“Pe a Oo Mai le Faanoanoa,” Mo Le Malosi o le Autalavou, Mat. 2024.
Malosi i Taimi o Faanoanoaga
Pe a Oo Mai le Faanoanoa
Pe a oo ina e lagona le toilalo i le olaga, e mafai e Iesu Keriso ona siitia oe i le faamoemoe.
Ata na tusia e Dean MacAdam
E mafai ona e alu mamao lava i le olaga e ala i le galue malosi ma le naunautai. E mafai ona e vave moe, ala vave i luga (tagai i le Mataupu Faavae ma Feagaiga 88:124), ma faatumuina aso taitasi i mausa amiotonu ma le amio pulea.
Ae peitai, o nisi lava aso o le a sili atu ona faigata nai lo isi.
Ma i nisi aso patino lava … ia, e matua lagona le faigata tele e ao ai ina amata ona e mafaufau ua mou atu aso lelei e faavavau.
O le a lau mea e fai i na aso? O le a lau mea e fai pe a e taumafai i le mea sili, e aofia ai au taumafaiga silisili e ola i se olaga amiotonu (tatalo, anapogi, suesue i tusitusiga paia, auai i le lotu ma le malumalu, ma isi mea faapena), ua foliga mai e le lava? Pe a e unai ma unai faasagatau atu i le faanoanoa, ae e foliga mai e sili atu ona malosi le toe tuleia mai i tua?
Ioe, e te liliu atu ia Iesu Keriso. O le faamoemoe o se meaalofa faaleagaga (tagai i le Moronae 8:26). Ma o meaalofa faaleagaga uma e mai ia Iesu Keriso (tagai i le Moronae 10:17).
Pe a mamafatu faigata o le olaga e pei o se mauga ua pa’u mai le lagi, o le meaalofa faaleagaga o le faamoemoe e mafai ona fai mo oe a o e taulai atili atu ia Iesu Keriso.
“E Faamāmāina e le Alii A’u Avega”
Ua leva ona luitauina le olaga mo le toatele o Tagata Venesuela a o lei o’o mai le faama’i pipisi o le KOVITI-19 i le 2020, ae na oo lava i vaega laiti o le olaga ua i ai i se tulaga faigata. Mo Sebastian e 11 tausaga, ma lona aiga, sa manaomia le malosi mai ia Iesu Keriso e tumau ai i faalogona lelei ma le fiafia i taimi o faanoanoaga. “Ou te lagona le mafatia pe a le mafai ona matou faatau mai ni oloa e tatau ona i ai e pei o meaai, lavalava, ma talavai,” o le tala lea a Sebastian. “Ae e i ai lo’u faatuatua o le a faaauau pea ona faamanuiaina i matou e le Alii. Ou te lagona le faamanuiaina ona sa mafai ona ou mauaina lo’u faamanuiaga faapeteriaka. E ta’u mai ai ia te a’u mea na folafola mai ia te a’u ae ou te lei sau i le lalolagi.”
O le taulai atu ia Iesu Keriso o se vaega o le autu a le autalavou i le tausaga ua mavae (“Ou te mafaia mea uma lava i le faamalosi mai o Keriso” [Filipi 4:13]) ua faamaonia o se fesoasoani tele. “Ona o faigata o loo feagai ma lo’u atunuu, o le autu a le autalavou mai le tausaga ua tuanai na faamanatu mai ai ia te a’u o le a fesoasoani mai Keriso ia te a’u e faatoilalo ma faia mea uma e ala atu ia te Ia,” o le tala lea a Sebastian.
O se malaga umi, ae ua vaai Sebastian ma lona aiga i faamanuiaga ma le faamoemoe i luga o le ala. “E faamāmāina e le Alii a’u avega,” o lana tala lea. “Pe a ou faanoanoa, ou te tatalo, suesue i tusitusiga paia, ma faitau lo’u faamanuiaga faapeteriaka. Faafetai ia te Ia, o la matou pisinisi o tusi ma mea aoga lea na matou amataina i le tolu tausaga talu ai ua sili atu ona faamanuiaina i lenei tausaga. Ou te fia ta’u atu i isi tagata talavou e tatau ona latou saunia i taimi uma e faalagolago ia Iesu Keriso. Pe a ou faia lena mea, e mafai lea ona ou faatoilaloina ou luitau.”
Malosi e ala i le Taulaiga Sili Atu
Na aoao mai e le perofeta o Nifae, o le sa onosaia faigata maoae i lona olaga atoa, lenei upumoni matagofie:
“Fetaomi atu i luma ma le tumau ia Keriso, ma se susulu atoatoa o le faamoemoe ma le alofa i le Atua ma tagata uma. O le mea lea, afai o le a outou fetaomi atu i luma, ma taumamafa fiafia i le afioga a Keriso, ma tumau e oo i le iuga, faauta, ua faapea ona fetalai mai o le Tama: O le a outou maua le ola e faavavau” (2 Nifae 31: 20).
O le faamoemoe, o se punavai mamana o le malosi e faasagatau atu i le faanoanoa, e oo mai pe a tatou taulai atu ia Iesu Keriso. Pe ua oo ea i le taimi e siitia atili atu ai lou taulaiga ia te Ia?