“Tauraoi n Riki bwa te Mitinare,” Ibukin Kakorakoraia Kairake, Maati 2023.
Tauraoi n Riki bwa te Mitinare
Kona kanga n ataia bwa koa tauraoi ni beku n te mition?
Beretitenti Russell M. Nelson e a tia ni kauringiira kakaawakin te mwakuri ni mitinare ao e a tia ni kaungaia ataeinimwaane ao ataeinnaine bwa a na katauraoi ni beku.1 Te ri ki ni mitinare ae bwanin taina e kainnanoa te mwakuri, ma ai aron naba te riki bwa temanna!
Te katauraoi nakon te mition e kona naba n tabetai ni kakorakai ibukina bwa e tara n ae a rang mwaiti bwaai aika a na karaoaki:
“I riai ni kawakinmwane.”
“I riai ni kamatebwaia Preach My Gospel.”
“N na kanga ni kuuka ke ni uaati n tii ngai?”
“I riai ni karekea au tai ni maroro ma te bitiobi.”
“I tau n tibwa te euangkerio?”
Iango ao tabeaianga aikai a bon ririki. E ngae n anne, e raoiroi riki bwa ko na karababa am iango iaon oin te kantaninga ibukin am beku.
Bukina Iroum
E ibuobuoki bwa kona titirakiniko ibon iroum: “Bukin tera ngkai I tangiria n nako ni mitinare?”
Tao ko namakinna bwa bon tibwangam. Tao ko ingainga ni maeka n te tabo ae boou ke n reiakina te taetae ae e boou. Tao ko tangiria n tibwa am koaua iaon ana Mwakuri ni kamaiu Iesu Kristo ke te reirei iaon te utu ae akea tokina. Ke ko kakoaua, n aron are e a tia n taekinna Beretitenti Nelson , bwa “aomata ni kabane a riai ni karekea aia tai n reiakina ana euangkerio Iesu Kristo are ea tia n kaokaki .”2
Tabeua bukin karaoan te mwakuri ni mitinare a raraoi riki irouia tabeman nakoia tabeman, ao e mwaiti riki bukina aika raraoi nakon tii teuana bwa kona nako. Bukina iroum e riai ni boboto iaon am tangira ibukin te Uea ao Ana euangkerio are e a tia ni kaokaki. Iangoi bukina iroum ao ngkana a na buokiko ni beku ibukin te Uea ”ma nanomi, marurungimi, ami iango ao korakorami ni kabane” (Reirei ao Berita aika Tabu 4:2). Ao ngkana akea nanom, ko kona n tataro nakon Tamam are i Karawa bwa e na buokiko ni karekea.
Am kakoaua
“Iai am koaua ibukin ana euangkerio Iesu Kristo? Ao I kakoaua bwa E a tia ni weteai bwa N na beku?”
Aia kantaninga mitinare bwa a na kaoia aomata nakon Kristo. Ngkana ko kaoia aomata bwa a na reirei taekan Iesu Kristo ao Ana euangkerio, e kakaawaki bwa kona karekea moa oin am koaua.
Am kakoaua e aki kantaningaaki bwa e na kororaoi; n tainako e na reke am tai ni kakorakora. Ae kakaawaki riki bon aan am koaua: Iesu Kristo. Ko kona ni kina ibon iroum man kamatebwaian Ana taeka ni koroboki aika a tabu, tataro nakon Tamara are i Karawa n Arana, ao ni kataia ni maiu n ai Arona.
N riki bwa te mitinare ae tamaroa e aki nanonaki bwa kona rang bwaati n n taetae nakoia aomata ke ni kamatenanoi kibu ni kabane (ngkai ko kona n tainako ni mwakuriia kanakoraoan riki am konabwai). Ti ngkana ko onimakina te Uea, kakoaua, ao iai nanom ae tauraoi ni karaoa Ana mwakuri, E na karakai am konabwai ao ni buokiko n riki bwa te mitinare ae nakoraoi.
Oin am Entaumente n te Tembora
“I namakinna bwa I tauraoi n nakon te tembora?”
Imwain ae ko riki bwa te mitinare, ko riai moa ni karekea oin am entaumente n te tembora ngkana ko tuai ni karaoia mai imwaina.
Kakabwaia n te tembora bon “aan te mwakuri ma a mwanuokinaki n tabetai n te katauraoi nakon te wewete ibukin te mwakuri.” Ao “arom n tau bon ngaia te kabanea ni kakaawaki ae kantaningaaki ibukin karekean te kakabwaia n te tembora.”3 Ngkai ko katauraoi ao koa tau n nakon te tembora ni karaoi berita aika a tabu ma te Atua, ko a tauraoi naba n riki bwa A na mitinare. (Taraa Reirei ao Berita aika Tabu 105:33; 109:22).
N tokin te tai, ko kona n ira te kiraati n te katauraoi nakon te tembora. Ma n te tai moa aei, ko kona ni karaoa oin am kamatebwai ao am katauraoi. Beretitenti Nelson e a tia n rinei koroboki aika a tabu tabeua ao atuun reirei n te euangkerio ake ko kona n reiakini ibukin te tembora.4 Ko kona n reiakina ae mwaiti riki iaon temples.ChurchofJesusChrist.org.
Ko Tau ao Ko Tauraoi
Ni kaokia riki, a mwaiti anga ni katauraoi nakon te mition. Eng, ko riai kawakin mwane, kateimatoa marurungin rabwatam, ao n reiakin konabwai aika beebete n aron ituakin te kunnikia ke te kuuka. Ko kona naba ni karekei kouru akanne.
Ma tai karawawatako ni kabwarabwaraana ni kabane. Te katauraoi ae moan te kakaawaki are ko kona ni karaoia bon aekaki ake ko na kona iai n tau ao n riki bwa te bwai ni mwakuri ae nakoraoi ni bain te Uea.
Ngkana ko namakinna bwa ko aki tau, rawawata, ke n aki koaua raoi ibukin te beku, akanne a bon ririki. Ti uringnga bwa te Uea e tangiriko bwa kona tokanikai! Ngkai ko onimakinna ao ko iri ana kaetieti te Tamnei, E na buokiko ni katauraoi n riki bwa te mitinare ae te kabanea n tamaroa.