“O Le Vavega Tatou te Manaomia i Aso Uma,” Mo Le Malosi o le Autalavou, Mat. 2024.
Malosi e Faatoilalo Ai Agasala
O Le Vavega Tatou te Manaomia i Aso Uma
Afai e alofa le Atua ia i tatou, aisea ua Ia fetalai mai ai ia i tatou ia sui ma salamo? O nisi nei o upumoni e uiga i le agasala ma le taulaga togiola a Iesu Keriso.
Ata na tusia e Adam Howling
Ae faapefea pe afai na mafai ona e molimauina vavega na faia e Iesu Keriso i le taimi o Lona soifuaga i le lalolagi? Matamata ia te Ia o faamalolo i e mama’i ma faatutu mai e ua oti? E ui lava e le mafai ona tatou toe foi i tua i le taimi e vaai ai i na vavega, ae o loo i ai se tasi o vavega a Iesu Keriso e mafai ona tatou vaai i ai i aso uma. Ma o se tasi o mea aupito sili ona taua o mea uma: Na Ia faatoilaloina le agasala.
O le Mea Moni e uiga i le Agasala
Atonu e taumanatunatu nisi pe aisea ua avea ai lena mea ma se mea telē. Aua, e tusa lava pe tatou te faia se mea sese iinei ma iina, e alofa pea le Atua ia i tatou, a ea? Ia, ioe, e alolofa tele le Tama Faalelagi ma Iesu Keriso ia i tatou. Ae ona o lo La alofa tele ia i tatou, e i ai ni isi o vaega i lenei tala.
Ina ua Ia asiasi atu i sa Nifae, sa aoao ai i tatou e le Faaola pe aisea e taua tele ai le faatoilaloina o le agasala: “E leai se mea le mama e mafai ona ulu atu i le malo [o le Atua]” (3 Nifae 27:19).
E le’i fetalai mai o Ia, “e leai se mea le mama vagana ai ni nai mea sese laiti.” Sa Ia aoao mai o soo se ituaiga o agasala (o le le usitai ma le loto i ai i poloaiga a le Atua) e taofia ai i tatou mai le toe nonofo faatasi ma Ia.
O se faafitauli lena mea. E le mafai ona tatou mulimuli atoatoa i le taimi nei i poloaiga a le Atua. E moni lenei mea mo tagata uma—o le perofeta e sili ona amiotonu, o le tagata agasala sili ona amioleaga, ma tagata uma i le va. Talu ai e le mafai ona tatou tafiesea a tatou lava mea sese, o le a taofia i tatou e le agasala mai le ulu atu i le malo o le Atua.
O Le Vavega o le Togiola a Keriso
Ma le lotofaafetai, sa silafia e le Tama Faalelagi ma Iesu Keriso lo tatou manaomia o le fesoasoani. I le Faatoaga o Ketesemane ma luga o le satauro, na tauave ai e Iesu Keriso i Ona lava luga o tatou tiga uma, ma’i, puapuaga, vaivaiga, ma agasala (tagai i le Alema 7:11–13). Ona o Ia o le Alo atoatoa o le Atua ma o le atalii faaletino o Maria, na mafai ai ona Ia totogia le tau o le agasala lea e leai se tasi e mafai ona totogia.
O le mafuaaga lena na mafai ai ona Ia fetalai atu i sa Nifaē, “O lea e leai se mea e ulu atu i lona malologa [le Atua] vagana ai i latou o e ua faamamaina o latou ofu i lo’u toto, ona o lo latou faatuatua, ma le salamo i a latou agasala uma, ma lo latou faamaoni e oo i le iuga” (3 Nifae 27:19).
Oka se vavega ona o Iesu Keriso, ua mafai ai ona faamamaina i tatou mai a tatou agasala! O le taimi lava tatou te iloa ai o le taulaga togiola a le Faaola e manaomia mo i tatou, e mafai ona tatou faalagolago i Lona malosi a o tatou faatuatua ia te Ia, salamo i a tatou agasala, ma faaauau pea ona mulimuli ia te Ia i le faamaoni e oo i le iuga. O se vavega e mafai ona tupu i aso uma pe a e faamoemoeina Lona mana ma faatino i le faatuatua!