“Rawarawa ka Mana Na Nodra Vukei Na Tani Me Ra Lako Mai vei Karisito,” Me iSakisaki ni iTabagone, Julai 2024.
Rawarawa ka Mana Na Nodra Vukei Na Tani Me Ra Lako Mai Vei Karisito
E sega ni wili rawa na sala mo vakaraitaka kina na loloma, wasea na nomu vakabauta, ka sureti ira na tani me ra lako mai vei Jisu Karisito.
Ena dua na siga ena noqu yabaki ni vuli torocake, a tarogi au o noqu itokani o Nedra, “Russ, na cava o sega ni lako tiko kina i semineri?”
Ena gauna o ya, rau a sega ni lotu tiko na noqu itubutubu. Au dau lakova ga vakavudua kei ira na noqu itokani, ka‘u sega ni dau vakaitavi ena semineri. Ena siga ka tarava, au a tiko ena semineri ena 6:30 ena mataka Ni oti oya, au sa tekivu dau lako e veisiga—ena veimataka batabata, ucacevata sara mada ga ni vulaibatabata.
E tara na yaloqu na veika au sa vulica mai na semineri. A tubu na noqu ivakadinadina ni‘u vulica vakalevu cake na veika me baleti Jisu Karisito kei na Nona kosipeli vakalesui mai. Oqo a vakarautaki au me‘u veiqaravi vakadaukaulotu e Igiladi ka tomani tiko ena noqu bula taucoko ni veiqaravi vua na Turaga kei na Nona Lotu.
Na nona sureti au o Nedra ki na semineri e a vukei au me‘u raica, ena dua na sala, ni sega ni wiliki rawa na madigi mo vukei ira kina na tani me ra lako mai vua na Turaga o Jisu Karisito. Ena sala rawarawa ka qaqa, e rawa ni o vakaraitaka na nomu loloma, wasea na nomu vakabauta, ka sureti ira era tu wavoliti iko me ra vakila na reki kei na vakacegu e kauta mai na iVakabula kei na Nona kosipeli.
Yaco mo Kila na iVakabula
Mo vukei ira vakaidina na tani me ra lako mai vei Karisito, e gadrevi taumada mo kila se o cei o Koya. O Jisu Karisito e Luve ni Kalou ka sa ikoya duadua ga ena rawa ni iVakabula ka Dauveivueti kei vuravura.
O Koya duadua ga ena rawa ni bulataka e dua na bula sa uasivi sara, sorovaka na nomu ivalavala ca, sotava na nomu “mosi kei na veivakararawataki kei na veivakatovolei kecega” (Alama 7:11), ka qai solia na Nona bula ka taura cake tale. Ena vuku i Jisu Karisito, era na tucake kece tale na luve ni Kalou ka ciqoma na Nona veivakalougatataki tabu ka lagilagi duadua.
Ni ko sa kila deivaki se o cei na iVakabula—kei na nomu icavacava tawamudu ena Vukuna—o na gadreva mo bulataka na nomu bula ena sala e vakamarautaki Koya. E dau vakamarautaki Koya dina ni o vunautaka na Nona kosipeli, ena vosa kei na ivalavala, ki vei ira o veimaliwai kaya ena veisiga yadua.
Dolele Yani ena Loloma
Ni sa yaco mo kila ka lomana na iVakabula, o na gadreva mo muri Koya vakavoleka sara kei na Nona ivakavuvuli, oka kina na Nona ivakaro mo “dou veilomani” (Joni13:34).
Ni lako o Amoni ki vei ira na Leimanaiti me vunautaka vei ira na kosipeli, e a lomasoli o koya me dauveiqaravi nei Tui Lamonai. A vakaraitaka o Amoni na loloma dina kei na yalodina ena nona taqomaka na sipi ni tui. A vakamalumalumutaka na yaloi Tui Lamonai na ivalavala nei Amoni. Ni vakavulica o Amoni na kosipeli, sa vakadrukai Tui Lamonai na Yalo, ka sa saumaki mai o koya (raica na Alama 17–19).
Ni ko sa tisaipeli dina i Jisu Karisito sa kena ibalebale mo lomani ira na wekamu me vaka na nomu lomani iko (raica na Maciu 22:36–40). Kevaka e rawa ni ra vakila ni ko lomani ira ka kauwaitaki ira, era na rairai lomasoli vakalevu cake me ra rogoca na nomu wasea na veika o kila ni dina.
