“Ol Jeneral Prinsipol,” Blong Ol Yut Oli Kam Strong Maj 2023.
Ol Jeneral Prinsipol, Ol Spesifik Joes
?Olsem wanem nao yu laef folem ol jeneral prinsipol long ol spesifik situesen long laef blong yu?
Pikja droing i kam long Josh Talbot
Hemia trifala kwot blong ol tri defren profet. Luk sapos yu save luksave wan semmak topik:
“O stap waes; ?wanem moa nao bae mi save talem?”
“Mi no save talem long yufala evri samting we yufala i save mekem sin long hem.”
“Mi tijim olgeta ol prinsipol we oli stret mo olgeta nomo oli rulum olgeta wan.”
Teachings of Presidents of the Church: Joseph Smith [2007], 284.
Luk olsem se ol profet oli givim yumi ol prinsipol blong gospel blong Lod mo lego long yumi blong yumi laef folem. Oli no givim yu evri ditel. ?So, olsem wanem nao yumi tekem ol tijing blong olgeta mo laef folem olgeta?
?Olsem Wanem Nao Yu Yu Laef Folem Ol Tijing Blong Ol Profet?
Ol profet oli givim yumi ol komanmen we i kam long Lod. Oli tijim yumi tu ol prinsipol mo ol gaedlaen we i helpem yumi laef folem ol trutok ia we i no save finis mo ol komanmen—eksampol insaed long Blong Ol Yut Oli Kam Strong gaed.
Be ol memba blong Jos Ia blong Jisas Kraes blong Ol Lata-Dei sent samtaem i stap sapraes from ol ditel—ol spesifik samting we yumi mas mekem blong laef moa gud long gospel prinsipol mo ol komanmen. Eksampol, ol pipol oli maet askem se wanem kaen klos i soem respek long ol bodi blong olgeta. O oli maet askem wanem stret nao bae oli mas mekem long Sabat dei blong kipim i tabu.
Ol jeneral prinsipol i save aplae long ol defren spesifik wei tru ol defren pipol be yumi save lukaotem daereksen blong Lod taem yumi kam kolosap long ol joes blong yumiwan blong yumi save kam moa kolosap long God.
Wan Paten we i Help Bigwan
Presiden Russell M. Nelson i eksplenem wan taem olsem wanem hem i mekem joes blong kipim Sabat dei i tabu:
“Mi lanem long ol skripja se aksen mo fasin blong mi long Sabat i stap olsem wan saen bitwin mi mo Papa blong mi long Heven. Wetem samting ia we mi andastanem, mi nomo nidim ol lis blong ol samting blong mekem mo blong no mekem. Taem mi mas mekem desisen se wan aktiviti i stret o no long Sabat dei, mi stap askem miwan nomo: ‘Wanem saen mi wantem givim long God?’ Kwestin ia i mekem se ol joes blong mi abaot Sabat dei oli klia olsem glas nomo” (Apr. 2015 general conference [Ensaen o Liahona, Mei 2015, 130]).
Wei we Presiden Nelson i kam antap wetem spesifik kwestin ia i save soem yumi wan jeneral paten blong stap mekem ol joes abaot ol komanmen mo ol gaedlaen. Hemia wan wei we yu save mekem:
Yu save folem paten ia wetem eni komanmen o gaedlaen—tok blong waes, media mo entetenmen, miusik, klin fasin long saed blong seks mo iven taeting. I tekem sam wok be hem i gud tumas.
Taem yu stadi ol samting ia, yu save ridim wanem ol skripja mo ol profet blong tedei i tij abaot olgeta, tingting hevi mo prea long Papa long Heven. Tabu Spirit i save helpem yu mo givim insperesen long yu blong mekem ol gudfala joes.
?Olsem wanem long ol joes blong ol nara man?
Tekem notis se Presiden Nelson i no bin talem yumi wanem ol spesifik joes hem i mekem abaot Sabat dei. Hem i soem yumi olsem wanem blong mekem ol joes blong yumiwan. Maet yu mekem plante semmak joes we hem i mekem. Be poen i blong traem kam kolosap long Papa long Heven mo Jisas Kraes tru ol joes blong yumi.
Sapos yu faenem wan man long Jos we i no mekem evri samting stret olsem we yu mekem, yu no nid blo wari blong stap stretem olgeta. Olsem Reyna I. Aburto, foma Seken Kaonsel long Rilif Sosaeti Jeneral Presidensi i tijim, “Letem yumi folem rod blong Sevya mo kam antap long fasin blong stap kaen, slo blong jajem ol man mo stop blong stap lukluk fasin blong gat spirit blong ol nara man” (Oct. 2019 general conferens [Ensign o Liahona, Novemba. 2019, 58]).
Yu save akseptem fulwan ol prinsipol we ol profet oli tijim. Yu save poenem ol nara man i go long Sevya, lav, kaen fasin blong Hem mo ol komanmen blong Hem. Yu save ridim Blong Ol Yut Oli Kam Strong gaed. Yu save traem blong laef long wan fetful laef olsem wan disaepol blong Jisas Kraes, stap wan gud eksampol mo serem ol eksperiens blong yu long saed blong spirit.
Sapos yu lukluk nomo blong stap lavem God mo lavem ol nara wan, bae spirit i lidim yu blong mekem ol joes we bae i helpem yu mo ol narawan i glad.