“ʻE Lava ke Tokoniʻi Au ʻe he Laumālié ke u ʻIloʻi e Founga ke Tokoní,” Ki Hono Fakamālohia ʻo e Toʻu Tupú, Māʻasi 2022.
Ko e Kaveingá mo Au
ʻOku vahevahe ʻe he toʻu tupú ʻa e founga ʻoku nau moʻui ʻaki ai e ngaahi fakalea ʻo e Ongo Kaveinga ʻa e Kau Finemuí mo e Kōlomu ʻo e Lakanga Taulaʻeiki Faka-ʻĒloné
ʻE Lava ke Tokoniʻi au ʻe he Laumālié ke u ʻIloʻi e Founga ke Tokoní
“ʻI heʻeku hoko ko e ākonga ʻa Sīsū Kalaisí, ʻoku ou fāifeinga ke hoko ʻo hangē ko Iá. ʻOku ou fekumi pea ngāueʻi e fakahā fakatāutahá pea ngāue fakaetauhi ki he niʻihi kehé ʻi Hono huafa māʻoniʻoní.”
Lolotonga e mahaki fakaʻauha COVID-19, naʻe tokolahi ha kakai ne siʻisiʻi ange ʻenau vahé pe mole ʻenau ngāué. Naʻá ku fie maʻu ke kiʻi fakamaʻamaʻa ʻenau kavengá. Naʻe kamata ke u foaki ha meʻakai ki he kau faingataʻaʻiá ʻaki hono tokoniʻi au ʻe heʻeku ongomātuʻá mo hono fakaʻaongaʻi ʻeku paʻanga fakatāutahá. Naʻá ku faʻa fai ʻeni ʻaki ʻeku ʻota ha meʻakai maʻá e niʻihi kehé ʻo fakafou ʻi ha polokalama tekisī pasikala. Ne ʻi ai ha taimi ʻe niʻihi naʻá ku ʻave ʻa e meʻakaí ki ha ngaahi feituʻu ne vahe maʻa kinautolu ʻoku palopalemaʻiá.
ʻOku lahi ha kau fakaʻuli tekisī motopaiki ʻi ʻInitonēsia. ʻOku mau fakaʻaongaʻi ha polokalama ʻi heʻemau telefoní ke fakapapauʻi ʻenau ngaahi ngāué. Lolotonga e mahaki fakaʻauhá, naʻe faingataʻa ke maʻu ʻe he kau fakaʻulí ha ngaahi ʻota.
ʻI ha ʻaho ʻe taha, ne u muimui ai ki ha ueʻi mei he Laumālié ke tokoniʻi ha taha fakaʻuli. Naʻá ku ʻota ha meʻakai mei he polokalama tekisī pasikalá. Ka ʻi heʻene aʻu ki he falekaí ke ʻave ʻa e meʻakaí, naʻá ku tohi ʻo talaange ki ai, ko e meʻakai ia maʻana. Naʻá ne ʻohovale pea ʻikai ke ne tui naʻe ʻai ia maʻana. ʻI heʻeku talaange ko e meʻa ia maʻaná, naʻá ne fakamālō mai leva peá ne lotua au. Naʻá ne talamai te ne ʻalu mo e meʻakaí ki ʻapi ʻo ʻave ia ki heʻene kiʻi leká. Naʻe ongo mai ʻo hangē naʻá ne fuʻu fiefiá. Naʻá ku ongoʻi mātuʻaki fiefia foki mo au!
Neongo naʻá ku fehangahangai foki mo hoku fāmilí mo ha ngaahi faingataʻa, ka naʻá ku fakafanongo ki he Laumālié mo fili ke ngāue. Naʻa mau malava ʻo aʻusia ʻa e nēkeneká mo e fiefiá, ʻa ia naʻá ne tokoniʻi kimautolu ke mau ikunaʻi homau ngaahi faingataʻaʻiá.
ʻOku ou houngaʻia koeʻuhí ko e Laumālie Māʻoniʻoní. ʻOku fakamanatu mai ʻe he aʻusia ko ʻení ha potufolofola mei he Fuakava Foʻoú, Sione 13:34:: “ʻOku ou tuku ʻa e fekau foʻou kiate kimoutolu, Koeʻuhí ke mou feʻofaʻaki kiate kimoutolu; pea hangē ko ʻeku ʻofa kiate kimoutolú, ke mou feʻofaʻaki foki kiate kimoutolu.” ʻOku ou ʻilo ʻi heʻetau muimui ki he Laumālié, te tau maʻu ha ngaahi tāpuaki fakaofo mei he Tamai Hēvaní.
ʻOku nofo ʻa e tokotaha naʻá ne faʻú ʻi West Java, ʻInitonēsia.