Na Sele ni Noqu Uto kei na Veika Au a Sotava

Mai vei Carter Thomas

Droini mai vei Adam Howling

Au dau vakaogai au ena qito, vakauasivi na basiketepolo. Au dau taleitaka me‘u veisisivi. Oqori vakatikina na vuna au a sotava kina e dua na veisele ni uto me walu na auwa ni‘u a se yabaki 14.

Au a sucu mai vata kei na kena leqa e dua na paipo ni noqu uto. Taumada, era a kaya na vuniwai ni‘u na gadreva na veisele ni‘u sa qase cake—ni cava na noqu gauna vaka cakacaka, e rairai. Ia ni toso tiko na gauna, sa ca sara vakalevu na bula, baleta ni‘u dau qito kaukauwa.

Ena dua na veisiko ena vulaimago, e a kaya o vuniwai ni‘u na gadreva na veisele ena yabaki ka tarava se rua. Ena gauna vata oqo, au a ciciva tiko e koronivuli na veitaucici e lomanivanua. Ia sa sega ni vinaka cake na noqu gauna ni cici, e sa ca vakalevu sara. Oqori na sala au a kila kina ni sa dua na ka esa sega tiko ni vinaka.

Keitou a lai raici vuniwai tale ena Maji. Ena gauna ni veisiko, au a vakila ni sa dodonu me sa totolo cake na gauna me‘u sele kina ka me sa kua ni vakamuri na neitou ituvatuva taumada. Sa tekivu me‘u vakila e dua na yalo vinaka vakayalo e yaloqu. Na ivakatakila yadua oqori e kauta mai vei au eso na vakacegu. Vakasauri ga au sa rogoca au ni‘u kaya ni‘u sa vinakata na veisele ena kena gauna totolo duadua. E rau a rere taumada na noqu itubutubu, ia au a tukuna vei rau, “Au sa yalo vakacegu. Ena vakaivei beka na totolo ni kena rawa ni vakayacori?” Keitou a lokuca na veisele ena Epereli.

Ena veigauna dredre, au kila ni o Jisu Karisito e dau tu e yasaqu. Au rawa ni masu tikoga vua na Tamada Vakalomalagi, ka dau veivuke sara.

Au a vakabauta ni na vinaka na veika taucoko, ia na siga ni veisele e sa vakavu rere tikoga. A tarai au mai vakasauri, ni‘u curuma yani na rumu oya. Au vakasamataka ni‘u a sautanini. Sa vukei au sara ga vakalevu na dauveiqaravi vaka anesitioloji ena gauna oya. Au vakavinavinaka vei ira taucoko na tamata era a vukei au mai ena gauna oya. A yaco talega vei au na veivuke vakalomalagi. Me kena ivakaraitaki, era a lolovaki au na noqu tabanalevu taucoko, ka‘u a vakila vakaidina na kaukauwa ni lolo kei na masumasu.

iTaba e lolomataka na matavuvale na Thomas

Ena gauna oqo na utoqu esa cakacaka vinaka sara tikoga. Kevaka me a sega na veisele, au a rawa ni mate ena loma ni rua na yabaki. Ia oqo sa rawa ni‘u yacova na iyalayala ni bula.

Na veika kece oqo esa veisautaka na noqu rai. Au raica vakaduidui na tamata ni ra lako curuma na nodra veivakatovolei. Au lomani ira vakalevu cake. Au dau raica e dua ena so na gauna ka‘u vakila ni sotava tiko e dua na ka dredre, ka‘u dau toso yani ka vukei ira.

Vei au, me‘u dua na tisaipeli i Jisu Karisito e kena ibalebale dina me da ivakaraitaki vei ira na tani ka qaravi ira na tamata kecega me vakataki Koya. Eda sa duavata tiko ena ka oqo. Na Kalou e Tamada, ka sa ikeda na Luvena tagane kei na yalewa. Na tamata kece e tu na kedra inaki kei na kedra yaga. E sa vuqa sara tu na veika sega ni vinaka, ka‘u dau tovolea me‘u vukei ira na tamata me ra matadredredre ka vinaka cake.

Au vakadinadinataka ni‘u rawa ni ciqoma na veidusimaki yadua mai vua na Turaga e veisiga. E rawa ni vakaukauwataki au o Koya me‘u dua na tamata kaukauwa cake ka solia vei au na yalo dei. Au sa rawata na ka kecega ena vuku i Karisito (raica na Filipai 4:13).