O Lou Leoleo Mamoe i Vanu o le Fefe

Saunia e Marissa Widdison

O Mekasini a le Ekalesia

I taimi o le popolevale, e mafai ona tatou faalogo mo le siufofoga o lo tatou Leoleo Mamoe.

O se tasi o mataupu e sili ona lauiloa i tusitusiga paia o le Salamo 23. O tagata faamaoni i le salafa o le lalolagi mai le tele o tapuaiga o loo faaauau pea ona maua le mafanafana i nei fuaiupu na tusia i le tele o tausaga ua mavae.

“O Ieova o lo’u leoleo mamoe o ia; e leai se mea ou te mativa ai.

Na te ave a’u i le mea o i ai le vao mu’a ou te taoto ai: na te taitai ia te a’u i tafatafa o vai e tafe lemu.

Na te faafoisia mai lo’u agaga: na te taitai ia te a’u i ala o le amiotonu ona o lona suafa.

E ui lava ina ou savali i le vanu o le ata o le oti, ou te le fefe lava i se mea leaga; aua o oe ta te faatasi ma a’u; o lau laau ma lou tootoo e faamafanafanaina ai a‘u.

E te laulau mea i le laoai ma a’u i luma o ē ita mai ia te a’u: ua e faauuina lo’u ulu i le suauu; ua taumasuasua la’u ipu.

E moni, e mulimuli mai ia te a’u le agalelei ma le alofa i aso uma o lo’u ola: ou te nofo foi i le fale o Ieova i aso e tele lava.

Na i ai se taimi na e i ai faatasi ma ni mamoe? E fai si mate’ite’i ma e amata ona tamomoe i leo leotetele po o gaoioiga. E le lauiloa i latou o ni manu e le fefefe! Ma atonu o se mea lena e mafai ona tatou aoao mai i lenei upu valiata—ua silafia e le Alii o le a lagona e i tatou taitoatasi le fefe i nisi o taimi. E leai se maasiasi i lena mea! O se vaega o le luitau o le olaga faaletino. I na taimi popolevale, e mafai ona tatou faalogo mo le siufofoga o lo tatou Leoleo Mamoe. O loo Ia taumafai e taiala i tatou i “vao mu’a” o le filemu ma le saogalemu. O nisi nei o auala ua Ia valaaulia ai ma le agamalu i tatou e mulimuli atu ia te Ia.

Suesue i upu a lo tatou Leoleo Mamoe—e pei o Ana aoaoga i le Feagaiga Fou, 3 Nifae, po o le Mataupu Faavae ma Feagaiga. A o tatou faia lena mea, e fafagaina i tatou faaleagaga ma mafai ona iloa atili Lona siufofoga i le lumanai.
Tatalo i le Tama Faalelagi i le suafa o Iesu Keriso i soo se taimi e ole atu ai mo le faamafanafanaga ma le filemu i lou olaga.
Ia talia o le fesoasoani a le Faaola e mafai ona auala eseese mai, e aofia ai matua, taitai o le Ekalesia, uo, e oo lava i fomai ma isi punaoa faapolofesa.
Faapotopoto faatasi ma isi o e alolofa i le Faaola, e pei o le lotu po o le seminare. E mafai e lenei mea ona faafesootaia i tatou i se nuu alofa o le Au Paia o e galulue faatasi e mulimuli i le Faaola ma faatoilaloina faafitauli taufaafefe faatasi ai ma Lana fesoasoani.

O nisi taimi o le faatoilaloina o le fefe o se malaga, e pei o le malaga i se vanu pogisa, e pei ona ta’ua e le Salamo 23 . E mafai e Nicolas F., mai Pasila, ona molimau atu afai e te agai pea i luma, o le a oo mai le faamalologa. Sa tauivi o ia ma lagona o le toilalo ma le fefe mo se taimi umi lava.

“Sa ou tatalo soo, ma ole atu i le Atua e aveese mafaufauga leaga mai lo’u mafaufau, ma ole atu ia te Ia e aveese lagona leaga,” o lana tala lea. Sa oo o ia i taimi o le fenumiai ma nofoa’i ai i mea sese sa ia faia.

“Sa ou taumafai e saili le mana o le Atua, ae ou te le’i lagonaina lava Lana faamalologa,” o le tala lea a Nicolas. Sa ia suesue i tusitusiga paia mo fuaiupu e uiga i le faatoilaloina o le fefe ma maua le malosi i na upu. Sa ia maua le lagolagosua mai lona tina ma isi.

Mulimuli ane, i se tasi aoauli, sa ia lagonaina faapitoa le atoatoa ma le lotofaafetai. Sa ia iloaina le mamao ua oo mai ai o ia.

“I le taimi muamua sa ou lagonaina le pei sa ou i ai i le falepuipui,” o lana tala lea. “Ae o le taimi nei ua ou lagona e mafai ona ou manumalo i taua. A o o’u saili atu i le fesoasoani a le Alii, ou te lagonaina le faamoemoe.”

Pe o lenei vaitau o le olaga e pei o se itumauga o susulu ai le la po o se vanu pogisa, ua ia te oe le Leoleo Mamoe Lelei, ma o le a ia savali faatasi ma oe. E alofa o Ia ia te oe! O le a Ia fesoasoani ia te oe ia manumalo i lenei tulaga. Faalatalata atu ia te Ia, ma o le a Ia taitai atu oe i le filemu.