Na Taro Eso kei na Kena iSau

“E sega ni dua e koronivuli e wasea na noqu ivakatagedegede. Me‘u na vaka itokani vinaka vakacava e kea?”

“O keda kece eda vakila ni da gadreva na vakaitokani. O keda kece eda vakasaqara tiko eso na ivakadinadina ni da sa tamata yaga. Eda digidigi ka yavutaki mai na veigagadre oya. Eso era na rawa ni kauti keda tani mai na rarama e solia vei keda na Kalou me idusidusi. Eso era na vakararamataka na rarama o ya ka da na rawa ni kunea kina na noda sala.”

Peresitedi Henry B. Eyring ena Mataveiliutaki Taumada, “Lako ena Rarama,” Koniferedi raraba ni Epe. 2008 (Ensign se Liaona,, Me 2008, 124).

“Veitalanoataka na veika waisei o taleitaka. E sega ni gadrevi mo vakabuwawataka na nomu rarama. Mo na itabagone me vakaga na kena ivakarau ka dau taleitaka eso na ka lasa era dau taleitaka na itabagone tale eso. Muria na ivakatagedegede i Jisu Karisito, ka vakamatatataka vei ira o vulivata na ivakatagedegede o dau vakamuria.”

Jamie Ann B., 18, Negros Occidental, Filipaini

“Kunei ira na tamata ena veikalasi vata oqo, veika era taleitaka, taledi, se veika taleitaki me vakayacori. Era tu na tamata cecere ena veimatavakabauta tale eso, ka vakakina o ira na tamata vakamatalia ka sega na nodra vakabauta. Era sa luvena lomani kece tikoga na Kalou. Ni ko tomana tiko na nomu ivakatagedegede, ena gauna mada ga era sega ni vakakina na nomu itokani, ena rawa ni vakayaloqaqataki ira na tani na nomu ivakaraitaki me ra digidigi vakavinaka cake.”

Lucy B., 15, Lima, Peru

“Mo dauvosota ka dolava na nomu vakasama. Na veitokani e baleta na itovo vinaka, sega ni kena levu, kei na vica ga na itokani dina e rawa ni veivakacegui vakalevu cake mai na kena sagai mo ciqomi mai vei ira na lewevuqa ka sega ni veidonui kei na nomu yavunibula.”

Adedoyin Alma O., 17, Osun, Nigeria

“Wasea vata kei ira na nomu ivakatagedegede. Kevaka era kila na nomu ivakatagedegede, era na rawa ni rokovi ira. E rawa talega ni o sureti ira na nomu itokani vakavuli ki lotu kei/se itaviqaravi ni Lotu me vukei ira me ra kila vakalevu cake na veika o vakabauta.”

Melody P., 13, Texas, Amerika

“Au sa vulica ni rawa mo kunei ira na itokani vinaka ena veivakauqeti kei na nomu bula ga vakai iko. Ena so na gauna era na lako mai vei iko na tamata, ka so na gauna o na vakararai, ia era na tiko eso na tamata era na itokani vinaka se era na gadreva e dua na itokani vinaka me vakataki iko.”

Katie R., 18, Nebraska, Amerika

Na vei isau ni taro sa kena inaki me veivuke ka veivakararamataki, ka sega ni ivakaro vakadonui ni ivunau ni Lotu.

Se Cava na Nomu Nanuma?

“E vuqa sara tiko na vakatulewa lelevu me‘u na vakayacora. Me‘u na ciqoma vakacava na noqu ivakatakila vakai au?”

Vakauta mai na nomu isaunitaro kei na itaba ni bera na ika 15 ni Feperueri, 2024.

Imeli mai e na [e-mail]. Se gole kina ftsoy.ChurchofJesusChrist.org ka tabaka na “Submit Your Work.” Saini ni curu e na nomu Akaude ni Lotu ka digitaka na “For the Strength of Youth” e na ruku ni “Choose Magazine.” Tabaka na “Add File” mo digitaka kina na nomu faile kei na itaba, ka qai tabaka na “Submit” mo vakavodoka ka vakauta mai na nomu faile.

E na rawa ni moici na nomuni itukutuku me baleta na kena balavu se kena matata.