“Yu Save Sakem Sin,” Blong Ol Yut Oli Kam Strong, Maj 2023.
Mi Save Mekem Evri Samting tru long Kraes
Ol yut oli serem olsem wanem Kraes i mekem olgeta oli kam strong blong mekem ol had samting (luk long Filipae 4:13).
Yumi Save Sakem Sin
Nomata we mi bin kasem baptaes taem mi gat eit yia, oltaem mi no stap mekem ol stret samting. Taem mi kam wan yangfala, mi stat blong stap wokbaot wetem wan grup blong ol boe mo mifala i stat blong mekem ol samting we mi save se i no gud.
Afta we sista blong mi i mared, hem i helpem mi blong kambak long Jos. Mi lanem abaot impoten blong Tok blong Waes mo stap lukaotem gud bodi blong mi.
Be wan dei, mi mekem wan nara series sin. Mi filim se mi no save gat Spirit o paoa blong prishud wetem mi. Mi filim se mi nating nomo mo no bin ting se bae mi save mekem ol resposibiliti blong mi long jos, olsem stap blesem mo pasem sakramen.
Be gospel i tijim se yumi save sakem sin oltaem. I bin had blong mi go luk bisop blong mi mo talemaot sin blong mi. I bin had blong save se ol man i luk mi mi wokbaot i go insaed long ofis blong bisop. Be mi wantem pis blong Lod mo mi wantem sakem sin.
Bisop blong mi i talem wan prea wetem mi mo talem long mi se Lod oltaem i gat sore long olgeta we oli lukaotem blong sakem sin mo se bae mi save kam gud long ol mistek blong mi. Nao ia mi stat blong stap ridim ol skripja blong mi, stap prea mo mi save se i helpem mi blong winim ol temtesen.
Sapos proses blong fasin blong sakem sin i had long yu, yu mas oltaem tingbaot presen blong Jisas Kraes mo bigfala Atonmen blong Hem. Yumi evriwan i sin mo mekem ol mistek mo yumi no save kam stret evriwan long laef ia. Be tru long Atonmen blong Jisas Kraes mo blad blong Hem we i ron from yumi, oltaem yumi save sakem sin. Wetem help blong Lod, yumi save muv i go fored blong kam stret evriwan.
Kenneth B., Tonga