Aapa Atu mo Lona Malosi

I le Evagelia a Mareko, ua tatou faitau ai e uiga i se fafine sa gasegase mo le 12 tausaga. Sa ta’u atu e se tasi ia te ia e uiga ia Iesu. O lea, ina ua ui atu o Ia i lona nuu, sa nofo o ia i autafa o le auala, ma faatalitali. A o ui ane o Ia, sa aapa atu le fafine ma le filemu e pa’i atu i le pito fua o Lona ofu talaloa.

Sa vave lava ona faamaloloina o ia. Ae sa le na o ia lea na matauina lena vavega; sa faapena foi Iesu. “Ua silafia loa e Iesu i lona lava finagalo, ua alu atu le mana nai ia te ia, ona faliu lea o ia i le motu o tagata, ua faapea atu, “Po o ai ea na pa’i mai i o’u ofu?” (Mareko 5:30). O le mamā e mafai foi ona faauigaina o le malosi. Sa vave ona silafia e Iesu ua maua e se tasi le malosi mai ia te Ia. O Lana tali vave atu o le sailia lea o ia, talanoa ma ia, ma faamanatu ia te ia le mana o le faatuatua. Sa Ia valaau o ia “afafine.” E ala mai ia te Ia, na faaatoatoaina ai o ia.

Ua ou aoaoina o se tatalo mo le malosi e le taitai lava ona aunoa ma sona tali. Afai tatou te aapa atu ia te Ia, Na te “tali lilo mai, O’u manaoga” (tagai i le Viiga, nu. 68). O tusiga taitasi i le mekasini o lenei masina o se faamanatu o lena upumoni.

I le Mo Le Malosi o le Autalavou: O Se Taiala mo le Faia o Filifiliga, ua aoao mai ai le Au Peresitene Sili e faapea “o le Faaola … o le ‘malosi o le autalavou’” ([2022], 2). Atonu e te taumanatunatu pe faapefea ona maua lena malosiaga. Ou te faamoemoe o le a outou maua se vaega i totonu o nei itulau lea o le a taitai atu ai outou e aapa atu mo Ia.

Suesue i nei itulau. Vaavaai mo upu o le faamoemoe, sue se mau o le malosi, tusi i lalo ni uunaiga na tuua ai se lagona patino i lou loto. E ala atu ia Iesu Keriso, o le a faaatoatoa ai foi oe.

Ata

Emily Belle Freeman

Ma le alofa tele,

Emily Belle Freeman

Peresitene Aoao o Tamaitai Talavou