Te Kaeka n Tainako bon Iesu Kristo
Te Rongorongo ae Kaeweaki
Teuana te wiiki ma ngkai ao ai Tabatin te Itita!. Bon te bong ae rangi ni kakawaki kauringana n aro nako irouia naake a iriira Iesu Kristo. Oin bukin ae ti bukamarua te Kiritimati bon ibukin te Itita. …
… Ibukin Iesu Kristo, ti kona n rairi nanora ao ni kabwaraaki ara bure. Ibukina, ngaira ni kabane ti na manga kautaki. …
… I bubuti ngkami bwa kam na Nakoina bwa E aonga ni kamaiuko! E na kamaiuko man am bure ngkai ko raira nanom. E na kamarurungko man te nanokawaki ao te maaku. E na kamarurungko man taian korakai man te aonaaba aei.
Tao tera am titiraki ke am kangaanga, te kaeka e aki toki ni kuneaki ni maiun ao n ana reirei Iesu Kristo. Reiakina riki aron Ana Mwakuri ni Kamaiu, Ana tangira, Ana nanoanga, ao Ana euangkerio ni kamarurung ae kaokaki, ao n rikirake. Rairaki Nakoina! Iriiria!
Iesu Kristo bon Ngaia bukin ae ti katei tembora. Ni kabane n tatabeua nako bon Ana auti ae tabu. Karaoan berita aika tabu ao karekean otenanti aika riai n te tembora, n raonaki ma kaaniara Nakoina n te tabo anne, e na kakabwaiaa maium ni kawai aika e na aki kona n reke n aekan nebonebo riki tabeua. Ibukin aei, ti a karaoi bwaai ni kabane ni korakorara bwa kakabwaia n te tembora a na kai reke riki nakoia ara membwa ni kabutaa te aonaaba. …
Tariu ao mwaaneu aika kam tangiraki, I kaota au koaua bwa Iesu Kristo e kaira waakin Ana Ekaretia. I kakoaua bwa Irirakina bon ti te kawai n teimatoa inanon te kukurei.