“Rere blong kam wan Misinari,” Blong Ol Yut Oli Kam Strong, Maj. 2023.
Rere blong Kam wan Misinari
?Olsem wanem nao yu save se yu stap rere blong givim seves long wan misin?
Presiden Russell M. Nelson i rimaenem yumi abaot impoten blong misinari wok mo i leftemap tingting blong ol yang man mo yang woman blong rere blong givim seves.1 !Blong stap wan fultaem misinari i tekem wok, be i semmak blong kam wan!
Blong stap rere from misin i save samtaem filim se i tumas from se i gat tumas samting blong mekem:
“Mi nidim blong sevem mane.”
“Mi mas stadi Prijim Gospel blong Mi.”
“?Olsem wanem nao bae mi kuk o wasem klos blong miwan?”
“Mi mas putum wan apoenmen wetem bisop blong mi.”
“?Mi mi gat strong tingting inaf blong serem gospel?”
Ol tingting mo ol wari ia oli stret gud. Be, i gud moa blong lukluk long bigfala stamba tingting blong yu blong givim seves.
Risen blong Yu
I help bigwan blong askem yuwan: “From Wanem mi wantem go long wan misin?”
Maet yu filim se hem i wan diuti blong yu. Maet yu glad blong stap long wan niu ples o lanem wan niu lanwis. Taswe, yu wantem serem testemoni blong Atonmen blong Jisas Kraes o doktrin blong ol famli we i no save finis. O yu biliv, olsem Presiden Nelson i talem se “evriwan i mas gat janis blong save abaot gospel blong Jisas Kraes we i kambak.”2
Sam risen blong stap givim seves long wan misin i gud moa long ol narawan, mo i gat moa long wan risen blong go. Ol risen blong yu i mas stap long medel raon long lav blong yu long Lod mo gospel blong Hem we i kambak. Tingting long ol risen blong yu mo sapos bae oli helpem yu blong wok blong Lod ”wetem ful hat, ful paoa blong tingting, ful maen mo ful paoa” (Doktrin mo Ol Kavenan 4:2). Mo sapos yu no gat tru tingting, yu save prea long Papa long Heven blong helpem yu blong kasem.
Testemoni blong yu
?“Yu yu gat wan testemoni blong gospel blong Jisas Kraes? ? Mo i tru se mi mi biliv se Hem i singaotem mi blong givim seves?”
Stamba tingting blong ol misinari i blong invaetem ol nara man blong kam long Kraes. Sapos yu stap invaetem ol pipol blong lanem abaot Jisas Kraes mo gospel blong Hem, i impoten blong yu gat wan testemoni blong yuwan.
Testemoni blong yu i no nid blong stret gud evriwan; oltaem i gat rum blong stap bildimap. Wanem we i impoten hem i fandesen: Jisas Kraes. Yu save kam blong save Hem yuwan taem yu stap stadi ol toktok blong Hem insaed long ol skripja, stap prea long Papa long Heven long nem blong Hem mo stap traehad blong laef olsem Hem.
Blong stap wan gud misinari i no minim se oltaem yu gud blong stap toktok long ol pipol o evri skripja yu save baehat (taswe yu save oltaem wok blong stap kam gud moa long ol skil blong yu). Taem yu gat tras nomo long Lod, biliv long Hem mo wiling blong mekem wok blong Hem, bae Hem i mekem ol hat wok blong yu i kam antap mo helpem yu kam wan moa gud misinari.
Tempol Endaomen blong Yu
“?Mi mi rere blong go long tempol?”
Bifo yu go givim seves long wan misin, bae yu kasem endaomen blong yu insaed long tempol sapos yu no mekem yet.
Ol tempol blesing oli “impoten be samtaem yumi no lukluk pat ia blong stap rere blong wan kol blong wan wok.” Mo “klin fasin blong yuwan i impoten mo we i nidim blong kasem ol blesing blong tempol.”3 Taem yu rere mo klin inaf blong go long tempol mo mekem ol tabu kavenan wetem God, bae yu stap rere yuwan tu blong kam wan misinari blong Hem (luk long Doktrin mo Ol Kavenan 105:33; 109:22).
Mo long en yu save tekem wan tempol preperesen klas. Be naoia, yu save mekem ol stadi blong yuwan mo stap rere. Presiden Nelson i givim sam long ol skripja mo ol gospel topik we yu save stadi blong lanem abaot tempol.4 Yu save faenem moa long temples.ChurchofJesusChrist.org.
Klin Inaf mi Rere
Bakegen, i gat plante samting blong rere blong misin. Yes, yu mas sevem mane, kipim yuwan i fit long saed blong bodi mo lanem ol simpol skil olsem somap ol brok klos mo stap kuk. Yu save gat ol gol ia yet.
Be no letem oli putum yu daon Preperesen we i moa impoten yu save mekem i hemia we i letem yu kam klin inaf mo strong tul long ol han blong Lod.
Sapos yu filim se yu no inaf, wari o no sua blong stap givim seves, hemia i nomol. Tingbaot nomo se Lod i wantem yu blong gat sakses. Taem yu trastem Hem mo folem gaed blong Spirit, bae Hem i helpem yu rere blong kam wan moa gud misinari we yu save kam.