“Ko e Mālohi ʻo e Lakanga Fakataulaʻeikí ʻi he Mahaki Fakaʻauhá,” Ki Hono Fakamālohia ʻo e Toʻu Tupú, Māʻasi 2022.
Ko e Kaveingá mo Au
ʻOku vahevahe ʻe he toʻu tupú ʻa e founga ʻoku nau moʻui ʻaki ai e ngaahi fakalea ʻo e Ongo Kaveinga ʻa e Kau Finemuí mo e Kōlomu ʻo e Lakanga Taulaʻeiki Faka-ʻĒloné
Ko e Mālohi ʻo e Lakanga Fakataulaʻeikí ʻi he Mahaki Fakaʻauhá
“Te u ʻofa ki he ʻOtuá … pea fakaʻaongaʻi Hono lakanga fakataulaʻeikí ke tokoniʻi e niʻihi kehé, ʻo kamata pē ʻi hoku ʻapí.”
Laʻitā mei he Getty Images
ʻI he kamata ʻetau lotu ʻi ʻapí koeʻuhí ko e mahaki fakaʻauha COVID-19, naʻá ku tokoni ke tufa ʻa e sākalamēnití ki hoku fāmilí. Naʻe fakaʻofoʻofa ke u lava ʻo fai ʻeni ʻi hoku ʻapí, pea naʻá ku fakatokangaʻi ai ʻa ʻeku houngaʻia ʻi he sākalamēnití. ʻOku ou houngaʻia naʻá ku lava ʻo moʻui ʻi he taimi ʻo hono fakahoko ʻo e lotú ʻi ʻapí.
Naʻe fie maʻu ʻe ha taha ʻo homau kaungāʻapí ke ʻomi ʻe he taha ʻa e sākalamēnití ki ai. Naʻe ʻikai ha taha ʻi hono ʻapí te ne lava ʻo teuteuʻi pe tāpuakiʻi ʻa e sākalamēnití koeʻuhí he naʻe pekia hono husepānití ʻi he ngaahi taʻu siʻi kuo hilí. Naʻá ne tokanga foki ki he kau ʻaʻahí koeʻuhí ko e mahaki fakaʻauhá. Ko au mo ʻeku tangataʻeikí naʻá ma ngāue fakaetauhi ki aí, ko ia naʻá ma talaange te ma ʻoange ki ai ʻa e sākalamēnití pea te ma tui ʻa e meʻa maluʻi [ki he ngutú mo e ihú] mo tauhi ha ngaahi fakatokanga kehe koeʻuhí ko ʻene tuʻunga malú.
Naʻá ne houngaʻia ʻaupito ʻi heʻema lava ʻo fakahoko ʻení. Naʻá ku kiʻi ongoʻi loto mamahi ʻi heʻene tuenoá, he ko ia toko taha pē ʻi hono ʻapí lolotonga e mahaki fakaʻauhá. Ka naʻá ku toe houngaʻia foki ʻi heʻeku lava ʻo foaki ange ha meʻa mātuʻaki mahuʻinga ke ne fiefia ai. Naʻe fakaʻofoʻofa ke te lava ʻo tokoni kiate ia. Naʻá ku fiefia ʻi heʻeku lava mo ʻeku tangataʻeikí ke ʻalu ʻo tokoni ki homau kaungāʻapí.
ʻOku ou houngaʻia ke maʻu ʻa e lakanga fakataulaʻeikí koeʻuhí he ʻoku ʻikai ngata pē ʻi heʻene ʻaonga kiate aú kae pehē foki ki he kakai kehé. ʻOkú ne tokoniʻi au ke u hoko ko ha tokotaha lelei ange mo tokoni ke u ʻiloʻi e founga te u lava ai ʻo tokoniʻi e niʻihi kehé. Naʻe fakaʻaaki hoku matá ʻi heʻeku tufa ʻa e sākalamēnití ʻi hoku ʻapí pea ki hoku kaungāʻapí foki. ʻOku fie maʻu ke u fakaʻaongaʻi lelei ʻa e faingamālie ke tufa ʻa e sākalamēnití pea tokoniʻi ʻa e kakai ʻoku ʻikai ke nau lava ʻo fakahoko ia maʻanautolú. ʻOku ou houngaʻia ne u lava ʻo fakaʻaongaʻi e lakanga fakataulaʻeikí ke tāpuakiʻi e kakai kehé mo hoku fāmilí.
ʻOku nofo ʻa e tokotaha naʻá ne faʻú ʻi ʻIutā, USA.