Founga ʻo ʻEmau Moihuú

ʻI Kakaiani, ʻOtu Filipainí

Laʻitā mei he Getty Images

Magandang araw! Kamusta?
(ʻOku ʻuhinga ia ko e “ʻAho lelei! ʻOkú ke fēfē hake?” ʻi he lea faka-Takāloká.)

Ko hoku hingoá ko Agravaine L.

Ko ʻeku haʻu mei ha kiʻi kolo siʻisiʻi ʻi Kakaiani ʻi he ʻOtu Filipainí. ʻOku ou nofo mo ʻeku kui fefine uá mo e kui tangata uá, kui fefiné, mamá, mo e ongo tokoua ʻe ua. ʻIo, ʻoku tokolahi homau fāmilí! ʻOku angamaheni pē ia ʻi heni ʻi he ʻOtu Filipainí. ʻOku ʻiloa ʻa e kau Filipainí ʻi he mālohi ʻa e ngaahi haʻi fakafāmilí. Ko e konga ia ʻoku ou saiʻia taha ai ʻi he nofo hení. Ko ha tānaki mai pē ʻa e ʻea fakatalopikí!

Ko e meʻa ʻoku ou manako taha aí ko hono lau e ngaahi makasiní mo fanongo ki he ngaahi podcast mo e mūsika ʻoku langaki moʻuí. ʻOku ou saiʻia foki ke fai ha ngaahi tohi pea fakatuʻasila kiate au, mo hoku husepāniti mo e fānau ʻi he kahaʻú!

Akó mo e Vahevahé

Ko e konga ʻoku ou saiʻia taha ai ʻi heʻeku hoko ko ha mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ko e ʻilo ko ia ʻoku ou ʻi he Siasi moʻoni ʻo Kalaisí. ʻOku ou saiʻia he ʻaʻahi ki he temipalé, vahevahe ʻo e ongoongoleleí, mo e ʻalu ki he seminelí mo hoku ngaahi kaungāmeʻá. ʻOku ou ako ha meʻa lahi mei he ngaahi aʻusia kotoa ko ʻení.

ʻOku ou fefaʻuhi he taimi ʻe niʻihi mo e kātaki ki he ngataʻangá. Ka ʻoku ou fai hoku lelei tahá ke ako ʻeku folofolá he pō kotoa pē. ʻOku tokoni lahi mai ʻa eMuimui ʻIate Aú, ki heʻeku ako fakataautahá! ʻOku ou saiʻia foki ʻi hono lau e ngaahi talanoa mei he toʻu tupu kehe ʻi he ngaahi makasini ʻa e Siasí. ʻOku ou fakaʻaongaʻi ʻa e polokalama Gospel Library, ke u lava ʻo maʻu ha ngaahi pōpoaki langaki moʻui ʻi hoku kató, ʻo tatau ai pē pe ko e fē feituʻu ʻoku ou ʻi aí.

Ko e tokolahi taha hoku ngaahi kaungāmeʻa ʻi he akó ko e kāingalotu ʻo e Siasí. Naʻá ku faʻa fakakaukau naʻe ʻuhinga ia naʻe ʻikai ke u maʻu ha faingamālie ke vahevahe ʻa e ongoongoleleí. Ka kuó u ako ʻoku ʻikai fie maʻu ia ke vahevahe ʻa e ongoongoleleí mo e kakai pē mei he ngaahi tui fakalotu kehé. ʻOku ou manako ke vahevahe ʻeku fakamoʻoní mo hoku kaungāmeʻa mamae ʻi he akó, pea ko ha mēmipa foki ia!

ʻOku ou fakaʻaongaʻi ʻa e polokalama Gospel Library, ke u lava ʻo maʻu ha ngaahi pōpoaki langaki moʻui ʻi hoku kató, ʻo tatau ai pē pe ko e fē feituʻu ʻoku ou ʻi aí.

Ko e ʻAho Sāpaté

ʻOku mamaʻo homau falé mei he ʻapisiasi ʻo e Siasí, ko ia ʻoku fie maʻu ai ke u palani kimuʻa mo hoku tokouá ke ma aʻu kei taimi ki heʻemau ngaahi fakatahá (pe vave ange ai)!

ʻOku mau ʻā hake he 4:00 pongipongí ʻo lue ki he fale hoku mehikitangá, ʻa ia ʻoku fou atu ʻi he hala ki he ʻapisiasi ʻo e Siasí. ʻOku mau fetongi mei homau vala luelué ki homau ngaahi kofú. Pea mau toe lue leva ʻi ha miniti ʻe 30 ke aʻu ki he ʻapisiasí (pe miniti ʻe 25 he taimi ʻe niʻihi kapau ʻoku mau lue vave ʻaupito). Koeʻuhí ʻoku mau tomuʻa teuteu ki he Ngaahi Sāpaté, ʻoku ʻikai ai pē ke mau tōmui! ʻO meimei ʻikai ʻaupito. ʻOku pelepela ʻaupito ʻa e halá ʻi he taimi ʻoku ʻuha aí. Naʻe ʻuha lahi ʻi ha taimi ʻe taha ʻo u fihia ʻi he pelepelá pea ʻikai ke u toe lava ʻo ngaue!

Ka ʻoku ʻaonga kotoa ia ʻi heʻemau aʻu pē ki he lotú. ʻOku ou ongoʻi ʻa e nonga mo e fiefia ʻi he talanoa fekauʻaki mo e ongoongoleleí mo hono fakamafola ʻa e ongoongo fakafiefia ʻo hotau Fakamoʻuí. ʻOku ou manako ʻi hono vahevahe ʻeku fakamoʻoní ʻi he houalotu ʻaukaí mo e fakamoʻoni kotoa pē! ʻOku hoko foki ʻeku ngaahi kalasi Lautohi Faka-Sāpaté ko ha feituʻu lelei ke vahevahe ai ʻeku ngaahi fakakaukau fekauʻaki mo e ongoongolelei ʻo Sīsū Kalaisí pea ako foki mei he niʻihi kehé.

ʻOku faʻu ʻa e ʻOtu Filipainí ʻaki ha ʻotu motu ʻe 7,600 nai—ko e motu ʻe 2,000 ai ʻoku ʻikai fakahingoa!

Naʻe faʻu ʻa e ʻuluaki mīsini kalaoké ʻi he ʻOtu Filipainí.

ʻOku laka hake ʻi he lea fakafonua ʻe 120 ʻoku fakaʻaongaʻi ʻi he ʻOtu Filipainí.

ʻOku ngaohi mo tufaki atu ʻe he ʻOtu Filipainí ha niu ʻo lahi ange ʻi ha toe fonua ʻi he māmaní: meimei toni ʻe 19.5 miliona he taʻu kotoa pē!

Ne taʻu 60 ʻa e Siasí ʻi he ʻOtu Filipainí ʻi he 2021.

Naʻe fakatapui ʻa e Temipale Manila Filipainí, ʻa ia ko e fuofua temipale ia ʻi Filipainí, ʻi he 1984.

Fakamatalaʻi Mai e Founga Hoʻomou Moihuú

Te mau fiefia ke fanongo pe ʻoku anga fēfē ʻa e hoko ko ha mēmipa ʻo e Siasí ʻi he feituʻu ʻokú ke nofo aí. ‘Omi kiate kimautolu ha fakamatala nounou ki homou feitu‘ú, meʻa ʻokú ke fai ‘i he ʻaho Sāpaté, ngaahi ʻekitivitī ‘okú ke saiʻia taha aí, mo ha me‘a pē te ke lava ʻo fakakaukau ki ai. ʻAve ia ki he [e-mail].