“Te Tia Kamaiu E Ata Aron Buokau rinanon te Kaentia,” Ibukin Kakorakoraia Kairake, Maati 2023.
I Kona Ni Karaoi Bwaai Ni Kabane Rinanon Kristo
Kairake a taekina aron Kristo ngke e kakorakoraia ni karaoi bwaai aika a kangaanga (taraa I-Biribi 4:13).
Te Tia Kamaiu E Ata Aron Buokau rinanon te Kaentia
E rang nakoraoi maiu ni karokoa tain te kamwaitoro n 2020. I aoraki n te bwai are I taku bwa man te manaoraki, ngaia are I anai aekakin nako bwatin n tiringan te manaoraki. Imwiina, e a moanna ni mamaraki atu, ni kua, ao n tong. Teutana imwiin anne ao I uti iai tao te aoa 10 n te tairiki are I taku bwa e a moaningabong ao I a waaki ni katauraoai nakon te reirei.
Ngke e tuangai tariu bwa e bon bong naba, I biri nakon aia ruu au karo n iakaka. Tinau e riinga atu, ao I bon mika. Ti nakon te taokita n te bong are imwiina, ao e karaoi aekakin nako ana tutuo.
N te tairiki anne a rin n au ruu au karo, a tang. A tuangai bwa e a reke irou te leukemia ao ti riai n nakon te onaoraki ni karekei riki kaeka. I a tiku n ruun te emergency ni kabwanina te bong anne ao e a waaki au bwainaoraki n te chemotherapy tabeua te bong imwiina.
Au bwainaoraki e na reitinako teuana ke uoua riki te ririki, ma kanga e a nakoraoi riki. I a namakina te marurung riki n te tai aei ao au kantaninga bwa N na kona ni manga okira te reirei. E bon aki beebete, naba. Te chemo a mwaiti mwiina aika riki, n raonaki ma rootakin te rii are e aranaki bwa te avascular necrosis are e a kangaa nga iai nakonakou.
N aki ongei bwaai ni kabane—tao bukin naba—I a rikirake riki ni kaan nakon Tamau are i Karawa. N te tai aei ao I a rang mataata riki n ana Mwakuri ni kamaiu Iesu Kristo. Ngkekei ngkoa I taku bwa Ana Mwakuri ni Kamaiu ko ti kainnanoia ngkana iai te kairua ae ko karaoia. Anne mwakorona, ma arom ni katan iaon am Tia Kamaiu bon ngaia naba are e a tia ni buokai n namakinna bwa I aki maroa.
Iesu Kristo e a tia ni katoka Iaona rawawatara ni kabane ao ara bure, are nanona bwa E ataia raoi bwa e na kanga ni buokai ngkai e a reke irou te leukemia. Kataakira ake ti rinanona e kona ni karekea namakinan te maroa, ma rinanon Ana Mwakuri ni kamaiu Kristo, ti kona ni karekea te raunnano n ataia bwa E ota raoi n te bwai are ti rinanona.
Ruby H., Utah, USA