“?Olsem wanem nao Sevya i tritim woman?,” Blong Ol Yut Oli Kam Strong, Maj 2023.
Olsem wanem nao Sevya i Tritim Woman
Yumi save folem eksampol blong Kraes blong stap soem fasin blong kaen mo respek long ol woman long laef blong yumi.
Pikja droing i kam long Rose Datoc Dall
Insaed long Niu Testeman, Jisas Kraes plante taem i tijim ol samting we yumi no tingting long hem. (Olsem insaed: yumi sapos blong lavem ol enemi blong yumi mo prea from olgeta we oli mekem i nogud long yumi?1)
Sam long ol tijing ia oli no go wetem kalja blong taem ia. Be Sevya i no traem blong mekem samting blong ol pipol oli akseptem Hem. Hem i stap traem blong tijim wan loa we i hae moa mo soem yumi olsem wanem blong tritim ol nara man. Hem i soem wan eksampol blong lav we i no gat mak blong wan ej, jenda o nasionaliti.
Long taem blong Jisas, woman oli no tritim gud olgeta. Mo long sam kalja tedei, woman oltaem oli no tritim olgeta wetem respek. Maet yu stap laef long wan ples we i semmak olsem. Sapos i olsem, yu save soem wan fasin we i olsem hemia blong Kraes long komuniti blong yu taem yu stap kaen mo gat respek long evriwan—hemia i tekem tu ol gel mo woman long laef blong yu.
Jisas I Kea long Mama blong Hem
Fas pablik merikel blong Jisas Kraes hem i, hemia we Hem i helpem mama blong Hem. Mama blong Jisas i responsibol blong stap help blong fidim ol pipol long wan mared. Taem oli sot long ol dring, Jisas i tanem wota i kam waen blong i gat inaf dring blong ol kes o visita.
Toktok blong Jisas we i ansa long Mama blong Hem long stori ia maet i harem olsem se i strong long taem blong yumi tedei: “Woman, from wanem yu yu putum samting ya long mi?” (Jon 2:4). Be Josef Smit i talemaot klia se Jisas i stap askem mama blong Hem wanem nao hem i nidim: “Woman, Wanem nao yu yu wantem mi blong mekem blong yu?”2. Mo singaotem wan “woman” bifo i wan toktok long saed blong respek. I tru Hem i talem, “Woman blong mi, eni samting yu askem mi wetem fet, bae mi givim long yu.”3
Wanem i hapen abaot tri bifo. Bifo Hem i ded long kros, wan long ol las samting Jisas i mekem i we i mekem sua se mama blong Hem oli tekem kea long hem.
“Hem i talem long mama blong Hem, !Woman, hemia pikinini blong yu! Nao Hem i talem long disaepol, !Hemia mama blong yu! Nao i stat long taem ya, man ya i tekem woman ya i go long haos blong hem” (Jon 19:26–27).
Jisas i Tritim Woman we oli Sakemaot hem wetem Respek
Yumi gat tu eksampol blong Sevya i stap tritim woman wetem respek we sosaeti i no akseptem.
Long taem blong Sevya, plante Jiu oli luk daon long ol pipol blong Sameria. Be taem Jisas Kraes i mitim wan Sameria woman long saed blong wan wel, Hem i tritim hem wetem kaen fasin mo respek. Moa long hemia, hem i long taem we Jisas i stap toktok long woman ia Hem i talemaot Hemwan blong i Sevya we oli promesem!4 (Luk long Jon 4.)
Long wan nara situesen, wan woman we oli kasem hem long wan series sin. Folem loa blong ol Jiu, oli mas stonem hem blong i ded. Taem ol lida oli tekem woman ia i go long Sevya, Hem i askem olgeta wan kwestin we i mekem olgeta i stop mo tingting. Oli no bin stonem hem. Sevya i invaetem woman ia mo talem, “go hom mo yu nomo mekem sin bakegen” (Jon 8:11).
Jisas i bin kamaot long woman afta long Laef Bakegen blong Hem long Ded
Afta we Jisas i laef bakegen, Hem visit faswan long Meri Magdala, we i stap krae sore long hol ya blong ston blong Hem (luk long Jon 20:11–18). Ol nara woman—Joana, mo tu Meri mama blong James—we oli stap long medel blong ol faswan blong save abaot girap bakegen blong Lod. Ol enjel i invaetem olgeta blong serem testemoni blong olgeta abaot wanem oli bin luk. (Luk long Luk 24:1–10.)
Yumi Save Folem Eksampol blong Hem
?Wanem nao yumi save mekem blong folem eksampol blong Sevya blong gat respek long woman?
Profet blong yumi, Presiden Russel M. Nelson, i gat plante praktis long eria ia. Hem i lukaotem naen pikinini gel mo wan boe wetem waef blong hem Danzel. Afta we hem i ded, hem i maredem Wendy Nelson.
“Yumi respektem ol sista—i no long stret famli blong yumi nomo be evri naesfala sista long laef blong yumi,” hem i tijim.5
Letem yumi mekem manis ia i wan long ol strong paoa long tingting, lav olsem hemia blong Kraes mo fasin blong kaen i go long ol woman long laef blong yumi. !Yu gat inaf paoa blong jenisim wol, wan rilesensip long wan taem!