Ana Anga Reirei Iesu Kristo
Te Rongorongo ae Kaeweaki
N aron are e reireiniira te burabeti Nibwaai, ti riai ni “kanuaingkami n ana taeka Kristo; bwa taraia, a na tuangko ana taeka Kristo bwaai aika ko riai ni karaoi.”1 … Au rongorongo n te tai aei iai inanona mwakoro n ana taeka ara Tia Kamaiu—tera are E taekinna. …
“[Te tua ae korakora ibuakoia taian tua bon aio:] ko na tangira Iehova ae Atuam n nanom ni kabanea, ao n tamneim ni kabanea, ao ni wanawanam ni kabanea.
“Aio te moan ao te tua ae e korakora.
“Ao ai aron naba are te kauoua, Ko na tangira raom n ai aron tangiram i bon iroum.
“E bane te tua ma aia taeka burabeti nako n tauraki n tuua aika uoua aikai.”2 …
“E koaua, e koaua, I taku nakoimi, kam riai n taratara man tataro n taai nako, bwa mwiina ao kam kaririaki iroun te riaboro, ao kam kairaki nako ni kabureaki irouna.”3 …
“Ngaia are, ane kam na karaoia, ao kam na karaoia n arau; ngaia are kam na arana te ekaretia n arau.”4 …
“Ao ngkai aio te tua: Rairinanomi ngkami tokin aonaba, ao nako mai nakoiu ma ni bwabetitoaki n arau, bwa kam aonga ni katabuaki ngkana kam butimwaea te Tamnei ae Raoiroi, bwa kam aonga n tei n akea barekami imatau n te kabanea ni bong.”5 …
Ti kakoaua iroun Kristo. I kainiin ma are E taekinna ibukin arora ae ti riai n ataia n iriira Ana anga reirei:
“Ma te tia Buobuoki, are te Tamnei ae Raoiroi, are E na kanakomaia te Tama n arau, E na reireiningkami bwaai ni kabane, ao E na kaururing i nanomi bwaai ni kabane ake I atongi nakoimi.”6