“Ko e hā ʻoku totonu ke u fai ʻi he taimi ʻoku ou ongoʻi ai ʻoku ʻikai ke ʻi ai ha faikehekehe ʻi heʻeku feinga ke vahevahe ʻa e ongoongoleleí?,” Toʻu Tupú, Māʻasi 2022.
Ngaahi Fehuʻi mo e Ngaahi Talí
“Ko e hā ʻoku totonu ke u fai ʻi he taimi ʻoku ou ongoʻi ai ʻoku ʻikai ke ʻi ai ha faikehekehe ʻi heʻeku feinga ke vahevahe ʻa e ongoongoleleí?”
Muimui he Sīpinga ʻa Kalaisí
“Naʻe pehē ʻe heʻeku faiakó ʻi ha taimi ʻe taha, ʻoku ʻikai ke ʻi ai ha ʻOtua. Naʻá ku lau fakaʻaho e Tohi ʻa Molomoná pea naʻá ku ʻiloʻi naʻe ʻikai moʻoni e meʻa naʻá ne lea ʻakí. Naʻá ku feinga ke vahevahe ʻeku fakamoʻoní, ka naʻe ʻikai ke fanongo mai ia. Kuó u ako ʻoku leʻo lahi ange ʻeku ngaahi tōʻongá ʻi heʻeku ngaahi leá. ʻOku poupouʻi ʻe hoku ngaahi kaungāmeʻá ʻeku ngaahi tuʻunga moʻuí. ʻOku nau siofi maʻu pē au he ko ha mēmipa au ʻo e Siasí.”
Valeria F., taʻu 18, Honitulasi
Kole ha Tokoni.
“ʻOku ʻi ai ha ngaahi founga lahi ke vahevahe ai e ongoongoleleí. Ko e taimi ʻe niʻihi he ʻikai fakapapauʻi atu ʻe hoʻo ngaahi ngāue lelei tahá ʻe houngaʻia ho ngaahi kaungāmeʻá ʻiate koe. ʻOku ʻikai ke ke tuenoa. Kole tokoni ki hoʻo Tamai Hēvaní mo e Fakamoʻuí. Te ke lava ʻo ʻilo ha meʻa foʻou.”
Banri O., taʻu 15, Siapani
Hoko Ko ha Faʻifaʻitakiʻanga Lelei
“ʻOku ou manatuʻi maʻu pē ʻa e faleʻi ʻa hoku kau takí: ʻKo e hoko ko ia ko ha faʻifaʻitakiʻangá, ko e taha ia ʻo e ngaahi founga lelei taha ke vahevahe ai ʻa e ongoongoleleí.’ Kapau te tau feinga ke tā ha sīpinga lelei mo hoko ko ha maama ki he niʻihi kehé, ʻe faingofua ange ke tau vahevahe ʻa e ongoongoleleí mo ha kakai tokolahi ange. ʻE lava ʻe heʻetau hoko ko e fakafofonga ʻo Sīsū Kalaisí ʻo ʻomi ha ngaahi tāpuaki maʻongoʻonga ki heʻetau moʻuí mo kinautolu ʻoku tau feohí.”
Bonnie Q., taʻu 16, Polivia
Ko ʻEnau Fili
“Kuo tuʻo lahi hono fakasītuʻaʻi au ʻi he taimi naʻá ku vahevahe ai ʻa e ongoongoleleí. Ko hono moʻoní, ʻoku ou faʻa ongoʻi loto mamahi he taimi ʻe niʻihi koeʻuhí ʻoku ʻikai ke u sio ki ha ngaahi ola. Kuó u ako ʻoku ʻikai ko hoku foʻui ʻa e taimi ʻoku ʻikai tali ai ʻe he kakaí ʻa e ongoongoleleí. Ko ʻenau filí ia, pea ʻoku totonu ke u faʻa kātaki. ʻE ala hoko ha lelei ʻi he konga kimui ʻo ʻeku ngaahi feingá. Te u lava maʻu pē ʻo lotua e kakai ʻoku ou fakaafeʻí.”
Christina B., taʻu 18, Lumēnia
Akoʻi pea Ngāue ʻo Hangē ko Kalaisí
“Te tau lava ʻo fakakaukau ki ha ngaahi founga foʻou mo fakafiefia ʻo hono vahevahe ʻo e ongoongoleleí. Hangē ko ʻení, te tau lava ʻo ako mei he founga naʻe malanga ʻaki ʻe Sīsū Kalaisí ʻo fakafou ʻi he ngaahi talanoa fakatātaá mo e ngaahi ngāué. ʻOku fakahaaʻi ʻe heʻetau ngaahi tōʻongá ko hai kitautolu mo ʻetau ngaahi tuʻunga moʻuí.”
Johann S., taʻu 16, Polivia
Faʻa Kātaki
“Kuo tuʻo lahi hono fakasītuʻaʻi au ʻi he taimi naʻá ku vahevahe ai ʻa e ongoongoleleí. Ko hono moʻoní, ʻoku ou faʻa ongoʻi loto mamahi he taimi ʻe niʻihi koeʻuhí ʻoku ʻikai ke u sio ki ha ngaahi ola. Kuó u ako ʻoku ʻikai ko hoku foʻui ʻa e taimi ʻoku ʻikai tali ai ʻe he kakaí ʻa e ongoongoleleí. Ko ʻenau filí ia, pea ʻoku totonu ke u faʻa kātaki. ʻE ala hoko ha lelei ʻi he konga kimui ʻo ʻeku ngaahi feingá. Te u lava maʻu pē ʻo lotua e kakai ʻoku ou fakaafeʻí.”
Christina B., taʻu 18, Lumēnia
Feinga Pē
“Ko e taimi lahi ʻoku ou fakaafeʻi ai hoku ngaahi kaungāmeʻá ke nau haʻu ki he lotú he Sāpaté, ʻoku ʻikai ke nau tali e fakaafé. ʻOku faingataʻa ke fakafisingaʻi, ka ʻi heʻeku lau e folofolá, ʻoku ou ʻiloʻi ko e meʻa kotoa pē ʻoku tau fai maʻá e niʻihi kehé, ʻoku tau fai ia maʻa Sīsū Kalaisi. ʻOku ou tui ko e kií ʻa e faʻa kātakí. ʻOku ʻikai ke tau teitei ʻilo e taimi ʻe tāpuekina ai e kakaí ʻe he ngaahi lea ʻoku tau vahevahé.
Valeria V., taʻu 14, Polivia
Lotua Kinautolu
“Ko ha founga faingofua ke vahevahe ai ʻa e ongoongoleleí ko hono fakahaaʻi hoʻo ʻofa ki ho ngaahi kaungāmeʻá. Te ke lava ʻo lotua ke ke lototoʻa ke vahevahe ʻa e ongoongoleleí. Te ke lava foki ʻo lotua kinautolu ke nau maʻu ha mahino lahi ange ki he pōpoaki ʻo e ongoongoleleí.”
Yuria K., taʻu 18, Siapani