mai i te Metua i te Ao ra.

Tē ora ra te ta’ata pāpa’i i te pae tō’o’a o te rā nō Java, ’Īnitōnētia.