“Stap Kam wan Tru Jampion,” Blong Ol Yut Oli Kam Strong, Maj 2023.
Stap Kam wan Tru Jampion
Felipe i wan besman blong faet long wol long ol spot olsem karate, judo, mo MMA .(Miks Spot blong Faet) Be blong givim seves long wan misin i wan namba wan praeoriti.
Ol foto i kam long Shirley Brito
Felipe F. i blong Pará, Brasil, i no kasem medel blong 18-yia blong yu. Hem i bin tekem pat long profesenol miks spot blong faet (MSF) jalenj, jodo mo karate kompetisen. Mo hem i gud tumas long wanem we hem i mekem. Hem i winim intanasonol Aeron Man MMA kompetisen. Hem i 2-taem Pará stet jampion, wan Brasilien vaes-jampion, mo wan intanasonol vaes-jampion blong judo. Mo hem i wan 10-taem Pará stet jampion, wan 10-taem Brasilien jampion, wan jampion blong Saot Amerika, wan jampion blong Pan-Amerika,mo wan 3-taem wol jampion blong karate. !Tru ia!
Risen blong Sakses blong Hem
Felipe i bin stat blong stap trening taem hem i gat seven yia. Be hem i biliv se bigfala risen blong sakses blong hem i God. “Oltaem mi prea from help blong Lod,” hem i talem.
Long las Pan-Amerika karate jampionsip blong hem, Felipe i filim se hem i no strong. Be afta papa blong hem i givim hem wan prishud blesing. “Afta long hemia, maen blong mi i kam moa gud mo i helpem mi winim jampionsip long dei ia. Ol las tu matj mi winim, mi gat wan seken nomo i stap. Evriwan i ting se i no posibol. Mi mekem wan muv we i no gat long tingting we i helpem mi win, mo blong mi, hem i from blesing blong papa blong mi.”
Papa blong hem i givim hem ol blesing plante yia. Filipe i save se blong stap kasem blesing i no minim se bae hem i save win oltaem, be hem i biliv se Lod i save helpem hem blong stap lukluk nomo mo kam antap long ol talen blong blong hem. “Hemia i helpem mi gat moa strong tingting,” Felipe i talem. “Mi save se nomata long ansa, han blong Lod i bin stap”
Haf blong famli blong hem i bin wan bigfala sapot tu. Long wan MMA tunamen, Filipe i luk famli blong hem insaed long ol stan. “Evriwan long olgeta oli stap singaot mo leftemap nem blong mi. Mi no save wanem blong talem.” Hem i ademap, “Mi glad tumas long papa mo mama blong mi we tufala i soem mi stret rod.”
Filipe i filim se blong stap folem rod ia i helpem hem long spot blong hem. Ol fren blong hem plante taem oli laf long hem taem hem i no mekem ol samting we oli stap mekem. Be Filipe i no gat rigret long hemia. “Olsem we gospel i givim ol blesing, insaed long spot hem i givim ol praes tu! Blong no stap go long pati wetem ol fren blong mi mo stap kakae ol stret samting tugeta i gat ansa.
Stap Mekem Desisen blong Givim Seves long wan Misin
Nao ia we hem i eitin, Felipe i gat plante janis. I no long taem oli invaetem hem blong tren insaed long wan strong Miks Spot Faet akademik, mo ol maneja raon long wol oli givim ofa ia long hem. Be hem i wantem go givim seves long wan misin fastaem.
“Long mi hem i wan isi joes,” hem i talem. “Lod i stap long fas ples. Ol nara haf i save wet from Hem i oltaem blesem yu taem yu stap obei long Hem”
Júnior, bigfala brata blong Felipe we i jes kam hom long wan misin, i pat blong stap pusum hem blong mekem joes ia. Hem i talem long Filipe se i nogat wan samting we i moa gud bitim blong stap givim seves long wan misin mo se hem i mas go nomata sapos ol pipol oli traem blong winim tingting blong hem blong no go.
Mo i gat ol pipol oli bin stap talem long Filipe blong stap. Plante pipol insaed long ol joen famli blong hem oli no memba blong Jos. “Oli no andastanem se blong stap givim seves long wan misin i gat moa valiu bitim blong kam rij mo plante man i save yu. Mi bin traem blong tijim gospel taem ol samting ia i hapen,” Felipe i talem. Mo wan long ol taem ia i lid i go long wan paoaful misinari eksperiens.
