Malosiaga mai Tusitusiga Paia

O Mau e 12 mo Taimi E Te Lagona ai le …

Saunia e Kyla Kaye Hill

O Mekasini a le Ekalesia

Ua tumu tusitusiga paia i musumusuga, e tusa lava po o a o tatou lagona.

Ata na tusia e Toby Newsome

I ni nai tausaga ua mavae, sa amata ai ona lagonaina e Elisapeta A., 17, mai Arisona, ISA, le popolevale, ma sa faateteleina le leaga. “Sa ou lagonaina i le aso atoa, i aso uma,” o lana tala lea. “Sa faigata ia te a’u ona faaumaina se aso.”

Ina ia maua le mafanafana, sa tonu ai ia Elisapeta e faitau tusitusiga paia i po uma. I le aluga o taimi, sa amata ona ia lagonaina le fiafia sili atu.

“Sa ou iloa sa le’i tuua na o a’u,” o lana tala lea. “Sa ou iloa e alofa le Atua ia te a’u ma auina mai Lona Alo, o Iesu Keriso, o le na lagonaina o tatou tiga, lototiga, faanoanoa, ma le mafatia. E ala mai i tusitusiga paia, ua i ai sa’u sootaga malosi ma Keriso ma se vaaiga lelei tele i le olaga!”

Na aoaoina e Elisapeta ua tumu tusitusiga paia i fuaiupu ma tala e uiga i le auala e maua ai le faamoemoe, filemu, ma le malosi e maua ia Iesu Keriso. O le tele o a tatou toa mai tusitusiga paia e sili ona fiafia i ai sa feagai ma tulaga faigata. Ma i tulaga uma lava, sa latou maua le faamoemoe, filemu, ma le malosi ina ua latou liliu atu ia Iesu Keriso.

O le faitauina o tusitusiga paia atonu e le foia ai mea o loo feagai ma oe, ae o upumoni o loo aoaoina i tusitusiga paia e mafai ona tuuina atu ia te oe le malosi ma le toomaga. O ni nai mau nei e mafai ona e sueina pe a e manaomia se manatunatuga musuia mo oe lava po o se uo. E mafai ona e sue ni au oe lava mau?

Pe a lagonaina le …

Faanoanoa: Mataupu Faavae ma Feagaiga 68:6

O le mea lea, ia fiafia, ma aua le fefefe, aua o Aʼu o le Alii ua Ou faatasi ma outou, ma o le a tu i tafatafa o outou;

Le Atoatoa: Luka 12:6–7

A o outou lauulu lava ua faitaulia uma ia. O lena, aua tou te matatau ai; ua sili outou i manu iti e tele.

Maasiasi: Isaia 54:8

A o le alofa e faavavau ou te alofa atu ai ia te oe.

Faanoanoa [Vaivai le Loto]: Alema 26:27

Tauave ma le onosai ou puapuaga, ma o le a Ou tuu atu ia te outou le manuia.

Leai se Faamoemoe: Moronae 7:41

O le a outou maua le faamoemoe e ala i le togiola a Keriso ma le mana o lona toetu.

Vaivai: Eteru 12:27

Aua afai latou te faalotomaualalaloina i latou lava i ou luma, ma faatuatua mai ia te au, ona ou faia lea o mea vaivai ia avea ma mea malolosi ia te i latou.

Popolevale: Mataupu Faavae ma Feagaiga 84:88

O le a Ou i ai i lo outou lima taumatau ma lo outou agavale, ma o le a i ai lo’u Agaga i o outou loto, ma siʼo faataamilo outou e aʼu agelu, e sapasapai outou i luga.

Tiga: Salamo 30:2

Le Alii e lo’u Atua e, na ou tagi atu ia te oe, ma ua e faamaloloina a’u.

Fefe: Iosua 1:9

Ia e faamalosi, ma lototele … aua o Ieova lou Atua o loo ia te oe i mea uma e te alu i ai.

Tuuatoatasi: Ioane 14:18

Ou te le tuua outou o matuaoti: ou te sau ia te outou.

Ita: Moronae 7:48

Tatalo atu i le Tamā ma le malosi atoa o le loto, ina ia faatumulia outou i lenei alofa.

Lē Onosai: Mataupu Faavae ma Feagaiga 100:15

O lea, ia faamafanafanaina o oulua loto; ona o le a galulue faatasi mea uma mo le lelei o e e savavali sa’o.