Mauaina o Lona Malosi

O Auala e 7 e Maua ai le Malosi o Iesu Keriso

Saunia e Becca Aylworth Wright

O Mekasini a le Ekalesia

“O Iesu Keriso o le malosi o le autalavou.” E mafai faapefea ona avea lenei mea ma se mea moni mo oe nai lo na o se ’agaga?

“O Iesu Keriso o le malosi o le autalavou.” O lenei mea e sili atu nai lo se manatu manaia. O se upumoni mamana ua aoao mai e perofeta ma aposetolo¹—ae seiloga lava tatou te faaaogaina, pe afai foi tatou te avea Iesu Keriso ma punavai o lo tatou malosi. Ae e faapefea ona tatou faia o lena mea? E faapefea ona tatou faatagaina Iesu Keriso e fesoasoani ia i tatou ia malolosi atili? O ni nai manatu nei.

Ata na tusia e Toby Newsome

1 Maua le Malosi mai i le Tausia o Au Feagaiga

“O le a le punavai o lena mana mamalu ma faaleagaga, ma e faapefea foi ona tatou mauaina? O le pogai o le Atua. O le mafai ona tatou maua o lena mana, ua ala mai i a tatou feagaiga ma Ia.”

Elder D. Todd Christofferson o le Korama a Aposetolo e Toasefululua, konafesi aoao Ape. 2009 (Ensign po o le Liahona, Me 2009, 20).

2 Maua le Malosi mai le Faitauina o Lana Afioga

“O le afioga a le Atua … e i ai le mana e faamalosia ai le Au Paia … ina ia mafai ona latou tetee atu i le leaga, ae taofi mau i le lelei, ma maua le olioli i lenei olaga.”

Peresitene Ezra Taft Benson (1899–1994), “(O Le Mana o le Upu),” konafesi aoao Ape. 1986 (Ensign, Me 1986, 80).

“E mafai e mau ona faatoafimalieina se agaga vevesi, tuu atu le filemu, faamoemoe, ma se toefuataiga o le talitonuina o gafatia o se tagata e faatoilalo ai luitau o le olaga. Ua i ai ia i latou se mana malosi e faamalolo ai luitau faalelagona pe afai o i ai le faatuatua i le Faaola.”

Elder Richard G. Scott (1928 – 2015) o le Korama a Aposetolo e Toasefululua, konafesi aoao Oke. 2011 (Ensign, Nov. 2011, 6).

3 Maua le Malosi mai le Tausia o Ana Poloaiga

“O lo tatou saogalemu o loo taoto i le salamo. O lo tatou malosiaga e sau mai le usiusitai i poloaiga a le Atua.”

Peresitene Gordon B. Hinckley (1910–2008), “O Taimi o loo Tatou Ola Ai,” konafesi aoao, Oke. 2001 (Liahona, Nov. 2001, 74).

“Afai e tausi e le fanauga a tagata poloaiga a le Atua, e tausi o ia ia te i latou, ma faamalolosi i latou.”

1 Nifae 17:3.

4 Maua le Malosi mai le Salamo i Aso Taitasi

“E ala i le faatuatua i le Togiola a Iesu Keriso ma le salamo i a latou agasala, e maua [e tagata taitoatasi] le malosi ma le fesoasoani e fai ai galuega lelei, ia semanu e le mafai ona latou tausisia pe ana tuu e fai i a latou lava ala.”

Bible Dictionary, “Grace,” Gospel Library.

5 Maua le Malosi mai le Sailia ma Mulimuli i Faaaliga

“O le a le mea o le a tupu a’o e lagona, faalogo, ma usitai ma le naunau atili i mea ua fetalaia mai e le Faaola ma mea o loo Ia fetalaia mai nei e ala mai i Ana perofeta? Ou te folafola atu o le a faamanuiaina outou i le mana faaopoopo e taulima ai faaosoosoga, faigata, ma vaivaiga. … Ma ou te folafola atu o le a faateleina lou gafatia e lagona ai le olioli e tusa lava pe faateleina puapuaga i lou olaga.”

Peresitene Russell M. Nelson, “Faalogo ia te Ia,” konafesi aoao o Ape. 2020 (Ensign po o le Liahona, Me 2020, 90).

6 Maua le Malosi mai le Tatalo

“E faamalosia lo tatou laina o le mana faaleagaga e ala i le tatalo. A o tatou fefautuaai ma le Atua i a tatou mea uma e fai, o le a ia taitaiina i tatou mo le lelei.”

Peresitene Russell M. Nelson, konafesi aoao Oke. 1984 (Ensign, Nov. 1984, 31).

7 Maua le Malosi mai Auaunaga i le Malumalu

“Faamolemole ia faaavanoa se taimi mo le Alii i Lona maota paia. E leai se mea o le a faamalosia lou faavae faaleagaga e pei o auaunaga i le malumalu ma tapuaiga i le malumalu.”

Peresitene Russell M. Nelson, “Faaavanoa se Taimi mo le Alii,” konafesi aoao Oke. 2021 (Liahona, Nov. 2021, 121).

“Ou te fiafia lava i le auala ua tatou maua ai le malosi mai ia Iesu Keriso, ae e tatau ona tatou sailia ma faatino i le faatuatua.”

Grace T., 15, ISA

Faamatalaga

1. Tagai i le Mo Le Malosi o le Autalavou: O Se Taiala mo le Faia o Filifiliga (2022), 2.