“N Riki bwa te Tiambion ni Koaua,” Ibukin Kakorakoraia Kairake, Maati 2023.
N Riki bwa te Tiambion ni Koaua
Felipe bon temanna te boto n te aonaaba n te iranikai n aron te karate, judo, ao MMA. Ma karaoan ana mwakuri ni mitinare bon te nambwa teuana n ana moanibwai.
Tamnei iroun Shirley Brito
Felipe F. mai Pará, Brazil, bon tiaki n aekaia nako taian 18-n ririki. E a tia n ira te kabo n te iranikai aika a kakaokoro n aekaia nako (MMA), judo, ao karate. Ao e nakoraoi ana konabwai ni bwaai ake e karaoi. E moanna n te kabo ae te International Iron Man n te MMA. Uoua ana tai n tiambion n te Pará state champion, te kauoman n tiambion mai Brazil, ao te kauoman n tiambion n te aonaaba n te judo. Ao 10 ana tai n tiambion n te Pará titeiki, 10-ana tai n tiambion mai Brazil, te tiambion mai Amerika Maiaki, te tiambion n te Pan-American, ao 3 ana tai n tiambion n te aonaaba n te karate. Whoa!
Bukin Ana Tokanikai
Felipe e a kaman kataneiai man ngke itiua ana ririki. Ma e kakoaua bwa bukin ana tokanikai ae te kabanea ni korakora bon Atuana. “I aki toki n tataro ibukin ana ibuobuoki te Uea,” e taku.
N ana kabanea n kaboo n te Pan-American karate, Felipe e aki namakina te mweengaraoi. Ma imwiina tamana e anganna te kakabwaia n te nakoanibonga. “Imwiin anne e a tamaroa riki au iango, ao anne ae e buokai n tokanikai n te bong anne. N boou uoua ake i tokanikai iai, ao I a tiku ma tii teuana au teekan . Aomata a taku bwa e aki kona n reke. I karaoa te mwaing ae I aki kantaningaia are I a moanna iai, bon mwiin ana kakabwaia tamau.”
Tamana e a tia n anganganna kakabwaia inanon ririki aika a bati. Felipe e ataia bwa karekean te kakabwaia e aki nanonaki n tainako bwa e na moanna, ma e kakoaua bwa te Uea e kona ni buokia bwa e na kabanea ana iango ao ni kanakoraoa riki ana tarena. “Aio e buokai riki bwa N na mweengaraoi,” e taku Felipe. “I ataia bwa n aki tara mwiin te bwi, bain te Uea e mena ikekei.”
Nikiraia kain ana utu a tia naba n riki bwa boutoka aika a korakora. N te kabo teuana n te MMA, Felipe e nooria ana utu iaon taian kaintekateka. “Ngaiia ni kabane a takaruaea arau. I rang kukurei n te bwai are I nooria ao I aki kona ni kabwarabwara aron kukureiu.” E reitia, “I a rang kakaitau ibukiia tamau ma tinau, ake a tia ni kaota ae eti ao ae kairua ao n tuangai aika I riai ni karaoi.”
Felipe e namakinna bwa irakin te kawai anne e a tia ni buokia n ana takakaro. Raraona a na bae ni ngareakinna ngkana e aki kona ni karaoa are a karaoia. Ma e aki nanokawaki iai Felipe. “N ai aron ae te euangkerio e uota te kakabwaia, n te takakaro e uota naba te tokanikai! Aki irakin te baka n amwarake ma raraou ao kanakin bwaai aika riai bon ngaia mwiina aika a otinako.”
Rinean te Mwakuri ni Mitinate
Ngkai ai 18 ana ririki, Felipe e rang mwaiti tibwangana. N te tai aei ao e kaoaki bwa e na kataneiai n te kabo ae moan te kakaawaki te MMA academy, ao e anganaki anganano mairouia manatia ni katobibia te aonaaba. Ma e tangiria moa ni karaoa ana mwakuri ni mitinare.
Irou, bon te rinerine ae beebete,” e taku. “Ana kantaninga te Uea bon au moanibwai. Ake imwiina a kona n tataninga, ibukina bwa e kakabwaiako ngkana ko bwaina te ongotaeka.”
Tarin Felipe are e ikawai riki Júnior, are e a tibwa oki man ana mwakuri ni mitinare, bon mwakoron naba kaungaakina. E tuanga Felipe bwa akea te bwai ae tamaroa riki nakon te nako ni mitinare ao e riai n nako e ngae ngkana iai aomata aika a anaa nanona bwa e na aki nako.
Ao Felipe iai aomata aika a tia n tuangnga bwa e na tiku. A mwaiti ana utu aika tiaki kain te Ekaretia. “Akea aia atatai bwa karaoan te mwakuri ni mitinare e boongana riki nakon te kaubwai ao te kinaaki. I bon ti kataia n reirei te euangkerio ngkana a kaoti taai akanne,” e taku Felipe. Ao teuana man taai akanne e kairia nakon karekean ana taneiai ma te mwakuri ni mitinare ae korakora.
