I Kona ni Karaoi Bwaai ni Kabane rinanon Kristo

Te roronrikirake ngke a taekina aron Kristo ni kakorakoraia ni karaoan bwaai aika a kangaanga (taraa I-Biribi 4:13).

Ti Kona n Rairi Nanora

E ngae ngke I a tia ni bwabetitoaki ngke waniua au ririki, I aki kakaraoi bwaai aika a eti n tainako. Ngke ai tebwi tabun au ririki, I a iraraang ma kain te kaeng, ao tia waaki ni kakaraoi bwaai aika I atai bwa aki raraoi.

Imwiin ieinin mwaneu, e buokai bwa N na okira te Ekaretia. I a ata kakaawakin Tuan te Mauri ao kawakinan raoi rabwatau.

Ma n te bong teuana, I a manga karaoa naba te bure ae kakaiaki. I namakinna bwa I aki kona ni karekea mwaakan te Tamnei ae Raoiroi n te nakoanibonga. I namakinna bwa I a rang n aki boongana ao I taku bwa I aki kona ni karaoi tibwangau n te aro, n aron kakabwaian ao bwatinakin te toa.

Ma te euangkerio e reireinai bwa ti kona n taa inako ni karaoa te rairannano. E a bon kangaanga irou bwa N na nako ni kawara au bitiobi ni kaoti au bure. E a bon kangaanga iangoan ae a na kona aomata n noorai ni kawara ana aobiti te bitiobi. Ma I tangira ana rau te Uea, ao I tangiria n raira nanou.

Au bitiobi e tataro ma ngai ao e tuangai bwa te Uea e nanoanga n taa inako nakoia ake a ukoukora te rairannano ao I kona ni kainaomataaki man au kairua. I a tia ngkai ni waaki ni wawareki koroboki aika a tabu ao n tataro, ao I ataia bwa e buokai n totokoa te kariiri.

Ng kana e kangaanga karaoan te rairannano iroum, ko riai n taainako n uringa ana bwaintangira Iesu Kristo ao kamimiin Ana mwakuri ni Kamaiu. Ngaira ni kabane ti bane ni kairua ao ti karaoi kairua, ao ti aki kona ni karekea te kakororaoaki n te maiu aei. Ma rinanon Ana Mwakuri ni kamaiu Iesu Kristo ao raraana are e kawawaeaki ibukira, ti kona n ta ainako n rairi nanora. N raonaki ma ana ibuobuoki te Uea, ti kona ni waaki nako nakon te kororaoi.

Kenneth B., Tonga