« I Cagayan, Firipino, » Nō te Pūai o te Feiā ’Āpī, Māti 2022.
Tā mātou ha’amorira’a
I Cagayan, Firipino
Hōho’a nā Getty Images
Magandang araw ! Kamusta ?
(Te aura’a ra, « ’Ia ora na ! E aha tō ’oe huru ? » nā roto i te reo Tagalog.)
’O Agravaine L. tō’u i’oa.
Nō te hō’ē ’oire na’ina’i au i Cagayan i Firipino. Tē ora nei au i pīha’i iho i tō’u tupuna vahine ’e tupuna tāne, tō’u māmā rū’au, tō’u māmā, ’e tō’u nā tuahine e piti. ’Oia mau, e ’utuāfare rahi tō mātou ! E mea mātarohia te reira i te fenua Firipino. ’Ua mātauhia te firipino nō tō rātou tā’amura’a pūai i te parau nō te ’utuāfare. Terā tā’u tuha’a au roa a’e nō ni’a i te orara’a i’ō nei. E maita’i tāhinu noa te maita’i o te reva !
Tā’u mau fa’a’ana’anataera’a au roa, ’o te tai’ora’a ïa i te mau ve’a ’e te fa’aro’ora’a i te mau podcast ’e i te pehe fa’auru mau. E mea au ato’a nā’u ’ia pāpa’i i te mau rata iā’u iho i tō’u ananahi, i tā’u tāne ananahi, ’e i tā’u mau tamari’i ananahi !
Tuatāpapa ’e fa’a’ite
Tā’u tuha’a au roa a’e nō ni’a i te rirora’a ’ei melo nō Te ’Ēkālesia a Iesu Mesia i te Feiā Mo’a i te mau Mahana hope’a nei, ’o te ’itera’a ïa ē, tei roto vau i te ’Ēkālesia mau a te Mesia. E mea au nā’u ’ia haere e māta’ita’i i te hiero, ’ia fa’a’ite i te ’evanelia, ’e ’ia haere i te séminaire ’e tō’u mau hoa. E rave rahi te mea tā’u i ’apo mai i roto i teie mau ’itera’a.
Tē tāfifi nei au i te tahi taime nō te tāpe’a-māite-ra’a ē tae noa atu i te hope’a. Tē fa’aitoito nei rā vau i te tuatāpapa i tā’u mau pāpa’ira’a mo’a i te mau pō ato’a. E tauturu rahi te Mai, pe’e mai i tā’u iho tuatāpapara’a ! E mea au ato’a nā’u ’ia tai’o i te ’ā’amu nō te tahi atu feiā ’āpī, i roto i te mau ve’a a te ’Ēkālesia. E fa’a’ohipa vau i te mauha’a putu parau uira Vaira’a buka ’evanelia ’ia nehenehe iā’u ’ia fāri’i i te mau poro’i fa’aitoito i roto i tō’u pūtē, noa atu te vāhi tei reira vau.
Te rahira’a o tō’u mau hoa i te fare ha’api’ira’a, e melo rātou nō te ’Ēkālesia. ’E ’ua feruri noa na vau ē, ’aita tā’u e rāve’a nō te fa’a’ite i te ’evanelia. ’Ua ha’api’i mai rā vau ē te fa’a’itera’a i te ’evanelia, e ’ere i te ta’ata noa nō te tahi atu fa’aro’o. Mea au nā’u ’ia fa’a’ite i tō’u ’itera’a pāpū i tō’u hoa rahi i te fare ha’api’ira’a, e melo ato’a ’oia !
Te Sābati
E mea ātea roa tō mātou fare i te fare purera’a, nō reira, tītauhia i tō’u tuahine ’e iā’u ’ia fa’anaho nā mua a’e nō te tae i tā māua mau purera’a i te hora ti’a (’aore rā nā mua i te hora, terā te fā) !
E ti’a māua i te hora 4 i te po’ipo’i ’e e haere māua i te fare o tō māua metua vahine fēti’i nā raro, tei ni’a ho’i i te purūmu nō te fare purera’a. E taui māua i tō māua ’ahu haerera’a nō te ’ahu roa. I muri iho, e nā raro fa’ahou māua e 30 minuti te maoro nō te haere i te fare purera’a (i te tahi taime e 25 minuti mai te mea e haere vitiviti māua). Nō te mea ho’i ē tē fa’aineine nei māua nō te sābati nā mua roa, e’ita roa atu ïa māua e tāere ! Fātata e’ita roa atu. E vari paruparu mau te purūmu ’ia ua ana’e. I te hō’ē taime ’ua ua rahi ’e ’ua mau roa vau i roto i te vari paruparu ’e e’ita tā’u e nehenehe e haere fa’ahou !
E mea ho’ona rā ’ia tae ana’e māua i te fare purera’a. E tae mai te hau ’e te ’oa’oa i te paraparaura’a nō ni’a i te ’evanelia ’e te ha’apararera’a i te parau ’oa’oa a tō tātou Fa’aora. E mea au nā’u ’ia fa’a’ite i tō’u ’itera’a pāpū i te mau purera’a ha’apaera’a mā’a ato’a ’e te ’īritira’a mana’o ! E vāhi maita’i ato’a tā’u mau piha Ha’api’ira’a Sābati nō te fa’a’ite i tō’u mau mana’o nō ni’a i te ’evanelia a Iesu Mesia ’e nō te ha’api’i ato’a mai nā roto mai ia vetahi ’ē.