Vakasaqara na Yaloqaqa mo Veiwasei
Mai vua na Parofita o Josefa Simici, a vakalesuya mai kina na iVakabula na matabete ki vuravura vata kei na cakacaka vakalotu kei na veiyalayalati kece sara e gadrevi me baleta na noda tubu tawamudu. Ena gauna e tara kina na yalomu na itukutuku lagilagi ni Veivakalesuimai, sa dodonu mo vinakata mo kailavaka mai na vei delanivale! Sa dodonu mo vakaitavitaki iko vakagumatua ena wasei ni kila ka talei me baleta na kosipeli vakalesui mai vata kei ira na tamata kecega. Au dau taleitaka me‘u cakava na ka o ya
Eso era na rairai lomaleqataka ni so era na sega ni malele kina se besetaka na veika era sa wasea. Io, e rawa ni yaco oqori. Ni oti na nona cici ki na veivalevale o Apisi ka tukuna vei ira na tamata ni sa lako mai na kaukauwa ni Kalou vei Tui Lamonai kei na nona vuvale, eso era vakabauta, ia e vuqa tale era sa digitaka me ra kakua ni vakarorogo (raica na Alama 19:17–31).
Se ra ciqoma se sega, na isolisoli cecere duadua e rawa ni o solia vua e dua na itokani se lewe ni matavuvale—se dua mada ga na kemu meca—sa ikoya na kosipeli i Jisu Karisito. Masulaka mo yaloqaqa, oti oya, ni sa ganita, wasea na veika o kila ni dina.
Veisureti Mai na Vuniyalomu
Ni‘u a se peresitedi tiko ni Tabana ni Kaulotu na Canada Toronto, au a vukei ira e vica na noqu daukaulotu ena nona vakavulici e dua na daunibisinisi kilai levu. Ni oti na neitou lesoni, au a sureti koya me masu ka kerea vua na Tamada Vakalomalagi me vakaraitaka mai vua kevaka e dina na neitou itukutuku.
“Au sega ni kila me’u masu vakacava,” a kaya o koya.
Au tukuna vua ni ka ga me cakava sa ikoya me tekiduru ka kerea vua na Tamada Vakalomalagi me vakadeitaka vua na dina.
“E rawa ni o cakava oya!” Au a vakayaloqaqataki koya.
Keirau a tekiduru vata ka tekivuna na nona masu na turaga oya. Ni sa oti, a kaya mai, “Na cava e yaco tiko? Au sa bera vakadua ni vakila e dua na ka vakaoqo e liu.”
“Oqori na sala e dau sauma kina na masu na Tamada Vakalomalagi,” au a kaya. “O a taroga, ka sa sauma mai o Koya.”
Au dau vakavulici ira na daukaulotu kei na lewenilotu e vuravura taucoko ni dau tekivu na saumaki mai ena veika era vakila na tamata. Ni o sureta eso tale me ra rogoca na kosipeli, sureti ira talega me ra masu ka kerea me ra vakila na dina e yalodra. Kevaka era na kerea vua na Kalou (raica na Jemesa 1:5) ena yalodina, ena inaki dina kei na vakabauti Karisito, sa rawa ni ra ciqoma na veivakadeitaki ni dina ena kaukauwa ni Yalo Tabu (raica na Moronai 10:4–5). Sa ka marautaki ka rekitaki me da vukei ira na tani me ra kunea vakataki ira na dina.
Nanuma tiko ni Tamata Yadua e Ka Talei
O na sega ni kila na cava ena yaco ni o vukei ira na tani me ra lako mai vei Karisito ena loloma, veiwasei, kei na veisureti. O ira na Leimanaiti, me kena ivakaraitaki, e vaka me ra tamata tawakilikili duadua me ra ciqoma na kosipeli, ia era saumaki mai me ra “kakua tale ni lutu tani” (Alama 23:6–7).
E sega ni dodonu mo namaka oqo ena veigauna taucoko o wasea kina na kosipeli. Ia na kena rawarawa ka kaukauwa, e rawa ni o vakadinadinataka na dina ka veivuke ena nodra vakaveikilaitaki e vuqa na luvena na Tamada Vakalomalagi ki na kosipeli vakalesui mai.
Ni o sa kila na kena vakamareqeti na luvena vakayadua na Tamada Vakalomalagi ki Vua, o na vinakata mo vakayacora na veika taucoko o rawa ni cakava mo vukei ira kina na tani me ra lako mai vei Karisito ka kalawa yani ki na rarama ni Nona kosipeli ka yacova yani na salatu ni tawamate rawa kei na bula tawamudu.
Na veika cecere cava soti o rawa ni sotava ena nomu bula?