“Loloma me Vulici, Loloma me Wasei,” Me iSakisaki ni iTabagone, Julai 2024.
Loloma me Vulici, Loloma mo Wasea
Vei Liam N. mai Denmark, na kosipeli e tiki ni dua na bula lasa ka vakavotukana.
iTaba mai vei Ashlee Larsen.
Na qaravi ira na tani e rawa ni vaka na irairai ni veika duidui. E dua na sala e dau taleitaka me veiqaravi kina o Liam sa ikoya na vakatagitaki ni sere vei ira na tani.
Koronivuli se veika taleitaki? Cakacaka se lasa? E tiko beka e dua na taro vinaka cake: Na cava me sa rauta ga kina e dua na ka? Ena gauna e rawata kina, o Liam N. yabaki 14 mai Denmark e tovolea me kunea me tautauvata na ka ena veiyasa ni bula.
“Au taleitaka meu vakatagi,” e kaya o koya. “Au dau qiri qita, dramu, besi, piano, kei na ukulele. Au nanuma ni vakatagi e dua na sala vinaka meu vakaraitaka kina na lomaqu. Au taleitaka talega meu vakatagi vei ira na tani me ra vakamarautaki kina.“
Ni sega ni marautaka tiko na sereivakatagi, o na rairai kunei Liam ni qito soka tiko, basketbol, se chess vata kei ira na nona itokani. “Au taleitaka talega na sains kei na esitoronomi,” e kaya o koya. “E totoka me da raica na sala e sema kina na veika kece. Sa bulia taucoko na Kalou, ka sa totoka dina.”
Me ikuri ni nona ka taleitaki, e dau kunea o Liam na gauna me cakacaka vakaukauwa, se veisoliyaka tiko na niusipepa ena nona itikotiko se vuli lesoni tiko me baleta na vuli.
Sa vulica tiko o Liam me vakatauvatana na veika e gadreva ka vinakata me cakava. Ena osooso beka o koya, ia e dua ga na ka e dau solia kina nona gauna ena veisiga—na kosipeli i Jisu Karisito.
E vakaitikotiko o Liam ena peninsula levu nei Denmark kei rau na nona itubutubu kei rau na tacina e rua, o Filippa kei Max.
E Dua na Lalawa Lima na MIniti
“Au sa vakatulewa ena dua na gauna walega oqo niu na wilika e dua mada ga na wase ni iVola i Momani—e dua ga na wase—ena veisiga yadua,” a kaya o Liam. “E tauri au beka me lima na miniti. Ia e solia vei au e dua tale na igu, kau sa tuvakarau meu taura na bolebole oya.”
Na wiliki ni ivolanikalou e veisiga sa vukei Liam vakalevu cake mai na nona nanuma ni na vakakina. “Ena so na gauna niu sotava e dua na siga ca, niu wilika e dua na ka veivakacegui e rawa ni biuti au tale e cake. Ia kevaka e dua na siga vinaka, e rawa talega ni vakananuma vei au meu vakavinavinakataka ni sa toso vinaka tiko na veika kece. Au marau niu sa rawa ni vakadeitaka na noqu lalawa.”
E osooso o Liam ena vuqa na ka taleitaki kei na itavi. Ia ni sa solia na gauna e veisiga mo wilika na iVola i Momani sa vakalougatataka na nona bula.
“O Cei e Sega ni Vinakata na Reki?”
E vakavinavinakataka o Liam na veitokoni ena nona tovolea me solia na gauna ki na kosipeli. ”Oi keirau ga kei taciqu keirau lewe ni Lotu i Jisu Karisito ni Yalododonu Edaidai mai koronivuli, e vuqa vei ira na noqu itokani vinaka era sega ni lewenilotu. Ia au vakabauta ni tiko e dua na itikotiko vinaka sara ena Lotu mai Denmark. Na tamata kece era veikilai vakalailai mada ga, ka totoka ni da dau duavata kece.”
Na vakaitokani ni duidui na ivakatagedegede e rawa ni dredre ena so na gauna. “O Denmark e dua na matanitu ka ra gunu alakaolo na kena itabagone ni ra se gone sara,“ e vakamacalataka o Liam. “E rawa ni dredre sara vua e dua na yabaki tinivakacaca me vakasega ki na veika vakaoya.“ Ia a tovolea o Liam me dolava na veika e vakabauta me rawa ni ra kila vakavinaka cake kina na tani na nona digidigi.
Na qaravi ira na tani e rawa ni vaka na irairai ni veika duidui. E dua na sala e dau taleitaka me veiqaravi kina o Liam sa ikoya na vakatagitaki ni sere vei ira na tani.
“Eso na gauna e koronivuli ni caka na kalasi ni vakabauta Vakarisito, era sa tarogi au na qasenivuli se itokani me baleta na noqu vakabauta. Au sa tovolea meu vakamacalataka ena kena vinaka duadua au rawata,“ e kaya o Liam. “Au a sureta talega e dua na noqu itokani vinaka duadua ki na noqu papitaiso. Au a solia vua kei tinana e dua na iVola i Momani ka veitalanoa vata kei rau me baleta eso na ka au vakabauta. E vakatau vei ira me ra vakatulewataka na ka era cakava kina. Au vakila niu a cakava na ka dodonu meu sureti ira na tani me ra vakila na reki vata ga e tu vei au, baleta o cei e sega ni vinakata na reki?“
O Liam kei iratou na tacina eratou lewe ni Lotu duadua ga ena nodratou koronivuli. E levu tu na nodra madigi me ra ivakaraitaki vinaka ni tisaipeli i Karisito.
Tekivu ena Veitokani
E kila o Liam ni vakamacalataka na veika e vakabauta se solia me solia e dua na iVola i Momani vua e dua na itokani e sega ni sala duadua ga me tisaipeli kina i Jisu Karisito. Ena so na gauna ni sureti ira na tani me ra vakila na reki ni kosipeli e tekivu ga ena veitokani dina kei na loloma.
“Au taleitaka dina na italanoa kei Amoni ena iVola i Momani,“ e kaya o Liam. “Au nanuma ni vakasakiti ni sega ni lako vakadodonu vua na Tui o Lamonai ka kaya, ‘O na vakarorogo ki na ka au vakabauta,‘ ia ni yaco me veitokani vata kei koya vakamalua me yacova ni sa tarogi Amoni na tui, ‘E rawa vakacava mo totoka tu vaqo?’”
“E rawa ni da tara cake talega na veimaliwai kei ira tale eso,” e kaya o Liam. “E rairai era na lako mai vei keda ka taroga se cava beka e solia vei keda na ikuri ni noda kaukauwa.“
E Dua na Veivakalougatataki ni Bula
E dau vakila vakaidina o Liam ni bulataki ni kosipeli sa solia vua na kaukauwa. Sa vakalougatataka vakalevu cake na nona bula mai na chess, ivakatagi, qito, se dua tale na ka vinaka e dau vakayagataka kina nona gauna.
“Au vakavinavinaka ni tiko vei au na kosipeli ena noqu bula baleta niu sega ni nanuma niu na vaqo tu na noqu bula kevaka e sega,” e kaya o koya. “Au vakila ni kilai au vakavinaka cake na Turaga mai na noqu kilai au. Au kila ni bula tiko na Kalou kei na Karisito. Era vakaraitaka vei keda na sala meda lako kina ka vukei keda meda vinaka cake.“