Kasen blong Felipe i jes ded mo angkel blong Felipe i stap harem nogud tumas from ded blong pikinini blong hem. Felipe i talem long angkel blong hem abaot plan blong sevem man. Afta long hem angkel blong hem i putum han raon long hem mo talem sore blong stap talem long hem blong no go long wan misin. “Hem i talem long mi se mi gat presen ia blong tajem ol hat blong ol pipol mo mi nid blong go givim seves,” Felipe i tingbaot. “I wan spesel taem blong mi taem wan we i no gat save abaot wanem i wan misin i andastanem stret stamba tingting blong hem.”
Felipe i bin gat ol taem we hem i no sua abaot wan misin hemwan. “Mi ridim ol skripja blong mi evri dei mo wan naet mi gat plante tu tingting abaot joes blong mi. Mi stat blong stap tingting, ?Bae mi stap mo plei blong wan smol taem moa? Be afta mi ridim insaed long Buk blong Momon abaot ol man blong Nifae we oli stat blong gat ol hae tingting long hat mo tingting i hae from ol hae praes. Jekob i tijim olgeta se oli nidim blong putum Lod i kam faswan. [Luk long Jekob 2:12–21.] Long tetaem ia, mi nomo gat tu tingting abaot joes blong mi.”
“Tedei mi save wanem mi wantem mo mi save se bae mi kambak long wan misin mo bae mi kasem blesing long sam wei. I save stap mekem Miks Spot blong Faet o nara samting be mi save se God i givim yumi wanem yumi nidim.”
Paoa blong Evri Dei Storian
Felipe i no filim glad oltaem mo gat strong tingting abaot wan misin—o Jos. “Mi gat wan taem long laef blong mi taem mi no strong long gospel mo oltaem mi filim se i gat wan samting i no stap,” hem i talem. “?Yu save man ia we i stap go nomo long jos mo i no mekem eni nara samting? Mi ia nao.” Afta we hem i toktok long brata mo bisop blong hem abaot stap givim seves long wan misin, hem i disaed blong stat prea mo ridim ol skripja blong hem evri dei.
“Mi ting se wanem i helpem mi i ol storian blong evri dei. Mi groap insaed long jos mo blong wan taem mi no bin lukaot blong storian from mi groap insaed long wan hom wetem wan bilif mo ting se hemia i gud inaf. Be naoia mi stap lukaotem blong gat wan testemoni evri dei”.
Wan Jampion I From Lod
Felipe i save se blong jusum raet i no minim se bae hem i oltaem win o kasem ol samting folem wei we hem i wantem. “Mi tingbaot mi stap go long wan kompetisen mo stap tingting se mi mi rere, mo mi lus long fas raon. Wan nara taem mi kasem kil mo stap long haos. Mi tingbaot mi wekap long eli moning, stap lukluk i go long siling, stap tingting sapos evri samting ia i impoten. Samtaem mi wantem nomo blong tanem raon mo gobak slip be mi stanap mo go blong trening. Blong kam wan jampion i go moa bitim taem nomo blong win. Hem i wan we i win evri dei, winim ol mistek, winim wan ol tes.”
Sevya i Man we Felipe lukluk long Hem blong win long evri saed blong laef. Sapos yumi wantem blong kam olsem we Hem i stap, yumi nid blong mekem wanem we Hem i mekem, oltaem stap traem blong stanap strong, mekem yumi wanwan i kam strong moa mo tingting long wanem bae Hem i mekem. Hemia i givim mi insperesen long ol aksen blong mi evri dei, blong kam olsem Hem. Taem mi luk samting we mi save jenisim, mi prea mo askem fogivnes, stap traem blong kam moa gud oltaem. Wan tru jampion i man we i foldaon plante taem mo nomata long ol medel blong harem nogud blong hem, hem i girap mo stap gohed.”
“Mi wan jampion i from Lod,” Felipe i talem. “Sapos i no bin Hem, mi no save wea ples nao bae mi stap long hem. Be mi sua se mi no save gat evri samting we mi gat tedei. Stap laef folem gospel i mekem mi wan jampion long laef mo long ol spot.”