Ai tarin Felipe e a tibwa tia ni motirawa, ao ai taman Felipe e taonaki n te nanokawaki ibukin buan natina. Felipe e tuanga ai tamana taekan te babaire ni kamaiu. Imwiina ai tamana e rabwatia ao e kabwara ana bure ngke e tuangnga bwa e na aki nako n ana mition. “E tuangai bwa iai au tarena n riingi nanoia aomata ao I riai n nako ni beku,” e ururing rikaaki Felipe. “Bon te tai ae onoti irou ngkana iai ae akea ana atatai iaon te mition ngkana e a ata raoi oin te kantantaninga ibukina.”
Felipe e reke naba irouna taai ake e aki koaua raoi naba iai n taekan te mition ibon ibukina. “I wareware n au boki ae tabu ni katoa bong, ao n te tairiki teuana e a mwaiti tabeaiangau ibukin au rinerine. I a moaana n iango, ‘E riai bwa N na tiku ao ni iri riki kaboo teutana riki te tai?’ Ma ngke I wareware n ana Boki Moomon n rongorongoia Ni bwaite ake a moanna n aki kakaitau ao ni kainikatonga. Iakobwa e reirei nakoia bwa a riai ni karimoa moa te Uea. [Taraa Iakobwa 2:12–21.] Man te tai anne akea manga te nanououa ibukin au rinerine.”
“N te bong aei I ata te bwai ae I tangiria, ao I ataia bwa ngkana I oki man au mition ao N na kakabwaiaki n aro aika a mwaiti. E kona n riki bwa te MMA ke te bwai riki teuana, ma I ataia bwa te Atua e anganiira bwaai aika ti kainnanoi.”
Mwaakan te Rairaki Nakon te Uea ni Katoabong
Felipe e aki rang unga nanona ke ni mweengaraoi n ana mition—ke te Ekaretia. “Iai taai inanon maiu are I aki korakora iai n te euangkerio, ao ai aron namakinan te bwai ae bua mai irou,” e taku. “Ko ata te aomata are e tii nako n taromauri ao akea riki irarikina? Anne raoi ngai.” Imwiina ana maroro ma tarina ao ana bitiobi iaon taekan te nako ni mitinare, e a baireia bwa e na moana tataroakinana ao warekan ana boki ae tabu ni katoa bong.
“I taku bwa te bwai are e buokai bon te bitaki ni katoa bong. I ikawairake inanon te Ekaretia, ao n te tai anne I aki ukoukora te bitaki ibukina bwa I ikawairake n te mweenga ma te koaua ao te iango are akanne a bon tau. Ma n te tai aei I a ukoukora te koaua ni katoa bong.”
Te Tiambion M ai iroun te Uea
Felipe e ataia bwa rinean te eti e aki nanonaki bwa e na moanna n tainako ke a na nakoraoi bwaai n aron are e kantaningaia. “I uringnga ngke I nakon te kaboo n iangoia bwa I tauraoi, ao I a konaaki n te moan raun. N are te taina ao I a tiku ni mweengau bwa I a ikoaki. I uringnga ngke I moantaai n uti, n taraa te tiiring, n titiraki ngkana a bon uaana. N tabetai I bon tii tangiria n okirikaaki ao ni matu, ma I teiraki ao I nako ni kataneiai. E mwaiti riki ae irekereke ma te riki n tiambion nakon are ti te aua n tokanikai. Bon temanna are e kona n tokanikai ni katoabong, n tokanikai iaon te kabwaka, n tokanikai iaon kataaki.”
Te Tia Kamaiu bon kaungaan nanon Felipe n tokanikai n taraan nako te maiu. “Ngkana ti tangiria ni kan riki n ai arona, ti riai ni karaoa are E karaoia, ni kataia n tainako n tei ni matoa, ni kakorakoraira, ao n iangoa te bwai are E na bae ni karaoia. Anne ae e kaungai n au mwakuri ni katoabong, n riki n ai Arona. Ngkana I noora te bwai ae I kan bitia, I tataro ao I bubuti kabwaraan au bure, ni kataia n tamaroa riki n tainako. Te tiambion ni koaua bon te aomata are e kabwaka n taai aika a mwaiti ao riki i nuukan te itabarara e teirake ao e teimatoa n reitinako.”
“I riki bwa te tiambion mairoun te Uea,” e taku Felipe. “Ngke arona bwa tiaki I bukina, akea au kantaninga bwa N na mena ia. Ma I kakoaua bwa I aki kona ni karekei ni kabane ake I a tia ni kareke i n te bong aei. Maiuakinan te euangkerio e a tia ni karikai bwa te tiambion ni maiu ao n te takakaro.”