« E aha tē ti’a iā’u ’ia rave mai te mea ē, tē mana’o ra vau ē, ’aita tā’u mau tauto’ora’a nō te fa’a’ite i te ’evanelia e fa’atupu ra i te hō’ē mea ta’a ’ē ? », Nō te Pūai o te Feiā ’Āpī, Māti 2022.
Uiraʼa ’e pāhonoraʼa
« E aha tē ti’a iā’u ’ia rave mai te mea ē, tē mana’o ra vau ē, ’aita tā’u mau tauto’ora’a nō te fa’a’ite i te ’evanelia e fa’atupu ra i te hō’ē mea ta’a ’ē ? »
Pe’e i te hi’ora’a o te Mesia
« I te hō’ē taime ’ua parau tō’u ’orometua ha’api’i ē ’aita e Atua e vai ra. ’Ua tai’o vau i te Buka a Moromona i te mau mahana ato’a ’e ’ua ’ite au ē te mea tāna e parau ra, e ’ere ïa i te parau mau. ’Ua tāmata vau i te fa’a’ite i tō’u ’itera’a pāpū, ’aita rā ’oia i fa’aro’o. ’Ua ha’api’i au ē e mea pūai a’e tā’u mau ’ohipa i tā’u mau parau. Tē pāturu maita’i nei tō’u mau hoa i tā’u mau fa’aturera’a. E hi’o noa mai rātou iā’u nō te mea e melo vau nō te ’Ēkālesia. »
Valeria F., 18 matahiti, Honetura
’A ani i te tauturu
« E rave rahi hānere rāve’a nō te fa’a’ite i te ’evanelia. I te tahi taime noa atu ā tā ’outou mau tauto’ora’a maita’i roa a’e, e’ita e pāpū ē e māuruuru mai tō ’outou mau hoa. E ’ere ’o ’outou ana’e. ’A ani i tō ’outou Metua i te Ao ra ’e tō ’outou Fa’aora i te tauturu. E ’ite mai paha ’outou i te tahi mea ’āpī. »
Banri O., 15 matahiti, Tāpōnē
’Ia riro ’ei hi’ora’a maita’i
« Tē ha’amana’o noa nei au i te a’o a tō’u feiā fa’atere : ‘Te rirora’a ei hi’ora’a maita’i roa a’e, ’o te hō’ē ïa rāve’a maita’i roa a’e nō te fa’a’ite i te evanelia.’ Mai te mea e tūtava tātou i te hōro’a i te hi’ora’a maita’i ’e ’ia riro ’ei māramarama nō vetahi ’ē, e mea ’ōhie a’e nā tātou ’ia fa’a’ite i te ’evanelia i te tahi atu mau ta’ata. E nehenehe te rirora’a ’ei ti’a nō Iesu Mesia e hōpoi mai i te mau ha’amaita’ira’a rarahi i roto i tō tātou orara’a ’e i te feiā ’ati a’e ia tātou. »
Bonnie Q., 16, Pōrīvia
Nā rātou terā mā’itira’a
« ’Ua pāto’ihia vau e rave rahi taime ’a fa’a’ite ai au i te ’evanelia. E parau mau, i te tahi taime, e ’oto vau nō te mea ’aita vau e ’ite ra i te ’ohipa ’āpī. ’Ua ha’api’i mai au ē, e ’ere nō’u te hape ’ia ’ore ana’e te ta’ata e fāri’i i te ’evanelia. Nā rātou e mā’iti, ’e e mea ti’a iā’u ’ia fa’a’oroma’i. I muri iho, e nehenehe tā’u mau tauto’ora’a e fa’atupu i te hō’ē mea ta’a ’ē. E nehenehe au e pure i te mau taime ato’a nō te mau ta’ata tā’u e tītau manihini nei. »
Cristina B., 18 matahiti, Rūmānia
Ha’api’i ’e ’ohipa mai te Mesia te huru
« E nehenehe tā tātou e feruri i te mau rāve’a ’āpī ’e te ’ārearea nō te fa’a’itera’a i te ’evanelia. ’Ei hi’ora’a, e nehenehe tātou e ha’api’i mai nā roto mai i tā Iesu Mesia porora’a nā roto i te mau parabole ’e te mau ’ohipa. Tē fa’a’ite nei tā tātou mau ’ohipa ’o vai tātou ’e e aha tā tātou mau fa’aturera’a. »
Johann S., 16 matahiti, Pōrīvia
ʼA faʼaʼoromaʼi
« ’Ua pāto’ihia vau e rave rahi taime ’a fa’a’ite ai au i te ’evanelia. Te parau mau, i te tahi taime, e ’oto vau nō te mea ’aita vau e ’ite ra i te ’ohipa ’āpī. ’Ua ha’api’i mai au ē, e ’ere nō’u te hape ’ia ’ore ana’e te ta’ata e fāri’i i te ’evanelia. Nā rātou e mā’iti, ’e e mea ti’a iā’u ’ia fa’a’oroma’i. I muri iho, e nehenehe tā’u mau tauto’ora’a e fa’atupu i te hō’ē mea ta’a ’ē. E nehenehe au e pure i te mau taime ato’a nō te mau ta’ata tā’u e tītau manihini nei. »
Cristina B., 18 matahiti, Rūmānia
Tāmata noa
« E rave rahi taime, ’ia ani ana’e au i tō’u mau hoa ’ia haere mai i te purera’a i te mau sābati, e pāto’i rātou i te tītaura’a manihini. E mea huru pa’ari ato’a ’ia pāto’i mai te ta’ata ia ’oe, ’ia tai’o rā vau i te mau pāpa’ira’a mo’a, ’ua ’ite au ē te mau mea ato’a tā tātou e rave nō vetahi ’ē, tē rave nei ïa tātou nō Iesu Mesia. Tē ti’aturi nei au ē, ’o te fa’a’oroma’i te tāviri. ’Aita tātou i ’ite e aha te taime e ha’amaita’i ai tā tātou mau parau i te ta’ata. »
Valeria V., 14 matahiti, Pōrīvia
’A pure nō rātou
« Te hō’ē rāve’a ’ōhie nō te fa’a’ite i te ’evanelia, nā roto ïa i te fa’a’itera’a i tō ’outou here i tō ’outou mau hoa. E nehenehe ’outou e pure nō te itoito ’ia fa’a’ite i te ’evanelia. E nehenehe ato’a ’outou e pure nō rātou, ’ia roa’a ia rātou te hō’ē māramaramara’a maita’i a’e nō ni’a i te parau poro’i nō te ’evanelia. »
Yuria K., 18 matahiti, Tāpōnē