“Tokona na Ka Kecega,” Me iSakisaki ni iTabagone, Julai 2024.
“Tokona na Ka Kecega”
Na Veika Dredre e Tiki ni Nona iTuvatuva na Tamada Vakalomalagi. Ia na cava o na cakava ni yaco vakidacala mai vei iko?
Droini mai vei Paulina Wyrt
Vakavica ena mataka caca o ya, au sa vakadeitaka ni‘u sa na mate. Ni soqoni vata na irairai ni dra taucoko—noqu dra—ni drodrova yani na sala kei na noqu vakila na kaukauwa ni kena toqovi au na pera mai na veiyasana kecega ena batina kei na itaukuku e a vakadrukai au ka kauta tani vei au na inuinui.
E Dua na Mataka Vinaka
Sa dua dina na duidui levu ki na rua ga na auwa sa oti. Au a tekivuna e dua na cici takoso ena loma ni vanua ena mataka ni dua na siga totoka duadua au sa qai bau raica ena vulaikatakata oya ena yasayasa e cake kei Wyoming, e Amerika. E karakarawa nukurama buto toka na lomalagi, e robota na veidelana na senikau ni veikau, e carosa toka ia maleka tu na caucau ni mataka. Sa dua dina na siga uasivi me cicivi kina na 15 na maile (24 na kilomita) ena veiulunivanua.
Oqo e dua na cici ni vakaukauwa yago totoka. Au a saga tiko me‘u toroya cake na noqu kaukauwa kei na vosota me baleta e dua na veitaucici balavu ena rua na vula mai qo. Era dau vakaukauwataka na nodra igu na daucici ena veicici leleka. Oqo e toroya cake na vosota vakadede, ka sa ikoya oqori ena vakaukauwataka na yago.
Au sega ni kila ni‘u na gadreva na veitiki kece sara ni veivakacokotaki kei na kaukauwa baleta ni‘u sa na vakarau vakayacora e dua na veitaucici bibi duadua ena noqu bula.
Dua na Kaba Vakasauri
Ni‘u railesu, a dodonu beka me‘u a raica na kena ivakatakilakila. Me vaka ga, e tukuna vei keda na Turaga ni na “vakaraitaka [vei keda] na veika ena yaco mai” ena kaukauwa ni Yalo Tabu (Joni 16:13). Me vaka a vakatavulica o Elder Gary E. Stevenson ena Kuoramu ni iApositolo Le Tinikarua, “Na Yalo Tabu e rawa ni vukei iko ena nomu vakaroti taumada mai na veika rerevaki vakayago ka vakayalo.” A kitaka vakakina ko Koya;
Ni oti ga e vica na miniti na noqu cici, au a rai sobu ka raica e dua na ka. E rika na yaloqu ni‘u raica na ituvatuva sega ni vakacalai rawa ni imawe ni yava ni pera e mataqau. Oya na ivakasala ni qaqarauni matata. Ena yalowai, au qai vakatitiqataka ni a lako sivita dina na sala oqo e dua na pera ka sega ni dua kina na leqa vei au ena gauna oqo. E sega ni gadrevi na lomaleqa, donu? Au mani cici sara yani.
Se bera ni oti e dua na auwa, au a cabe vakalailai ka ciciva sobu na delana ki na dua na vanua veikau ia savasava tu na rukuna. Ni‘u wavokita e dua na itakelo ena ruku ni delana, au a rogoca e dua na ka ni caroba, ka kaukauwa sara, ka vakavuna na se ni votoqu ena daku ni domoqu. Au a tu vakadua ka rai vakamalua ki na noqu imawi. Au mai tu yani vakadua ena levu ni rere. Na rorogo, ka‘u kila sara vakatotolo ni raramusumu ni tabanikau, e sa lako tiko mai vakatotolo sara. Au a qai raica e dua na ka au na sega vakadua ni guilecava—e dua na pera dravu vakaitamera ka cicivi au tiko mai vakadodonu!
Na veivakacaca vakadomobula a tarava mai a dodonu me kauta tani saraga na noqu bula. A kena irairai ni oqo e dua na pera cudrucudru, kau a vakidacalataka ena noqu ciciva sobu yani na loma ni veikau oya. Ia na gauna o ya ni‘u nanuma ni sa na yaco dina na mate a tarava mai na masu yalodina duadua ena noqu bula. A qai siro sobu mai na yalololoma veimaroroi mai lomalagi.
