« Te mana nō te autahuara’a i roto i te pararera’a ma’i pe’e », Nō te Pūai o te Feiā ’Āpī, Māti 2022.
Te parau tai’o ’e ’o vau
Tē fa’ati’a nei te feiā ’āpī e mea nāhea rātou ’ia ora i te mau parau o te parau tai’o a te Feiā ’Āpī Tamāhine ’e a te Autahu’ara’a a Aarona
Te mana nō te autahuara’a i roto i te pararera’a ma’i pe’e
« E here au i te Atua… ’e e fa’a’ohipa vau i tāna autahu’ara’a nō te tāvini ia vetahi ’ē, ma te ha’amata i roto i tō’u iho ’utuāfare ».
Hōho’a nā Getty Images
I tō mātou ha’amatara’a i te rave i te purera’a i te fare nō te pararera’a ma’i pe’e COVID-19, ’ua tauturu vau i te ’ōpere i te ’ōro’a mo’a i tō’u ’utuāfare. E mea au roa ’ia rave i te reira i te fare iho, ’ua fa’atupu te reira i tō’u māuruuru rahi nō te ’ōro’a mo’a. Tē māuruuru nei au i te mea ē ’ua ti’a iā’u ’ia ora i roto i teie tau nō te ravera’a i te purera’a i te fare.
’Ua hina’aro te hō’ē o tō mātou ta’ata tupu i te hō’ē ta’ata nō te ’āfa’i i te ’ōro’a mo’a nāna. ’Aita e ta’ata i tōna fare e nehenehe e fa’aineine ’aore rā e ha’amaita’i i te ’ōro’a mo’a nō te mea ’ua pohe tāna tāne fa’aipoipo tau matahiti i ma’iri a’e nei. Tē hi’o maita’i ato’a ra ’oia i te feiā e haere i tōna fare, nō te pararera’a o te ma’i pe’e. ’O māua tō’u pāpā tōna nā taea’e aupuru, nō reira ’ua parau atu māua ē nā māua e hōro’a i tāna ’ōro’a ma te ’ō’omo i te pāruru vaha ’e ma te rave i te tahi atu mau fa’anahora’a nō tōna pārurura’a.
’Ua māuruuru rahi ’oia e nehenehe tā māua e haere. ’Ua ’oto ri’i au i te mea ē tē vai ’ōtahi noa ra ’oia, ’o ’oia ana’e i tōna fare i roto i te pararera’a o te ma’i pe’e. ’Ua māuruuru ato’a rā vau i te mea ē ’ua nehenehe tā’u e pūpū iāna i te hō’ē mea faufa’a roa nō te fa’a’oa’oa iāna. E mea au roa ’ia tāvini iāna. ’Ua oa’oa vau i te mea ē ’ua ti’a ia māua tō’u pāpā ’ia haere e tāvini i tō māua ta’ata tupu.
’Ua māuruuru vau i te fāri’ira’a i te autahu’ara’a nō te mea e ’ere ’o vau ana’e tē fāna’o nei, ’o te tahi ato’a rā mau ta’ata. Tē tauturu nei te reira iā’u ’ia riro ’ei ta’ata maita’i a’e ’e ’ia ’ite nāhea vau e tāvini ai ia vetahi ’ē. Nā te ’ōperera’a i te ’ōro’a mo’a i roto i tō’u fare ’e i tō’u ta’ata tupu i fa’a’ara’ara i tō’u mata. Tītauhia iā’u ’ia ha’afaufa’a i te taime fāna’o nō te ’ōperera’a i te ’ōro’a mo’a ’e nō te tāvinira’a i te ta’ata e’ita e nehenehe e rave i te reira nō rātou iho. ’Ua māuruuru vau e nehenehe tā’u e fa’a’ohipa i te autahu’ara’a nō te ha’amaita’i i te tahi atu mau ta’ata ’e tō’u ’utuāfare.
Tē ora nei te ta’ata pāpa’i i Utah, i te Fenua Marite.