“Iesu Kristo: Te Rau ibuakon te Angibuaka,” Ibukin Kakorakoraia Kairake, Maati 2023.
Nakomai, Iriirai
Iesu Kristo: Te Rau Ibuakon te Kangaanga
Iai bong, ake kona namakina iai te aki rau man kangaangan te maiu. Ma Iesu Kristo ia mwaakan ni uota te rau are ko aki kona ni kunea man tabo nako.
Raoi, Bwaa ka, iroun Yong Sung Kim
N iteran au ririki rinanon au kabanea n tai n te kauarinan, I karekea te kakubanako ae moan te bubura. Au karo a tia ni weteaki bwa a na tararua te Uruguay Montevideo Mition, are nanona bwa a na mwaing nakon iteran te aonaaba are teuana ma tariu ao mwaneu aika a uarereke. I a bon tia n rang n rawawata n iangoan te angabeeba n te kauarinan, ma ngkai N na nakon te kuura n reirei ae rietata n tii ngai, ao au utu n aba aika a kakaokoro. I rangi ni maaku.
Mwaingiu man te kauarinan nakon te kuura n reirei ae rietata e bon rang ni matoatoa irou. E ngae ngke I katobibiaki irouia raou n reirei aika akoi ao nga ma nga ataein te reirei, I bon tuai man namakina te maroa ae ai aron aei. Rawawatan te reirei e a bon rang korakora. I aki ataia bwa tera ae I kan kamatebwaia ao I kunea bwa e matoa te reirei. E rootaki naba au iango inanon au reitaki, are e a karika aorakin au iango. Makakin taai aika a na roko e a bon korakora irou.
N te tai ae tawe namakinan te bwarannano, maaku, ao te maroaa e a tuuka au kakamwakuri. Riki bwaai ake I tataneiai ni karaoi I aki kona ni karaoi. N te ingabong teuana, I butiia Tamara are i Karawa bwa e na anganai te korakora bwa N na kona n tokanikai inanon te bong anne. “I aki kona ni karaoa aio n tii ngai,” I tataro. Inanon te tai ae aki ririki te kamatata n te iango ao n te namakin, I karekei taeka aikai inanon au iango “Kona tai raraoma .” E roko te rau n au iango. Te kangaanga n au iango e a kerikaaki.
N amwakaina ake imwiina (ao ririki) a bon aki beebete. Au namakin ni bwarannano ao ni maroa aki waekoa ni bua. Ma n te moan tai, I matata ibon irou n te bwai are e kananonaaki ni karekean te Tia Kamaiu. I ataia bwa E atai au kangaanga ao marakiu. I ataia bwa Bon tii ngaia ae e kona ni buokai, ao E karaoia.
Ririki ake imwiina, I a oki ni mitinare, e a bane au tai man te kuura n reirei ae rietata, ao I a tia ni mareaki inanon te kukurei. Ao I ataia bwa I aki kona ni kakoroi bukin au kouru akanne ngke arona bwa I aki onimakina te Uea.
Tamnei iroun Getty Images
Raoi, Bwaaka
Iesu e matu iaon te booti ao n raonaki irouia Ana Abotoro ngke e a roko te buaka. A kauta Iesu, ni kangai, “Te tia reirei, ko aki mutiakina matera?” (Mareko 4:38). Ngke a taku bwa a nang mate n te buaka ae korakora, te Uea e teirake ao e “boaa te ang, ao e taku nakon te nama, Raoi, bwaka. Ao e bwaka te ang, ao e bati te aariki” (Mareko 4:39).
Iraua te tai inanon maiu ae koa tia n titiraki iai, “Ko aki mutiakina matera?” N tabetai, ngkana ko a ribuakon kanganga aika korakora, ko kona ni kai namakina te maroa ao te katinanikuaki. Kona bae n titiraki bukin tera te Uea e aki kabeebetei kangaanga ake e rinanona te aomata. E kona n taraa n ae e na bon aki kona n reke te “rau ae korakora” are e taekinaki n te kibu 39.
E ngae n anne, te mwakoro ae moan te kakaawaki n te karaki aei bon te reirei are e reireia te Tia Kamaiu imwiina. E taku: “Kam aera ngkai kam maaku, e aera ngkai akea te onimaki iroumi?” (Mareko 4:40). Inanon aia tai ni maaku ao ni bwarannano, Abotoro a tia ni mwaninga bwa antai raoia. Natin te Atua, are e karika te aonaaba aei, are matu iaon aia booti. Bukin tera ngkai a maaku?
N aron naba aei, te Tia Kamaiu iai mwaakana ni karekea te rau inanon kangaanga nako inanon maiumi. E kona ni katoka te maraki, kabeebetea te rawawata, ao ni karekea te ota ngkana ko mena inanon te roo. Tibwangam n te mwakuri aei bwa kona kakorakora riki am onimaki iroun Iesu Kristo.
Karekean te Korakora mairoun te Uea
Maiuakinan te onimaki ae rikirake e kona ni uota mwaakan Kristo inanon maium. Ngke Razafimalaza mai Madagascar e nang bane ana ririki n rinanon te kangaanga n te reirei, e a motirawa naba ai tinana. E taonaki n te nanokaawaki. E a bon kangaanga karekean te rau n au kantaninga n tain te reirei. E a katauraoi ni karaoa ana kabanea n ukeuke ni banen te ririki. E tataro, “Taiaoka uotinako nanokawakiu ao anganai te korakora bwa N na ira te ukeuke nakon te ingabong.” Imwiin ana tataro, e namakina te kakorakor aaki Razafimalaza. “I namakinna bwa I a mwaninga nanokawakiu” e taku. “E anganai te kakorakoraaki te Atua ni karaoi bwaai ni kabane.”
E kakaawaki bwa kona uringnga bwa n tabetai te Uea e katoka te kangaanga inanon maium, ao n tabetai e anganiko te rau ao te raunnano inanon tain te kangaanga. Ngkana iai onimakinana iroum, kona onimakina naba Ana kantaninga ao ana tai. Ko kakoaua bwa E na buokiko, n aki taraia bwa nningai ae e na roko iai te rau ao te kabebeteaki.
Onimakinan Ana Tai
Te ataeinnaine ae arana Ann e taneiai ma namakinan te maaku. “I rinanon te ingainga ae korakora ao teutana te ADHD,” e taku. “N tabetai tabeman aomata aki ota n au namakin, ao e kangaanga bwa N na teimatoa ni kawakina te kantaninga are akea tokina. N te tai ae tibwa nako I wareka Karikan Bwaai n taekan Taara, are e tataninga inanon irabwi te ririki ibukin karekean natina. I ataia bwa I kona n tatanginga n te tai ae maan bwa N na kamaiuaki naba. I ataia bwa Kristo e aki kona ni kiitanai ngkana I rinanon te bwarannano. E mena ikekei bwa e na buokai n rinanona.”
Rineakin onimakinan te Uea e aki nanonaki bwa kona katinanikui kangaanga aika korakora inanon maium. E ngae n anne, e nanonaki bwa ko riai ni “kabotoa am iango iaon korakorana ae akea tokina, tamaroana, ao mwaakan t[te] Atua, n onimakinna … ma te nano ae kimwareirei”1 Ngkana ko maroa, nanokawaki, ingainga, ke tataningai berita ake a taekinaki nakoim, uringa te titiraki aei: Ko tataninga “te rau ae korakora” ma nanom ae maaku ke ma nanom ae onimaki?