Ikotaki nakon Mweengara ma te Kamanoaki
Te Rongorongo ae Kaeweaki
Taman tamneira e tangiriia natina bwa a na ikotaki nakon mweengaia ma te kamanoaki. …
Naake a butimwaea ana euangkerio Iesu Kristo, n aki tabe ma te kateiriki, a riki bwa mwakoron Iteraera ae ikotaki. Man te ikoikoti anne ao katean ao katanoataan tembora aika mwaitin, ti mena n te mwaneka ae onoti n ikota Iteraera n iteran te rabuna aika uoua n aron ae tuai riki mai imwaaina iaan ana babaire te Tama. …
Ti kakaitau bwa kaain te aro ao mitinare a karababa riki aia konabwai n ikoikota Iteraera are e a uamaenako. … E ngae n anne, ara motinnano n tangira, n tibwatibwa, ao ni kakao e rikirake n rababa nako.
Mwakoron te waaki ae kakawaki n te mwakuri ni mitinare bon ibukiia kaain te aro bwa a riki bwa banna ni katooto ibukin te oota n taabo ake ti maeka iai. Ti na aki karabaira. Ara banna ni katooto n akoi n aron Kristo, te raoi, te kukurei, ao te tangira ae koaua ibukiia aomata ni kabane e aki tii riki bwa te biikan are e kaotaa kawaia ma n ataakina naba bwa iai te tabo ae mano inanon otenanti ni kamaiu ao te karietataaki n ana euangkerio Iesu Kristo ae kaokaki. …
Ti karinea te inaomata n rinerine. N te aonaaba aei, a mwaiti aika a na aki kaeka ao n ira waakin te mwakuri n ikotakin Iteraera. Ma angiina a na bon karaoia, ao te Uea e kantaningaia naake a butimwaea Ana euangkerio ni waekoa n riki bwa katooto ibukin te oota are e na buokiia tabeman aomata n nakon te Atua. Aei e anganiia tarira ma mwaane ni kabuta te aonaaba bwa a na kona ni karekei kakabwaia mai karawa ao otenanti n ana euangkerio Iesu Kristo are e kaokaki ao n Ikotaki nakon mweengara ma te kamanoaki.