“Sevya i Save Olsem Wanem blong Helpem Mi go tru long Kansa,” Blong Ol Yut Oli Kam Strong, Maj 2023.
Mi Save Mekem Evri Samting tru long Kraes
Ol yut oli serem olsem wanem Kraes i mekem oli kam strong blong mekem ol had samting (luk long Filipae 4:13).
Sevya i Save Olsem Wanem blong Helpem Mi go tru long Kansa
Laef blong mi i nomol kasem winta blong 2020. Mi bin sik wetem wanem mifala i ting se i wan infeksen, mekem mi tekem wan raon blong antibaiotik olsem we oli talem. I no long taem mi stat blong filim se hed i soa, taet mo slak. Kwik taem afta mi wekap long 10 klok long naet mi stap tingting se hem i moning mo stat mekem rere blong go long skul.
Taem sista blong mi i talem long mi se i naet yet, mi ron i go long rum blong papa mo mama blong mi wetem fraet mo bigfala wari. Mama blong mi i tajem hed blong mi mo filim se hed blong mi i hot mo se mi kasem wan fiva we i hae. Mifala i go long dokta long nekis dei, we i mekem plante tes.
Long naet ia papa mo mama blong mi i stap krae i kam long rum blong mi, Oli talem long mi se mi gat kansa (strong blad long bodi) mo we mifala i mas go long hospital blong karem moa ansa. Mi stap long imejensi rum ful naet mo statem kimoterapi tritmen (tritmen blong stopem kansa o ol waet blad sel) nomo blong sam dei afta.
Tritmen blong mi bae i gohed blong nara yia o tu be oli bin save manejem smol moa. Mi bin stap filim gud smol afta long tritmen mo hop blong save go bak long skul bakegen kwiktaem. I no bin isi. Ol tritmen ia oli gat ol risal we i tekem tu wan bun kondisen we oli singaotem avaskula nekros we i mekem se i had long mi blong wokbaot.
Nomata long evri samting—ating from hemia—mi bin gro kolosap moa long Papa blong mi long Heven. Nao ia mi gat wan andastaning blong Atonmen blong Jisas Kraes we i dip. Fastaem mi stap gat tingting ia se Atonmen blong Hem i samting we yu nidim nomo taem yu mekem wan mistek. Hemia i pat blong hem, be blong stap dipen long Sevya hem i samting tu we i helpem mi filim se mi no stap miwan.
Jisas Kraes i tekem long Hemwan evri harem nogud mo ol sin blong yumi we i minim se Hem i save stret olsem wanem blong helpem mi taem mi stap eksperiensem kansa. Stap go tru long eni tes i save filim se yu stap yuwan be tru long Atonmen blong Kraes yumi save kasem kamfot taem yumi save se i tru Hem i andastanem wanem yumi stap go tru long hem.
Ruby H., Yuta, YSA