“Jisas Kraes: Pis i stap long medel blong Ol Strong Win,” Blong Ol Yut Oli Kam Strong, Maj 2023.
Kam Folem Mi
Jisas Kraes: Pis i stap long medel blong Ol Strong Win
Sam long ol dei, yu maet filim se yu go ia, kam ia tru ol strong win blong laef. Be Jisas Kraes i gat paoa blong givim yu pis we yu no save faenem long eni ples.
Pis I Stap, i kam long Yonsung Kim
Long medel blong senia yia blong mi long hae skul, mi kasem wan big sapraes. Oli singaotem papa mo mama blong mi blong prisaed ova long Urukei Montevideo Misin, we i minim se bae oli stap muv i go long nara en blong wol wetem ol fo yangfala brata mo sista blong mi. Mi wari finis abaot hae skul graduet be nao ia bae mi go long kolej mi wan, wetem famli blong mi long wan defren kontinen. Mi harem nogud bigwan.
Transisen blong mi long hae skul i go long kolej i bin had tumas long mi. Taem ol kaen rummet mo taosen blong ol studen oli raonem mi, mi neva filim se mi stap miwan. Ol fos blong skul oli bigwan tumas. Mi no save wanem mi wantem stadi mo faenem ol klas oli fulap long jalenj. Mi stap fesem hadtaem tu tru wan sik long tingting wetem wan nogud rilesensip we i tekem wan bigfala series sik long helt long maen blong mi. Fraet blong fiuja blong mi i mekem mi wari.
Kwiktaem ol filing blong mi blong sik long tingting, fraet mo fasin blong stap sore miwan i mekem i had blong wok. Iven ol evri dei samting blong mekem oli nomo hapen. Wan moning, mi stap askem Papa long Heven blong givim mi paoa blong mekem samting truaot long dei. “Mi nomo save mekem hemia miwan,” mi prea. Long wan kwiktaem blong sik long tingting mo filing we i klia, mi kasem ol toktok we i kam long maen blong mi “Yu no nid blong mekem yuwan.” Pis i fulumap maen blong mi. Strong win long maen blong mi i kam kwaet.
Sam manis i pas ( mo ol yia) i no bin isi. Ol filing blong mi blong sik long tingting mo fasin blong stap sore miwan i no bin go we kwiktaem. Be blong fastaem, mi andastanem long wan level blong miwan wanem i minim blong gat wan Sevya. Mi save Hem i andastanem ol jalenj mo harem nogud blong mi. Mi save se Hem wan nomo we i save helpem mi mo Hem i mekem.
Sam yia afta, mi wan riten misinari, wan kolej graduet mo stap hapi long mared. Mo mi save se mi no save kasem eni long ol gol ia sapos mi no bin gat tras long Lod.
Foto i kam long Getty Images
Pis I Stap
Jisas i bin slip insaed long bot wetem Ol Aposol blong Hem taem wan bigfala strong win i girap. Ol Aposol oli wekemap Jisas mo talem, “!Tija, yu luk! !Bambae yumi lus nao, be yu yu no wari nating!?” Mak 4:38 Taem we oli ting se bae oli ded long strong wael win, Lod i girap mo “i tok long win mo talem long raf solwota, Pis i stap. Mo nao win ya i finis, mo olgeta samting i kwaet.” (Mak 4:39
?Hamas taem long laef blong yu, yu bin gat tingting ia “!Tija, yu luk! Bambae mi lus nao, be yu yu no wari nating!?” Samtaem, taem yu stap go tru ol jalenj we oli hat long laef, i isi blong filim se yu stap yuwan mo i no gat sapot. Yu maet gat tingting ia se from wanem Lod i no mekem ol strong win blong yu i kwaet. Bae i olsem se laef blong yu bae i neva kasem “bigfala kwaet” we ves 39 i tokbaot.
Be nomata long hemia, wan impoten pat blong stori ia hemi prinsipol we Sevya i tijim nekis wan. Hem i talem: “From wanem yufala i fraet olsem? yufala i no biliv yet?” Mak 4:40 Long taem blong fraet mo wari blong olgeta Ol Aposol oli fogetem se huia nao oli stap wetem. Pikinini blong God we i bin krietem wol ia i stap slip insaed long bot. ?From wanem bae oli fraet?
Long semmak fasin, Sevya i gat paoa blong i mekem i kwaet eni strong win long laef blong yu. Hem i save karemaot soa bodi blong yu, mekem ol hevi samting oli kam isi mo givim laet taem yu stap long tudak. Rod blong yu long proses ia i blong eksasaesem bigfala fet long Jisas Kraes.
Stap Faenem Paoa we i kam long Lod
Stap laef wetem fet we i kam antap i save givim moa paoa blong Kraes insaed long laef blong yu. Taem Razafimalaza blong Madagaska i stap finisim wan had skul yia, anti blong hem i ded. Hem i harem nogud bigwan. I mekem kolosap i had blong tingting hevi long taem blong skul. Hem i stap rere blong mekem ol faenol eksam blong yia. Hem i prea, “Plis tekemaot sore blong mi mo givim mi paoa blong go mekem eksam tumoro.” Afta we hem i prea, Razafimalaza i filim se hem i gat paoa. “Mi filim olsem se mi fogetem sore blong mi,” hem talem. “God i givim mi paoa blong mekem eni samting.”
Hem i impoten blong tingbaot se samtaem Lod i mekem ol strong win long laef blong yu i kwaet mo samtaem Hem i mekem i kwaet mo givim kamfot long yu taem strong wael win i stap gohed. Taem yu gat fet long Hem, yu gat tras tu long wil mo taem blong Hem. Yu biliv se bae Hem i helpem yu, nomata se wetaem pis mo kwaet filing blong yu bae i kam.
Gat Tras long Taem blong hem
Wan yang woman nem blong hem Ann i gat ol filing blong fraet. “Mi go tru wetem sam wari mo series ADHD (Fasin blong tekem atensen mo ol fasin blong toktok mo mekem samting i no stap long oda),” hem i talem. “Samtaem hemia i lego mi wetem filing ia se ol nara man oli no andastanem mi mo i had blong kipim wan lukluk we i no save finis. I no long tumas mi rid insaed long Jenesis abaot Sara we i wet plante yia bifo i save gat wan pikinini. Mi luksave se maet mi mas wet wan long taem blong save kam gud tu. Mi save se Kraes i no save lego mi taem mi stap eksperiensem wari. Hem i stap ia blong helpem mi go tru olgeta.
Stap jusum, blong gat tras long Lod i no minim se yu mas fogetem ol bigfala jalenj long laef blong yu. Be, i minim se yu mas lukluk long “bigfala, gudfala mo stret paoa blong God ( blong yu), gat tras long Hem… wetem wan glad hat.”1 Taem yu stap yuwan, sore, wari o stap wet long ol promes blesing, tingbaot kwestin ia: ? Yu yu stap wet long “wan bigfala kwaet” wetem wan fraet hat o wetem wan fetful hat?