“Fesoasoani Faigofie ma le Mamana i Isi ia O Mai ia Keriso,” Mo Le Malosi o le Autalavou, Mati 2024.
Fesoasoani Atu ma le Faigofie ma le Mamana i Isi ia O Mai ia Keriso
Ua i ai auala e le mafaitaulia e faaali atu ai le alofa, faasoa atu ou talitonuga, ma valaaulia isi e o mai ia Iesu Keriso.
I se tasi aso i lou tausaga ogatotonu i le aoga maualuga, sa fesili mai ai lau uo o Nedra ia te au, “Russ, aisea e te le alu ai i le seminare?”
I lena taimi, sa le’i o o’u matua i le lotu. Sa na o nisi taimi ou te auai ai ma a’u uo, ma ou te le’i auai i le seminare. O le aso na sosoo ai, sa ou auai i le seminare i le 6:30 i le taeao. Ina ua mavae lena, sa ou alu i aso uma—e oo lava i taeao malulu ma le kiona o le taumalulu.
O mea na ou aoaoina i le seminare na ootia ai lo’u loto. Sa tuputupu ae la’u molimau a o ou aoao atili e uiga ia Iesu Keriso ma Lana talalelei toefuataiina. O lenei mea na saunia ai a’u e auauna atu i la’u misiona i Egelani ma faaauau ai pea i le olaga atoa o le auauna atu i le Alii ma Lana Ekalesia.
O le valaauliaina o au e Nedra i le seminare na fesoasoani ou te iloa ai, i se auala patino, o loo i ai avanoa e le mafaitaulia mo oe e fesoasoani ai i isi ia o mai i le Alii o Iesu Keriso. I ni auala faigofie ae mamana, e mafai ona e faaali atu ai lou alofa, faasoa atu ou talitonuga, ma valaaulia i latou o siomia oe ia lagona le olioli ma le filemu e aumaia e le Faaola ma Lana talalelei.
O Mai ia Iloa le Faaola
Ina ia fesoasoani moni i isi ia o mai ia Keriso, e tatau ona e malamalama muamua po o ai o Ia. O Iesu Keriso o le Alo o le Atua ma e na o ia lava e mafai ona avea ma Faaola ma Togiola o le lalolagi.
E na o Ia lava e mafai ona soifua i se olaga atoatoa, togiola mo au agasala, mafatia i ou “tiga ma puapuaga ma faaosoosoga” uma (Alema 7:11), ona tuuina mai lea o Lona soifua ma toe aveina a’e. Ona o Iesu Keriso, o le a toe tutu mai ai fanau uma a le Atua ma mafai ona maua Ana faamanuiaga sili ona paia ma mamalu.
A o e malamalama po o ai le Faaola—ma po o le a lou taunuuga e faavavau e mafai ona i ai ona o Ia—o le a e manao e ola i lou olaga i se auala e faafiafiaina ai o Ia. Ma e mautinoa lava e fiafia ia te Ia pe a e folafola atu Lana talalelei, i upu ma galuega, ia i latou tou te fegalegaleai i aso taitasi.
Aapa Atu ma le Alofa
A oo ina e iloa ma alofa i le Faaola, o le a e manao e mulimuli atili ia te Ia ma Ana aoaoga, e aofia ai Lana poloaiga ia “outou fealofani” (Ioane 13:34).
Ina ua alu atu Amona i sa Lamana e talai atu le talalelei, sa ia ofo atu e avea ma auauna a le Tupu o Lamonae. Sa faaalia e Amona le alofa moni ma le tuuto ina ua ia puipuia mamoe a le tupu. O amioga a Amona na faamaluluina ai le loto o le Tupu o Lamonae. Ina ua aoao atu e Amona le talalelei, sa lofituina e le Agaga le Tupu o Lamonae, ma sa liua o ia (tagai Alema 17–19).
O le avea ma se soo moni o Iesu Keriso o lona uiga o le alofa atu i ou tuaoi e pei o oe lava ia te oe (tagai Mataio 22:36–40). Afai e mafai ona latou lagona e te alofa ma popole mo i latou, atonu o le a sili atu ona latou naunau ina ia e faasoa atu na mea ua e iloa e moni.
