“ʻOkú Ke Fanongo Fēfē Nai Kiate Iá?,” Ki Hono Fakamālohia ʻo e Toʻu Tupú, Māʻasi 2022.
Lea Fakaʻosí
ʻOkú Ke Fanongo Fēfē Nai Kiate Iá?
Ngaahi tā fakatātā ʻa Oksana Grivina
ʻOku hanga ʻe he ʻOtuá, fakataha mo e fakahinohino fakanonga ʻoku tau maʻu he taimi ki he taimi mei he Laumālie Māʻoniʻoní, ʻo fakapapauʻi mālohi mo fakataautaha mai ʻokú Ne ʻafioʻi mo ʻofaʻi kitautolu. Pea ʻi he ngaahi taimi ʻo ʻetau faingataʻaʻiá, ʻoku fakamanatu mai ʻe he Fakamoʻuí ʻa e ngaahi aʻusiá ni.
Fakakaukau ki hoʻo moʻuí. ʻE lava ke hoko mai e ngaahi aʻusia ko ʻení ʻi ha ngaahi taimi mahuʻinga ʻi heʻetau moʻuí pe ʻi ha meʻa ʻe hoko ʻo hangē nai ʻoku hā ngali taʻeʻaongá. ʻOku hoko ʻa e ngaahi momeniti fakalaumālie fakangalongataʻa ko ʻení ʻi ha taimi mo e founga kehekehe, ʻo fakafoʻituitui kiate kitautolu takitaha.
Naʻe fakamatalaʻi ʻe Siosefa Sāmita ʻoku tau maʻu he taimi ʻe niʻihi ha “ngaahi fakakaukau fakafokifā” pea taimi pē ʻe niʻihi ko e ʻilo haohaoa ʻoku taumalingi mai.1
Naʻe akonaki ʻa Palesiteni Dallin H. Oaks, ko e tali ki ha tangata fakamātoato naʻá ne pehē kuo teʻeki ke ne aʻusia ha meʻa pehē, “Mahalo kuo toutou tali mai ʻa hoʻo lotú, ka kuo nofotaha hoʻo tokangá ʻi ha fakaʻilonga lahi pe ko ha leʻo ʻoku ongo leʻolahi peá ke pehē ai kuo teʻeki ke ke maʻu ha tali.”2
Kuo tau fanongo kimuí ni ki he lea ʻa Palesiteni Lāsolo M. Nalesoni ʻo pehē: “ʻOku ou fakaafeʻi kimoutolu ke faʻa fakakaukau loloto ki he fehuʻi mahuʻingá ni: ʻOkú ke fanongo fēfē kiate Iá? ʻOku ou fakaafeʻi foki kimoutolu ke fai ʻa e meʻa kotoa ʻoku fie maʻú kae lava ke mou toutou fanongo lelei ange ai kiate Ia.”3