“O Oe ma le Faaola, ma le Lalolagi” Mo Le Malosi o le Autalavou, Mat. 2024.
Malosi e Faatoilalo ai le Lalolagi
O Oe ma le Faaola, ma le Lalolagi
O mea faalavefau, faaosoosoga, sauaga—ua manumalo Iesu Keriso i mea o lenei lalolagi ma e mafai ona faamalosia ai oe e faatoilalo foi.
Ata na tusia e Alex Nabaum
Na manumalo Iesu Keriso i le lalolagi, ma ua Ia valaaulia i tatou ia faia foi faapea. Ae o le a “le lalolagi,” ma o le a le uiga ia i tatou o le faatoilaloina?
Na faauigaina e Peresitene Russell M. Nelson faapea: “[Manumalo i le lalolagi] o lona uiga o le faatoilaloina o le faaosoosoga ia popole atili i mea o lenei lalolagi nai lo mea a le Atua.”1
O “mea o lenei lalolagi” e mafai ona aofia ai meatotino, lauiloa, paoa, viiga, tuinanauga, po o soo se isi lava mea e olioli ai le tagata o le lalolagi o se vaega o le olaga faaletino. E tusa lava pe o nisi o nei mea e le leaga i taimi uma, pe a aveesea la tatou taulaiga i le Atua ona o loo tatou popole atili i mea faalelalolagi, tatou te oo ai i faafitauli mo se taimi umi.
Na aoao mai Iesu Keriso o le a tatou feagai ma mea faafeagai ma sauaga a o tatou manumalo i le lalolagi (tagai i le Ioane 15:18–21). Ae e mafai lava ona tatou maua le filemu ma “ia outou lototetele” aua na Ia manumalo muamua i le lalolagi (Ioane 16:33).
Sa maua e nei talavou le malosi ia Iesu Keriso e faatoilalo ai faafitauli faalelalolagi, ma e mafai foi e outou!
O Faalavefau Faalelalolagi
Sa ou faaaluina le tele o itula e taalo ai i taaloga komepiuta i aso uma mo le tele o tausaga. Sa ou maua ni uo, ma sa ou lagonaina [lo’u] taua. Ae a uma ona taalo, ou te lagona le gaogao, e pei o i ai se mea o loo misi. Sa le atoatoa lo’u fiafia.
Sa ou manao e taulai atu i mea o le a ou maua moni ai le fiafia ma fesoasoani ia te a’u ia alualu i luma. Sa amata ona ou tatalo soo. Ina ua ou faailoa atu le mea sa i lo’u loto i le Tama Faalelagi, sa ou lagonaina se lagona malosi o le alofa.
Sa ou manao e fai mea o le a ou latalata atili ai ia Keriso, o lea sa ou taulai atu ai i mea faigofie e pei o le suesue i tusitusiga paia i aso taitasi ma le tatalo, faaaluina o le taimi ma tagata sa i ai le Agaga, ma taumafai ia aua nei faalavelaveina a’u i mea o le a aluese ai le Agaga Paia. Sa suia lo’u olaga. Ua sili atu le faafiafiaina mo a’u.
Pe a ou latalata atili atu ia Keriso, ou te iloa ai e i ai mea e sili atu le taua nai lo taaloga komepiuta, pe afai ou te manao ia fiafia moni. E i ai mea e faavavau.
Alina U., 18, Lituania
O Tulaga Faalelalolagi
I le aoga, sa sauaina a’u ma tauemuina ona o o’u talitonuga. Ona o lena mea ma isi luitau, sa ou lagona ai le pei ua pa’u mai le lalolagi ia te a’u. Ae sa faamalosiauina a’u e lo’u tina e faalagolago i le Togiola a Iesu Keriso aua e malamalama o Ia i o’u tiga ma e mafai ona aumaia ai ia te a’u le filemu ma le mafanafana (tagai i le Mataupu Faavae ma Feagaiga 19:23).
Sa ou filifili e folafola atu i le Tama Faalelagi o le a ou anapogi e le aunoa. Sa ou ole atu ia te Ia e fesoasoani mai ia te a’u i o’u vaivaiga ma tauiviga, ma sa Ia faia lava talu mai lena taimi.
O le anapogi ua ou latalata atili atu ai i le Tama Faalelagi ma Iesu Keriso. Ou te iloa e i ai pea i La’ua i o’u autafa, ma tuuina mai ia te a’u le malosi e faatoilalo ai o’u luitau ma maua ai le fiafia moni. Ua faamaloloina e Iesu Keriso o’u manu’a ma fesoasoani ia te a’u e toe foi atu i lo’u Tama Faalelagi.
Vera R., 17, Brasília, Pasila