Malosiaga i Vaivaiga

O Le Galue ma Vaivaiga o le Matafaioi Patino Lea a le Faaola

Saunia e Tyler ma Kiplin Griffin

E mafai e Iesu Keriso ona fesoasoani ia i tatou e tuputupu a’e i tauiviga, ae le na o le taulimaina .

Ata na tusia e Uran Duo

Ua lē lagonaina e Mason le alofa o le Atua e pei ona i ai i le taimi ua tuanai. Sa tauivi o ia ma le atuatuvale (o se faaletonu faale-soifua maloloina) mo ni nai tausaga ma sa itiiti lava se tulaga faaleleia na i ai, ma sa popole o ia ne’i lē faataunuuina lava ana miti.

Ua faalogo Ana i isi talavou o talanoa e uiga i aafiaga i faaaliga ma vavega. E ui ina taumafai o ia, ae na te le lagonaina o ona maua ni tali po o ni aafiaga faaleagaga e pei o isi tagata uma.

Ua taumanatunatu Ethan pe o le a ia toe lagonaina le mama po o le agavaa. E i ai ni faaosoosoga patino ua manumalo ia te ia i le tele o taimi, lea ua ia lagonaina ai le leai o se puleaina ma ia tau manatunatu ai pe ua aveesea tumau ai ona faamanuiaga folafolaina. E manatunatu o ia pe mafai ona faamagaloina o ia ma faateleina ai lava le lagona ta’usalaina i le lotu.

O loo tauivi Madison ma se gasegase o le lē mafai ona puleaina o le taumafa. E i ai manaoga faapitoa i le aoaoina o Olivia. E tauivi Conner ma le tulaga o le taumafai malosi e faia le mea sa’o (faananau i le ta’usalaina i amioga mama). Na sauaina Abigail ma ua ia lagona ai ua leai sona taua. O le a tete’a mātua o Jake, ma ua ia lagona le tiga ma le le mautonu. Ua faalataina Jayden ma ua lē i ai ia te ia se lagona e mafai ona ia faamagalo atu.

E tele naua tauiviga a tagata, ae e tasi lava le vaifofo. O lena vaifofo e i ai se igoa—o Iesu Keriso. O nei tagata uma e mananao ia lagona le malosi, mama, fiafia, ma le toe atoatoa, ae e le mafai ona latou foia e i latou lava o latou faafitauli. Ae ua ofo mai e Iesu Keriso le fesoasoani. O le mea moni, o le galue ma vaivaiga o Lana matafaioi faapitoa lea. O Lana fesoasoani e le masani ona oo mai i le ala po o le taimi tatou te mananao ai, ae e oo mai lava.

O nisi nei o mataupu faavae e fesoasoani ia i tatou e talia ai le valaaulia a le Faaola e savavali faatasi ma Ia (tagai i le Mose 6:34), aemaise lava pe a tauivi ma vaivaiga.

E Tatau ona Avea le Olaga ma se Suega

E sili atu le alofa o le Atua ia te oe nai lo Lona alofa i ou lagona o le mafanafana ma le faafaigofieina. E toafia ni au toa na oo i le na o le mafanafana ma le manuia? E mautinoa lava na latou feagai pea lava pea ma tulaga o le teenaina malosi ma le faigata. I le avea ai o se vaega o le tatou suega i le olaga, “sa tatau ai i le finagalo o le Alii ona a’oa’iina ona tagata; ioe, sa ia tofotofoina lo latou onosai ma lo latou faatuatua” (Mosaea 23:21). Atonu tatou te lē fiafia i ai, ae o le tele o taimi o o tatou tofotofoga sili ona faigata tatou te maua ai avanoa maoae e tuputupu a’e ai.

O Vaivaiga E Le o se Faailoga o le Lē Fiafia o le Atua

E toatele tagata anamua sa talitonu o gasegase ma isi uma vaivaiga po o tulaga le atoatoa faaletino pe faalemafaufau o se faailoga o le faasalaga a le Atua (tagai i le Ioane 9:2). Ae o vaivaiga o se vaega o le olaga na aumaia e le Pa’ū. E ui o le tauivi ma luitau o se vaega masani ma taua o le fuafuaga a le Tama Faalelagi, ae le o le faafesagai ai ma na tauiviga na o oe. E le’i auina mai Iesu Keriso e ta’usalaina i tatou; na auina mai o Ia e alofa ma fesoasoani e toe maua mai i latou o e ua leiloloa, vaivai, pe tuuatoatasi—o i tatou uma lava na (tagai i le Ioane 3:16–17; Luka 15).

O Mea Vaivai e Faia ia Malolosi e ala ia Keriso

E taua lo tatou faamatalaina o i tatou lava e ala i lo tatou sootaga faalefeagaiga ma Keriso ma lo tatou faalagolago i Lona atoatoa nai lo le faauigaina i o tatou lē atoatoa E lei teenaina lava e Iesu Keriso tagata vaivai o e sa saili ma le filiga ia te Ia i le faatuatua. E tuuina mai e le Atua i tagata “vaivaiga ina ia faalotomaualalalo ai i latou; ma ua lava lou alofa tunoa mo tagata uma o e e latou te faalotomaualalaloina i latou lava i [Ona] luma … ma faatuatua ia te [Ia],” ma afai latou te faia, “ona [Ia] faia lea o mea vaivai ia avea ma mea malolosi ia te i latou” (Eteru 12:27). Pe a tatou tuu atu o tatou tauiviga i le Alii ma se loto momomo ma se agaga salamo (tagai i le 3 Nifae 9:20), e Na te le aveesea i latou i se taimi vave, ae o le a Ia fesoasoani ma faamalosia i tatou.

Ia Onosai ia te Oe Lava Ia

O le ala o feagaiga o se faigamalaga umi lava, ae le o se vaega e tamoe saoasaoa ai. O le mulimuli ai i lena ala e fesoasoani ia i tatou i le tele o femilosaiga ma feliuaiga, lugā ma lalō, fiafiaga ma tulaga e lamatia ai, o la susulu ma afa o le olaga. E tele lesona e mafai ona aoaoina i laasaga uma i lena malaga. O le alofa tunoa o Iesu Keriso e tele ina faaalia i le aluga o taimi, e le na o taimi e lagona ai le mamao ese po o mea ofoofogia e tutupu.

Fesootai ma Keriso

Afai o loo e lagonaina le vaivai po o le i ai i tauiviga, talia le valaaulia a le Faaola: “Ia outou o mai ia te au, o outou uma o e tigaina ma mafatia i avega, o a’u foi e malolo ai outou” (Mataio 11:28). Saili ni auala e fesoasoani ia te oe e fesootai ai ma Ia. A o e aapa atu mo Ia, o le a e iloa ai sa aapa mai o Ia mo oe ma o le a le fiu lava Ia te oe! O le a le atoatoa le olaga, o le a lē saoloto mai foi i vaivaiga, tiga, ma tauiviga. Ae o le a sili atu ona lelei i le i ai o le Fomai Sili i ou autafa e siitia oe pe a e pa’ū, fusifusi ou manu’a, ma taiala oe i ala e tau atu i le olioli tumau.

E faapitoa Iesu Keriso i le galue ma vaivaiga. E faapitoa lava o Ia i le galue faatasi ma oe!