E sega ni vakamacalataki rawa, a muduka na pera na veivakamavoataki a cakava tiko ka cici yani ki loma ni veikau. Oqori na itukutuku vinaka! Na itukutuku ca sa ikoya ni a yaco vei au e16 na mavoa bibi sara mai na bati kei na itaukuku ni pera, ka‘u a tu duadua voli ena dua na veikau, ubi tu ena dra, ka 11 na maile (18 na kilomita) mai na gaunisala voleka duadua ni gade, ka sega ni dua na veivuke e rawa ni laurai.
Dua na Gauna ni Vakatulewa
A sa yaco mai vakasauri e dua na gauna ni vakatulewa levu sara me baleta na noqu bula. Kevaka o sa bera ni sotava e dua na gauna vakaoqori, mo vakadeitaka ni na yaco mai. Na Veika Dredre e Tiki ni Nona iTuvatuva na Tamada Vakalomalagi. Ia, na vakamavoataki mai vua e dua na pera e sega ni vakakina—ki na vuqa vei keda! Ia ena so na gauna, o na vakadrukai beka mai na veika dredre cava ga o sotava tiko. Oqo e dua na na mataqali yalo esa sega kina na inuinui ka a vakamacalataka vakamatata na Turaga ”ni sa “gusui eli sara ga” ka “rabailevu na gusumu” (Vunau kei na Veiyalayalati 122:7).
Ena veivanua dredre oqo ni nomu bula, ena yaco mai na gauna mo na vakatulewataka na cava mo na vakayacora. E rawa ni o soro, davo sobu, ka mate sara; se e rawa ni o soqona taucoko na nomu yaloqaqa kei na kaukauwa ka vala ena yaloqaqa, ka nuitaka ni kevaka o na cakava na nomu itavi, ena vakayacora na Turaga na Nona. A vakamacalataka na Turaga na inaki ni rarawa ni bula ki vei Josefa Simici ni vesu voli mai Na Valeniveivesu e Lipati: “Ia ko na kalougata sara ni ko sa vosota rawa na veika kece oqo” (Vunau kei na Veiyalayalati 122:7).
Ka ra na yaga vei iko. Era na dina ka vakasavasavataki iko ni ko tubu cake ka tara cake na nomu isasabai. Oqo na vuna a kaya kina na Turaga vei Josefa—ka tukuna vei iko—mo “yalodina tikoga” ena gauna ni veivakatovolei kei na dredre (Vunau kei na Veiyalayalati 122:9). Ni ko dei tu ena bula—kevaka sara mada ga ena itaukuku ni ligamu—o na kunea ni nomu kaukauwa lailai e sega isotari kei na kaukauwa ni Turaga. Me vaka a yalataki e “kaukauwa o Koya me veivakabulai” (2 Nifai 31:19).
Tautauri Matua
Ia, oqori na ka a yaco sara ga vei au. Au a sega ni via soro, ka‘u sa nanuma me‘u sa tucake ga. Au a vakadeitaka ni‘u na bula, ka kena ibalebale ni‘u na gadreva me‘u kunea na veivuke. Au taceba sobu yani e gaunisala me sivia e dua na maile, au sa qa sotavi ira na vo ni tamata era tiko voli ena veikau oya ena siga oya. Na sota veivakurabuitaki o ya a yaco kina na veivueti ena elikopita, tolu na veisele ni veivakabulai, kei na kena kilai vakamatata cake na veivakalougatataki ni kena vakadeitaki me “dei tikoga ena nomuni sala.”
A kunea na veivuke o Elder Dunn, vakabulai, ka yaco vua e tolu na veisele ni veivakabulai.
Na veika au a sotava oqo esa vakalevutaka na noqu kaukauwa, igu, kei na vakabauta. A vakaqaqacotaki au talega ka vakarautaki au me‘u qarava na veibolebole tale eso ni bula. Au vakadeitaka ni o “[tokona] na ka kecega, [vakabauta] na ka kecega, [vakanuinuitaka] na ka kecega, [vosota] na ka kecega” (1 Korinica 13:7), o na tara cake na igu kei na kaukauwa o gadreva mo sotava kina na vei bolebole eso. O na raica na liga ni Turaga ni na vakatautauvatataka iko ki na cava ga e yaco mai vei iko—kevaka sara mada ga e “luluqa mai eli.”