“Maua Lona Malosi—i le Taimi Nei ma Aso Uma,” Mo Le Malosi o le Autalavou, Mat. 2024.
Malosiaga i Taimi Uma
Maua Lona Malosi—i le Taimi Nei ma Aso Uma
E te agavaa mo le malosi ma le fesoasoani a Iesu Keriso.
Ata na tusia e Alex Nabaum
Vaai faalemafaufau i le savalivali atu i le togavao ma tau atu i se tama laitiiti ua se’e ma pa’u atu i luga o ni lala laau mamago. O se tasi o lala ua mamafa tele mo ia e sii ese na o ia.
E te fesoasoani? Pe e te nofo muamua i lalo ma iloilo pe tatau mo ia lau fesoasoani?
Ioe e te fesoasoani! O le manatu o le taofiofia o lau fesoasoani sei vagana ua faia e le tamaititi se mea ia maua ai, e peiseai o se tulaga faavalevalea ia te oe. Ae tatou te mafaufau i lenei auala e uiga ia i tatou lava—sei vagana ai, i lenei tulaga, o i tatou o le tamaitiiti o loo manaomia le fesoasoani.
E Taua le Laveaiga o Oe
Po o le a lava lou matua, o oe o se tamaitiiti pe a faatusatusa i le Tama Faalelagi ma Iesu Keriso. (O le mea moni, o oe o se atalii/afafine moni lava o le Tama Faalelagi.) Ma o lou malosi—faaletino, faalelagona, faaleagaga, pe faalemafaufau—e le faatusalia i lo La malosi. O le toatele o i tatou e malamalama lelei i lena manatu faavae. Ae a tatou tautevateva po o le a lava le mafuaaga, e masani ona tatou lagonaina e le mafai ona tatou aapa atu mo se fesoasoani seiloga ua tatou faia se tulaga ina ia mauaina ai. E le moni lena mea.
Sa saunoa Peresitene Dieter F. Uchtdorf, a o avea ma Fesoasoani Lua i le Au Peresitene Sili, i se tasi taimi e uiga i le faataoto i le mamoe na leiloa i le Luka 15.
“E manaomia ea ona iloa e le mamoe le auala e faaaoga ai se masini tapasa faigata, e fuafua ai lona faatulagaga o le mamao o matu ma saute?” na ia fesili mai ai. “E manaomia ea ona ia faaaoga se GPS e iloa ai le mea o i ai? E tatau ea ona i ai sona tomai faapitoa e fatua’i ai se polokalama faakomepiuta lea o le a valaau atu ai mo se fesoasoani? E manaomia ea e se mamoe ni faamaoniga mai se tagata e lagolagoina a o lei alu atu le Leoleo Mamoe Lelei e laveai mai?
“Leai. E mautinoa lava e leai! E agavaa le mamoe i le laveaiga faalelagi ona e alofagia e le Leoleo Mamoe Lelei.
“Ia te a’u, o le faataoto o le mamoe na leiloa o se tasi o fuaitau sili ona faamoemoeina i tusitusiga paia uma.”1
E mafai e i tatou taitoatasi ona leiloloa ona o le tele o mafuaaga eseese. Ma mo i tatou taitoatasi, atonu ua uma ona sailia i tatou e le fesoasoani faalelagi.
E Avanoa i Taimi Uma le Fesoasoani
E avanoa le fesoasoani ia i tatou e le gata pe a tatou agasala, ae faapea foi pe a tatou ola i le mea sili tatou te mafaia. Na aoao mai Elder David A. Bednar o le Korama o Aposetolo e Toasefululua:
“Ou te mafaufau lava pe ua tatou toilalo e iloa atoatoa lenei vaega faamalosia o le Togiola i o tatou olaga ma le talitonuga sese e tatau ona tatou amoina na o i tatou a tatou avega—e ala i lo tatou lava naunautai, finafinau, ma le lotopulea, faapea ai ma le iloagofie o o tatou gafatia faatapulaaina.
“E ese le tulaga o le tatou iloa sa afio mai Iesu Keriso i le lalolagi e maliu mo i tatou. Ae e tatau foi ona tatou talisapaia le finagalo o le Alii, e ala i Lana Togiola ma e ala mai i le mana o le Agaga Paia, ia ola i totonu ia i tatou—e le gata ia taitaia i tatou ae ia faamalosia foi ma faamaloloina ai i tatou.”2
Ua e agavaa mo Lana fesoasoani! Po o le a lava le ala na e savali ai talu ai nei, o loo tu saunia Iesu Keriso e savali i le isi auala e sosoo ai ma oe.