“O Afea O Le A Ou Tuu ai le Lagonaina o le Tausalaina ma le Maasiasi?,” Mo Le Malosi o le Autalavou, Mat. 2024.
Malosi e Faatoilalo Ai Agasala
O Afea O Le A Ou Tuu ai le Lagonaina o le Tausalaina ma le Maasiasi?
O nisi taimi atonu e foliga mai e faigofie atu ona lagona le leai o se faamoemoe e uiga ia te oe lava nai lo le lagonaina o le alofa o le Faaola mo oe—ae e pei ona iloa e Nifae, e le tatau ona faapena.
A e faia se mea sese, atonu e i ai ni ou mafaufauga e oo atu i lou mafaufau o oe o se tagata toilalo. Sa tatau lava ona e iloa lelei. E te le agavaa mo le alofaina.
I le taele o lou loto, ua e iloa e leai se mea o na mea e moni. Ua e aoao e uiga i lou taua o se atalii po o se afafine o le Atua, ma ua e iloa o le salamo e moni ma e mafai ona faia. Ae peitai, a uma ona e agasala pe faia se mea sese, atonu o le a faaosoosoina oe e faasala oe lava e sili atu nai lo le tulaga e faia ai e se isi tagata, i ni mafaufauga o le tausalaina ma le maasiasi.
E oo lava i nisi o tagata autu i tusitusiga paia sa i ai taimi sa manatu ai faapea.
E oo lava ia Nifae?
Ina ua uma ona ia tusi e uiga i le maliu o lona tamā, na tusia ai e Nifae, “Ae ui i lea, e ui i le agalelei tele o le Alii, i le faaali mai ia te a’u o ana galuega tetele ma le ofoofogia, ua alaga a’e pea lo’u loto: Aue, le tagata noa e ua i ai a’u!! Ioe, ua faanoanoa lo’u loto ona o lo’u tino; ua momomo lo’u agaga ona o a’u amioletonu. Ua siosiomia lava a’u, ona o faaosoosoga ma agasala ua faigofie ona ponatia ai a’u. Ma pe a ou fia olioli, e oi lo’u loto ona o a’u agasala” (2 Nifae 4:17–19).
O Nifae lenei o loo tatou talanoa i ai—le tagata lava lea e tasi na faasaoina papatusi apamemea mai ia Lapana, na faia se aufana mai nai fasimea i le vao, ma fauina se vaa ae na te le’i fausia muamua lava se vaa. Sa i ai sana molimau i le agalelei o le Alii; e ui i lea, sa ia lagonaina le lē agavaa ona o ana agasala ma vaivaiga.
Ia, o le a la se mea tatou te faia? Pe afai na tauivi la tatou toa o le Tusi a Mamona ma lagona o le tausalaina ma le le atoatoa, o le a se mea e mafai ona tatou faia pe a tatou lagonaina lea lava mea e tasi?
O Le Ki o le Taulai Atu ia Iesu Keriso
E lei uma ai iina le tala a Nifae. O le ki mo Nifae o le siitia ese atu lea o lana taulaiga mai ia te ia lava ia Iesu Keriso.
A’o tagitu’i Nifae, ua ia fai mai, “Ae ui i lea, ua ou iloa lē ua ou faalagolago i ai. Sa avea lo’u Atua ma o’u toomaga” (2 Nifae 4:19–20).
Ina ua uma lenei siitaga i le mafaufau, ua le o toe taulai atu la tatou toa i tusitusiga paia i le tiga na te lagona mai ana mea sese. Ae, ua olioli o ia i lona Faaola! Ua fai mai Nifae, “Olioli ia, loʼu loto e, ma tagi atu i le Alii, ma fai atu: Le Alii e, o le a ou viia oe e faavavau; ioe, o le a olioli loʼu agaga ia te oe, loʼu Atua e, ma le papa o loʼu olataga” (2 Nifae 4:30).
E pei o Nifae, e mafai ona e maua le alofa mutimutivale, faamagaloga, ma le filemu e ala ia Iesu Keriso. Atonu e te le lagonaina e mafai ona e tuuina atu ia te oe lava le alofa tunoa, ae o loo i ai se Tasi o le a faia. Na saunoa mai Elder Jeffery R. Holland o le Korama a Aposetolo e Toasefululua, “O le alofa tunoa o Keriso ua ofoina mai ai ia i tatou e le gata o le faaolataga mai le faanoanoa ma le agasala ma le oti ae faapea foi le faaolataga mai a tatou faitioga faifai pea ia i tatou lava.”1
O lea la, pe a e lagonaina le maualalo tele lea e te le vaaia ai se auala e faatoilalo ai au agasala ma mea sese, ia iloa e lei taofia lava e le Tama Faalelagi ma Iesu Keriso le alofa ia te oe. Tuu lau taulaiga i lou Faaola, ma e mafai ona Ia fesoasoani ia te oe e faatoilalo au agasala ma lou tausalaina.