« Nāhea ’outou ’ia fa’aro’o iāna ? », Nō te Pūai o te Feiā ’Āpī, Māti 2022.
Parau hope’a
Nāhea ’outou ’ia fa’aro’o iāna ?
Nō roto mai i te hō’ē a’ora’a nō te ’āmuira’a rahi nō ’Ēperēra 2020.
Fa’ahōho’ara’a nā Oksana Grivina
’A ta’a noa atu i te arata’ira’a hau ’o tā tātou e fāri’i nei nā roto mai i te Vārua Maita’i, i terā ’e terā taime, e ha’apāpū pūai mai te Atua ia tātou tāta’itahi ē, ’ua ’ite ’oia ia tātou ’e ’ua here ’oia ia tātou. Nō reira, i roto i tō tātou mau taime fifi, e fa’aho’i mai te Fa’aora i teie mau ’itera’a i roto i tō tātou ferurira’a.
’A feruri i tō ’outou iho orara’a. E nehenehe teie mau ’ohipa e tupu i te mau taime rahi o tō tātou orara’a ’aore rā i roto i te hō’ē ’ohipa mai te reira noa i te ha’amatara’a. E tae mai teie mau taime faufa’a rahi i te pae vārua i te mau taime ta’a ’ē ’e ma te rāve’a ta’a ’ē, ’e te mea ta’a ’ē nō tātou tāta’itahi.
’Ua fa’ata’a mai ’o Iosepha Semita ē, i te tahi taime e fāri’i tātou « i te mau mana’o ’ia haere mai » ’e i te tahi taime, e māramarama mau ’ia tahe ».1
Nō te pāhono i te hō’ē ta’ata ’ā’au tae mau tei parau ē, ’aita a’e nei ’oia i fāri’i i te hō’ē ’itera’a mai te reira, ’ua a’o mai te peresideni Dallin H. Oaks, « ’ua pāhonohia paha tā ’outou mau pure, fa’ahou ’e fa’ahou ā, terā rā, ’ua ha’amau ’outou i tā ’outou mau tīa’ira’a i ni’a i te hō’ē tāpa’o rahi ’aore rā, hō’ē reo pūai, i feruri ai ’outou ē, ’aita ’outou i fāri’i i te hō’ē pāhonora’a ».2
’Aita i maoro a’e nei, ’ua fa’aro’o tātou i te peresideni Russell M. Nelson i te paraura’a ē : « Tē ani nei au ia ’outou ’ia feruri hōhonu ’e te pinepine i ni’a i teie uira’a : Nāhea ’outou ’ia fa’aro’o iāna ? Tē ani ato’a nei au ia ’outou ’ia pe’e i te mau ta’ahira’a nō te fa’aro’o iāna ma te maita’i a’e ’e te pinepine a’e ».3