Maua le Lototele e Faasoa Atu
Na ala mai i le Perofeta o Iosefa Samita, na toefuatai mai ai e le Faaola le perisitua i le lalolagi faatasi ai ma sauniga ma feagaiga uma e tatau ai mo lo tatou alualu i luma e faavavau. O le taimi lava e pa’i atu ai le savali matagofie o le Toefuataiga i lou loto, e tatau loa ona e manao e ee atu mai tumutumu o fale! E tatau ona e auai ma le naunautai i le faasoaina atu o le malamalama taua o le talalelei toefuataiina i tagata uma. Ou te fiafia e fai lena mea!
Atonu e popole nisi o le a le fiafia pe teena foi e isi mea latou te faasoa atu. Ioe, e ono tupu lena mea. Ina ua tamoe solo Apiso mai lea fale i lea fale ma ta’u atu i tagata ua oo mai le mana o le Atua i luga o le Tupu o Lamonae ma lona aiga, sa talitonu nisi, ae o le toatele o isi na filifili e le faalogo (tagai Alema 19:17–31).
Pe latou te taliaina pe leai, o le meaalofa silisili e mafai ona e tuuina atu i se uo po o se tagata o le aiga—po o se fili foi—o le talalelei a Iesu Keriso. Tatalo mo le lototele, ona, pe a talafeagai ai, faasoa atu mea ua e iloa e moni.
Tuuina atu se Valaaulia Mai le Loto
A o auauna ai o se peresitene o le Misiona a Kanata Toronto, sa ou fesoasoani i nisi o a’u faifeautalai i le aoaoina o se tagata faipisinisi lauiloa. Ina ua uma le matou lesona, sa ou valaauliaina o ia e tatalo ma ole atu i le Tama Faalelagi pe moni le matou savali.
“Ou te le iloa tatalo!” na ia fai mai ai.
Sa ou fai atu ia te ia, na pau lava le mea e manaomia ona ia faia o le tootuli ma ole atu i le Tama Faalelagi e faamautu mai le upumoni ia te ia.
“E mafai ona e faia le mea lena!” Sa ou faamalosiau atu ai ia te ia.
Sa matou tootutuli faatasi ma amata ai e le tamaloa lana tatalo. Ina ua uma, sa ia fai mai, “O le a le mea ua tupu? Ou te lei lagonaina muamua lava se mea faapenei.”
“O le ala lena e tali mai ai e le Tama Faalelagi ia tatalo,” sa ou fai atu ai. “Ua e ole atu, ma ua Ia tali mai.”
Ou te aoaoina i taimi uma faifeautalai ma tagata o le ekalesia i le lalolagi atoa e faapea, o le liua e amata i mea e lagonae tagata. Pe a e valaaulia isi e faalogo i le talalelei, valaaulia foi i latou e tatalo ma ole atu ia lagona le moni i o latou loto. Afai o le a latou ole atu i le Atua (tagai Iakopo 1:5) ma se loto faamaoni, ma le manatu moni ma le faatuatua ia Keriso, e mafai ona latou maua se faamautinoaga o le upumoni e ala i le mana o le Agaga Paia (tagai Moronae 10:4–5). E ese le manaia ma le fiafia o le fesoasoani atu i isi ia iloa le upumoni mo i latou lava.
Ia Manatua e Taua Agaga Uma
E te le iloa lava le mea o le a tupu pe a e fesoasoani i isi ia o mai ia Keriso e ala i le alofa, faasoa atu, ma valaaulia. Mo se faataitaiga, o sa Lamana, sa foliga mai o ni tagata sili ona le talia le talalelei, ae sa oo ina liua tele i latou ma sa “le’i pauu ese lava” (Alema 23:6–7).
E le tatau ona e faamoemoeina lenei taunuuga i taimi uma e te faasoa atu ai le talalelei. Ae i le faigofie ma le mamana, e mafai ona e molimau atu e uiga i le upumoni ma fesoasoani e faailoa atu le tele o fanau a le Tama Faalelagi i le talalelei toefuataiina.
Pe a e iloaina le taua tele o fanau uma a le Tama Faalelagi ia te Ia, o le a e manao e faia mea uma e te mafaia e fesoasoani ai i isi e o mai ia Keriso ma laa atu i le malamalama o Lana talalelei ma agai atu ai i le ala o le tino ola pea ma le ola e faavavau.
O le a se aafiaga sili atu e mafai ona e maua i le olaga?