Tijing folem Tijing

Kam long Hem

Sevya i invaetem yumi blong putum ol hevi samting blong yumi long Hem.

Jisas Kraes

Pikja i kam long Annie Henrie Nader

Matiu 11:28–30

28 Yufala evriwan we, yufala i stap hadwok tumas mo we yufala i stap karem ol hevi samting, yufala i kam long mi nao bambae mi tekemaot ol hevi samting ya, mi mekem yufala i spel gud.

29 Yufala i mas putum yok blong mi long solda blong yufala mo yufala i mas lan long mi; nao bambae yufala i faenem pis long laef blong yufala.

30 From we yok ya we bambae mi putum long yufala wok blong hem i isi nomo, mo ol samting we bambae mi givim long yufala blong yufala i karem oli no hevi.

Kam long Mi

Yumi save go long Sevya taem yumi stap lanem gospel blong Hem, gat fet long Hem, stap sakem sin, stap mekem mo kipim ol kavenan mo stap folem eksampol blong Hem.

hadwok … hevi samting

Hadwok long saed blong bodi mo hevi samting long saed blong bodi i save kavremap yumi semmak long saed blong tingting, filing mo long saed blong Spirit. Sevya i givim pis blong Hem long yumi, nomata ol wanem kaen hevi samting yumi stap karem.

yok

wan yok i wan tul blong joenem tu animol tugeta blong tufala i save pulum wan hevi samting tugeta, olsem blong brekem graon o pulum wan wil kat. Ol yok oli gat wan wud we i stap antap long solda blong tufala animol, tufala i stap serem wet blong hevi samting.

lanem samting

Yumi save lanem samting long Jisas Kraes taem yumi stap stadi ol tijing blong Hem mo eksampol blong Hem—mo taem yumi stap traem blong folem olgeta.

spel

Spel blong Sevya hem i pis blong Hem, we i mekem ol maen mo spirit blong yumi i kwaet. Hem i helpem yumi winim ol wari blong wol mo givim yumi paoa long saed blong spirit taem yumi no strong.

isi … laet

Stap tekem yok blong Sevya long yumi i minim se yumi fasem yumiwan long Hem tru long ol kavenan. I minim blong stap givim ol hat blong yumi long Hem mo wok blong Hem. Taem yumi mekem hemia, ol hevi samting blong yumi i nomo hevi from Hem i stap helpem yumi.