“Tera Aron te Tia Kamaiu nakoia Aine?,” Ibukin Kakorakoraia Kairake, Maati. 2023.
Tera aron te Tia Kamaiu Nakoia Aine
Ti kona n iriira ana banna ni katoto Iesu Kristo ni kaota te akoi ao te karinerine nakoia aine inanon maiura.
Kamataata n te tamnei iroun Rose Datoc Dall
Inanon te Nu Tetemanti, Iesu Kristo e aki toki n reirei bwaai aika a aki kantaningaaki. (N aron are: ti riai n tangiriia ara kairiribai ao n tataro ibukiia ake a bwainikiriniira?1)
Tabeua reirei aikai a kaitara ma te katei n te tai anne. Ma te Tia Kamaiu e aki kataia ni karaoi bwaai aika e na tangiraki iai irouia aomata. E kataia n reireiniia aomata aroia ni maiuakina ae raoiroi riki nakon aia koaua are a maiuakinna ao n tuangiira arora ae tina karaoia imarenara. E katea te banna ni katoto n te tangira are akea tiana nakoia roro nako, aine ao mwaane, ao reeti nako.
N ana tai Iesu, aine a kakeaki boonganaia. Ao ni katei tabeua n taai aikai, aine e ataaki n ae tabangaki bwa akea bonganaia. Tao ko bae ni maeka n te tabo ae ai aron anne. Ngkana ngaia anne, ko kona ni katea ana banna ni katoto Kristo nakoia kain am komiunite man maiuakinan te akoi ao karinerine nakoia aomata nako—ni kariniia ataeinnaine ao aine inanon maium.
Iesu E Tabeakina Tinana
Ana moan kakai Iesu Kristo imataia te botannaomaa teuana ngke e buoka tinana. Iai tibwangana ni buoka kamwarakeaia aomata n tain te mare. Ngke e a bane te mooi, Iesu e bita te ran nakon te wain bwa e aonga n tau ibukiia iruwa.
N ana taeka Iesu ni kaeka tinana n te maroro anne e kona n tangibuaka n te ongora n taai aikai: “Neiko, tera ae ko tangiria irou?” (Ioane 2:4). Ma Iotebwa Timiti e kabwaranakoa bwa Iesu e titirakina tinana bwa tera ae kainnanoia: “Neiko, tera ae ko tangiria bwa nna karaoia ibukim ?”2. Ao wetean temanna “neiko” n taai akekei bon te ara ae karinerine. E bon ti kangai, “Neiko, tera are ko tangiria mai irou n te onimaki, N na karekea ibukim.”3
Tia kibateniua te ririki imwin te karaki arei . Bon imwain are E mate iaon te kaibangaki, teuana mai ibuakon kab manea ni bwai are e karaoia Iesu bon kakoauana bwa e nabeaki raoi tinana.
“E taku nakon tinana, Neiko, noria natim anne! “Ao e taku nakon te reirei, Noria, tinam! Ao man te aua arei ao e kamaeka neierei te reirei arei n ana auti” (Ioane 19:26–27).
Iesu E anga te Karinerine nakoia Aine are a Kakioakinako
Iai uoua ana katoto te Tia Kamaiu ni karinerine nakoia aine are a kationakoaki irouia te botanaomata.
N ana tai te Tia Kamaiu, Iutaia a kamwiinibaia I-Tamaria. Ma ngke e kaitibo Iesu Kristo ma ainen Tamaria n te mwanibwa, E nanoangaia ao e anganna te karinerine. Ao ae kakaawaki riki, inanon ana maroro ma neiei E kaotia bwa ngaia te Tia Kamaiu are e taekinaki n te berita!4 (Taraa Ioane 4.)
N te rongorongo teuana, te aine e kuneaki ni karaoa te bure ae kakaiaki. Ni kaineti ma aia tua Iutaia, neiei e na karebanaaki ni karokoa e mate. Ngke a uota te aine aei taan kairiiri nakon te Tia Kamaiu, E titirakiniia te titiraki are a tei n iango iai. A bon aki karebana neienne. Imwiina te Tia Kamaiu e kaoa neienne bwa e na raira nanona, ni kangai, “Kona nako, ao tai manga bure” (Ioane 8:11).
Iesu E Kaoti nakon te Aine imwiin Manga Utina
Imwiin manga utin Iesu, E kaoti moa nakon Maria te Maketara, are e tang n ruanimatena (tara Ioane 20:11–18). Aine ake tabeman—Ioanna, ai aron naba Maria are tinan Iakobo —a mena ibuakoia naake a moan ata utin te Uea. Anera a kaoia bwa a na kaota aia koaua n te bwai are a tia n nooria. (Taraa Ruka 24:1–10.)
Ti Kona ni Katotonga Ana Banna ni Katoto
Tera ae ti kona ni karaoia ni katotonga ana banna ni katoto te Tia Kamaiu ni karinerine nakoia aine?
Ara burabeti, Beretitenti Russell M. Nelson, e mwaiti ae kakaraoia n te itera aei. E kaikawaia ruaman natina aine ao natina te mwane ma buuna Dantzel. Imwiin matena, e mare ma Wendy Nelson.
“Ti karineia aine—tiaki ti ara utu ma ni kabane aine aika tamaroa inanon maiura,” e reirei.5
Tina karika te namwakaina aei bwa teuana ae ninikoria, ana tangira Kristo ao ana akoi nakoia aine inanon maiura. Iai korakoram ae tau ni bita te aonaaba, teuana te arorao n teuana te tai!