“Pis blong Fesem Ol Strong Win long Laef,” Blong Ol Yut Oli Kam Strong, Maj 2023.
Pis blong Fesem Ol Strong Win long Laef
Lod Jisas Kraes i talem long yu long taem blong ol strong win long laef blong yu: “Pis i stap.”
Elda Uchtdorf wetem ol yang pipol long anaonsmen blong BYU–Pathway Worldwide long Febwari 7, 2017.
Afta wan ful dei blong stap tij long saed blong solwota, Lod Jisas Kraes i talem long ol disaepol blong Hem se bae oli krosem i go narasaed long solwota blong Galili. Afta we oli go, Jisas i faenem wan ples blong spel insaed long bot mo i slip.
I no longtaem, “wan bigfala win i girap, i blu strong, i mekem wota long bigfala lagun ya i raf we i raf. Nao wota i stap kam insaed long bot ya we i [mekem kolosap] bot i draon”(luk long Mak 4:37).
Sam long ol disaepol blong Jisas oli ol fisaman we oli gat eksperiens mo oli save olsem wanem blong handelem wan bot. Be strong win i kam strong moa mo oli stat blong fraet. Bot i stap go kolosap blong stap draon.
Truaot evri samting ia, Jisas i stap slip yet.
Yumi no save blong hamas taem ol disaepol oli bin fesem hadtaem long strong win ia be oli no bin save wet long taem moa. Oli wekemap Jisas mo krae, “!Tija, yu luk! !Bambae yumi lus nao, be yu yu no wari nating!?” (Mak 4:38).
Ol pikja oli kam long Adam Howling
Ol Strong Win blong Laef
Evriwan long yumi i stap fesem ol strong win long laef. Yu save luk long ol problem raon long wol o ol situesen blong yuwan mo filim se i no stret, harem nogud mo kros. Maet hat blong yu bae i sore from yuwan o wan nara man we yu lavem. Maet bae yu wari o fraet mo filim se hop i finis ia nao.
Long ol taem ia, yu save krae bigwan olsem ol disaepol blong Jisas, “!Tija, yu luk! Bambae mi lus nao, be yu yu no wari nating!?”
Taem mi gat semmak yia olsem yu, wan long ol hym we mi laekem hem i “Masta, Strong Win i Kam Strong Moa.”1 Mi save luk pikja blong miwan insaed long sip taem “ol bigfala wef oli stap bang strong!” Moa impoten mo naesfala pat blong hym i olsem: “Ol win mo ol wef bae obei wil blong Yu: Pis i stap.” Mo afta impoten mesej i kam: “Wota bae i no save draonem sip we Masta blong osen mo graon mo ol skae i stap long hem.”
Afta we ol disaepol blong Hem i krae aot from help, Jisas i “stanap mo i tok long win mo talem long solwota, Pis i stap. Mo nao win ya i finis, mo olgeta samting i kwaet.” (Mak 4:39
Sapos yu welkamem Jisas Kraes, “Prins blong Pis” (Aesea 9:6), insaed long sip blong yu, yu save faenem pis long medel blong ol wael mo strong win we i save mekem yu gat fraet mo harem nogud.
Ol semmak toktok Jisas i talem long Solwota blong Galili long strong win long naet bifo: “Pis i stap.”
Stap dipen long Paoa blong Hem we i givim Pis
?Yu yu save tingbaot hamas ol disaepol oli filim taem oli luk win, ren mo solwota we i obei long Masta we i toktok? Evriwan i save talem se,“?Wanem man ya? !Nating we win mo wota, be tufala i harem tok blong hem, tufala i obei long hem! (Mak 4:41).
Jisas Kraes i no semmak long eniwan we i bin stap long wol ia. Hem i kam blong sevem yumi. Long Garen blong Getsemane, Hem i pem praes blong ol sin blong yumi. Hem tu, i go tru kasem en soa mo harem nogud blong yumi. Bigfala mo safaring ia we i no save finis i mekem blad blong Hem i ronaot long evri hol blong skin (luk long Luk 22:44; Doktrin mo Ol Kavenan 19:18).
Wanem we Lod i mekem aot long lav we i stret evriwan, i bitim paoa blong mi blong andastanem. Be mi save se Hem i mekem from mi, from yu mo from evri sol we oli bin laef o bae oli laef olwe. Hem i givim evriwan blong yumi save kasem evriwan.
I no save gat wan bae i eksperiensem wanem we Jisas i bin safa, be yu mo mi i gat tudak mo konkon strong win blong fesem. Sapos yu leftemap hat blong yu long Lod, bae Hem i givim pis long ol strong win blong yu, from Hem i eksperiensem olgeta evriwan. Hem i safa hemwan from yu mo gat paoa blong mekem yu stap strong, leftemap tingting mo blesem yu.
Hem i promesem, “Mi mi putum pis blong mi i stap wetem yufala: mo pis ya we mi mi givim i no olsem pis we ol man blong wol oli save givim. Yufala i no letem tingting blong yufala i trabol, yufala i no fraet.” (Jon 14:27
Ol Wei blong Pis
Lod Jisas Kraes i givim yu ol wei blong filim Pis blong Hem. Hem i talem: “Lanem samting aot long mi, mo lisin long ol toktok blong mi; wokbaot wetem fasin blong no stap flas we i kam long Spirit blong mi,mo bae yu kasem pis long mi” (Doktrin mo Ol Kavenan 19:23
Lanem samting aot long Hem taem yu stap stadi laef mo ol tijing blong Hem insaed long ol skripja. Leftemap sol blong yufala long prea. “Stanap long ol tabu ples,” i tekem tu tempol (Doktrin mo Ol Kavenan 87:8; luk tu long 45:32).
Lisin long ol toktok blong Hem we i kam long ol profet. Folem rod we Tabu Spirit i soem. Yusum tabu presen blong fasin blong sakem sin. Kam long Jos blong Hem blong tingbaot, tijim mo fidim yu wetem gudfala toktok blong God.
Wokbaot wetem fasin we i no stap flas we i kam long Spirit blong Hem taem yu stap mekem hom blong yu wan ples we i save filim Spirit blong Hem. Helpem ol narawan mo stap glad blong givim seves long Hem. Tingbaot, “I gat pis long stret fasin blong stap mekem samting.”2 Traehad blong stap fetful oltaem mo kam wan “man we i folem Kraes wetem pis” (Moronae 7:3).
Sapos bae yu lanem, lisin mo wokbaot wetem Lod, bae bigfala promes blong Hem bae i kam: Bae yu gat Pis blong Hem.
Fet blong Stap Strong
Wetem fet long Lod Jisas Kraes, yu save “stap strong” taem ol strong win blong laef i kam long yu. Pis i no save kam kwik olsem we ol disaepol blong solwota blong Galili, be bae Lod i mekem yu strong blong go tru ol strong win we yu fesem.
Dia fren blong mi, mi testifae se Jisas Kraes i laef.
Hem i lavem yu.
Hem i save yu.
Hem i andastanem yu.
Bae Hem i no lego yu harem nogud long ol taem blong nid blong yu.
Tru pis i kam nomo long mo tru long Hem. Pis blong Hem i blong evriwan we bae oli go long Hem.